MLC 2024: டிராவிஸ் ஹெட், கிளென் மேக்ஸ்வெல் அதிரடியில் இறுதிப்போட்டிக்குள் நுழைந்தது வாஷிங்டன் ஃப்ரீடம்!

அமெரிக்காவில் நடைபெற்று வரும் இரண்டாவது சீசன் மேஜர் லீக் கிரிக்கெட் தொடரின் இரண்டாவது சீசன் இறுதிக்கட்டத்தை எட்டியுள்ளது. இத்தொடரில் இன்று நடைபெற்ற குவாஃபையர் ஆட்டத்தில் ஸ்டீவ் ஸ்மித் தலைமையிலான வாஷிங்டன் ஃப்ரீடம் அணியும், கோரி ஆண்டர்சன் தலைமையில் சான் ஃபிரான்சிஸ்கோ யூனிகார்ன்ஸ் அணிகள் பலப்பரீட்சை நடத்தின. இப்போட்டியில் டாஸ் வென்ற வாஷிங்டன் ஃப்ரீடம் அணியானது முதலில் பந்துவீசுவதாக அறிவித்தது. அதன்படி களமிறங்கிய யூனிகார்ன்ஸ் அணிக்கு ஃபின் ஆலன் மற்றும் ஜேக் ஃபிரேசர் மெக்குர்க் இணை தொடக்கம் கொடுத்தனர். 

இதில் ஃபின் ஆலன் 6 ரன்களில் நடையைக் கட்ட, அவரைத்தொடர்ந்து 11 ரன்கள் எடுத்திருந்த நிலையில் ஜேக் ஃபிரேசர் மெக்குர்க்கும் விக்கெட்டை இழந்தார். பின்னர் களமிறங்கிய ஜோஷ் இங்லிஸ் 8 ரன்களிலும், ரூதர்ஃபோர்ட் 6 ரன்களுக்கும், சஞ்சய் கிருஷ்ணமூர்த்தி 19 ரன்களுக்கும் என அடுத்தடுத்து விக்கெட்டை இழக்க, யூனிகார்ன்ஸ் அணி 66 ரன்களுக்கே 5 விக்கெட்டுகளை இழந்து தடுமாறியது. அதன்பின் இணைந்த ஹசன் கான் - கோரி ஆண்டர்சன் இணை அதிரடியாக விளையாடி அணியின் ஸ்கோரை உயர்த்தும் முயற்சியில் இறங்கினர். இதில் சிறப்பான ஆட்டத்தை வெளிப்படுத்திய ஹசன் கான் தனது அரைசதத்தைக் கடந்தார். 

ஆனால் மறுபக்கம் நிதானமாக விளையாடி வந்த கோரி ஆண்டர்சன் 26 ரன்களுடன் நடையைக் கட்ட, அடுத்து களமிறங்கிய பாட் காம்மின்ஸ், ஹாரிஸ் ராவுஃப், கார்மி ஆகியோரும் அடுத்தடுத்து விக்கெட்டுகளை இழக்க அரைசதம் கடந்து விளையாடி வந்த ஹசன் கானும் 6 சிக்ஸர்களுடன் 59 ரன்களில் ஆட்டமிழந்தார். இதன்மூலம் சான் ஃபிரான்சிஸ்கோ யூனிகார்ன்ஸ் அணியானது 19 ஓவர்களில் அனைத்து விக்கெட்டுகளையும் இழந்து 145 ரன்களுக்கு ஆல் அவுட்டானது. வாஷிங்டன் ஃப்ரீடம் அணி தரப்பில் சிறப்பாக பந்துவீசிய ரச்சின் ரவீந்திரா 4 விக்கெட்டுகளையும், மார்கோ ஜான்சென் 3 விக்கெட்டுகளையும் கைப்பற்றினர். 

இதனையடுத்து இலக்கை நோக்கி விளையாடிய வாஷிங்டன் ஃப்ரீடம் அணிக்கு டிராவிஸ் ஹெட் - ஸ்டீவ் ஸ்மித் இணை தொடக்கம் கொடுத்தனர். இதில் கேப்டன் ஸ்டீவ் ஸ்மித் ஒரு ரன்னிலும், ஆண்ட்ரிஸ் கௌஸ் 9 ரன்களிலும், ரச்சின் ரவீந்திரா 3 ரன்களிலும் என அடுத்தடுத்து விக்கெட்டுகளை இழந்தனர். இதனால் அந்த அணி 64 ரன்களில் 3 விக்கெட்டுகளை இழந்து தடுமாறியது. ஆனால் மறுபக்கம் தொடக்க வீரராக களமிறங்கிய டிராவிஸ் ஹெட் அதிரடியாக விளையாடி ஸ்கோரை உயர்த்தினார். அவருக்கு துணையாக 4ஆவது விக்கெட்டிற்கு களமிறங்கிய கிளென் மேக்ஸ்வெல்லும் அதிரடி காட்டினார்.

Also Read: Akram ‘hopes’ Indian Team Will Travel To Pakistan For 2025 Champions Trophy

இருவரும் இணைந்து அதிரடியாக விளையாடியதுடன் தங்களது அரைசதங்களையும் பதிவுசெய்து அசத்தினர். மேற்கொண்டு இதில் இறுதிவரை ஆட்டமிழக்காமல் இருந்த டிராவிஸ் ஹெட் 10 பவுண்டரி, 3 சிக்ஸர்கள் என 77 ரன்களையும்,  கிளென் மேக்ஸ்வெல் 4 பவுண்டரி, 5 சிக்ஸர்கள் என 54 ரன்களையும் சேர்த்தனர். இதன்மூலம் வாஷிங்டன் ஃப்ரீடம் அணி 15.3 ஓவர்களில் இலக்கை எட்டியதுடன் 7 விக்கெட் வித்தியாசத்தில் சான் ஃபிரான்சிஸ்கோ யூனிகார்ன்ஸ் அணியை வீழ்த்தி வெற்றிபெற்றது. இந்த வெற்றியின் மூலம் வாஷிங்டன் ஃப்ரீடம் அணியானது நடப்பு மேஜர் லீக் கிரிக்கெட் தொடரின் இறுதிப்போட்டிக்கு முன்னேறி அசத்தியுள்ளது.