இங்கிலாந்து மகளிர் அணி தற்சமயம் ஆஸ்திரேலியாவில் சுற்றுப்பயணம் மேற்கொண்ட் ஆஷஸ் தொடரில் விளையாடி வருகிறது. இதில் ஒருநாள் தொடரை 3-0 என்ற கணக்கில் ஆஸ்திரேலிய மகளிர் அணி வென்றுள்ள நிலையில், நடைபெற்று வரும் டி20 தொடரின் முதலிரண்டு போட்டிகளிலும் ஆஸ்திரேலிய அணி வெற்றிபெற்று 2-0 என்ற கணக்கில் டி20 தொடரையும் வென்றுள்ளது.
இந்நிலையில் ஆஸ்திரேலியா - இங்கிலாந்து மகளிர் அணிகளுக்கு இடையேயான டி20 தொடரின் மூன்றாவது மற்றும் கடைசி போட்டி இன்று (ஜனவரி 25) அடிலெய்டில் உள்ள அடிலெய்ட் ஓவல் கிரிக்கெட் மைதானத்தில் நடைபெற்றது. அடிலெய்ட் ஓவல் மைதானத்தில் நடைபெற்ற இப்போட்டியில் டாஸ் வென்று முதலில் பேட்டிங் செய்த ஆஸ்திரேலிய அணிக்கு பெத் மூனி - ஜார்ஜியா வோல் இணை அதிரடியான தொடக்கத்தைக் கொடுத்தனர். இதில் இருவரும் இணைந்து முதல் விக்கெட்டிற்கு 56 ரன்கள் பார்ட்னர்ஷிப் அமைத்த நிலையில் ஜார்ஜியா வோல் 23 ரன்களில் விக்கெட்டை இழந்தார்.
மற்றொரு தொடக்க வீராங்கனை பெத் மூனி தனது அரைசதத்தைப் பதிவுசெய்த நிலையில், மறுபக்கம் களமிறங்கிய போப் லிட்ச்ஃபீல்ட், எல்லிஸ் பெர்ரி ஆகியோர் தலா 12 ரன்னிலும், கிரேஸ் ஹேரிஸ் 11 ரன்னிலும், அனபெல் சதர்லேண்ட் 3 ரன்னிலும் என விக்கெட்டை இழந்தனர். இருப்பினும் இப்போட்டியில் இறுதிவரை ஆட்டமிழக்காமல் இருந்த பெத் மூனி 10 பவுண்டரிகளுடன் 94 ரன்களைச் சேர்த்து அணிக்கு ஃபினிஷிங்கை கொடுத்தார். இதன்மூலம் ஆஸ்திரேலிய மகளிர் அணி 20 ஓவர்கள் முடிவில் 5 விக்கெட் இழப்பிற்கு 162 ரன்களைச் சேர்த்தது.
இதனையடுத்து இலக்கை நோக்கி விளையாடிய இங்கிலாந்து மகளிர் அணியின் டாப் ஆர்டர் வீராங்கனைகள் சோபிக்க தவறினர். அதன்படி அணியின் தொடக்க வீராங்கனைகள் சோபியா டங்க்லி 5 ரன்னிலும், டேனியல் வைட் 17 ரன்னிலும், அலிஸ் கேப்ஸி 6 ரன்னிலும், நாட் ஸ்கைவர் ஒரு ரன்னிலும் என விக்கெட்டை இழந்து ஏமாற்றமளித்தனர். பின்னர் களமிறங்கிய கேப்டன் ஹீதர் நைட் ஒருபக்கம் நிதானமாக விளையாடி அணியின் ஸ்கோரை உயர்த்திய நிலையில், மறுபக்கம் களமிறங்கிய வீராங்கனைகள் ஆஸ்திரேலிய அணியின் பந்துவீச்சுக்கு ஈடுகொடுக்க முடியாமல் விக்கெட்டுகளை இழந்தனர்.
Also Read: Funding To Save Test Cricket
இதன் காரணமாக இங்கிலாந்து அணி 17.3 ஓவர்களில் அனைத்து விக்கெட்டுகளையும் இழந்து 90 ரன்களுக்கு ஆல் அவுட்டானது. ஆஸ்திரேலிய அணி தரப்பில் ஜார்ஜியா வர்ரெம் 3 விக்கெட்டுகளை கைப்பற்றினார். இதன்மூலம் ஆஸ்திரேலிய மகளிர் அணி 72 ரன்கள் வித்தியாசத்தில் இங்கிலாந்து மகளிர் அணியை வீழ்த்தி அபார வெற்றியைப் பதிவுசெய்தது. இந்த வெற்றியின் மூலம் ஆஸ்திரேலிய மகளிர் அணி மூன்று போட்டிகள் கொண்ட டி20 தொடரையும் 3-0 என்ற கணக்கில் கைப்பற்றி இங்கிலாந்தை ஒயிட்வாஷ் செய்தும் அசத்தியுள்ளது.