ராஞ்சி மைதானத்தில் சர்ஃப்ரைஸ் விசீட் அடித்த தோனி; வைரல் காணொளி!

நியூசிலாந்து அணிக்கு எதிரான ஒருநாள் கிரிக்கெட் தொடரை இந்தியா 3 -0 என வெற்றிகரமாக முடித்தது. இதனையடுத்து இரு அணிகளும் டி20 தொடருக்காக தயாராகி வருகின்றன. 3 போட்டிகள் கொண்ட டி20 தொடர் நாளை ராஞ்சியில் உள்ள ஜேஎஸ்சிஏ சர்வதேச மைதானத்தில் நடைபெறவுள்ளது. இப்போட்டி இந்திய நேரப்படி இரவு 7.30 மணிக்கு தொடங்கும் என அறிவிக்கப்பட்டுள்ளது.

இந்த முறையும் டி20 தொடருக்கான அணியில் இருந்து ரோஹித் சர்மா, விராட் கோலி உள்ளிட்ட சீனியர் வீரர்கள் வெளியேற்றப்பட்டுள்ளனர். அடுத்ததாக ஆஸ்திரேலியாவுடன் 4 டெஸ்ட் போட்டிகள் உள்ளதால் ஓய்வு கொடுக்கப்பட்டுள்ளது. எனவே ஹர்திக் பாண்டியாவின் தலைமையில் மீண்டும் ஒரு இளம் படை களமிறங்கவுள்ளது. இதற்காக முன்கூட்டியே மைதானத்திற்கு சென்று தயாராகி வருகின்றனர்.

இந்நிலையில் பயிற்சியில் ஈடுபட்டிருந்த இளம் வீரர்களுக்கு திடீர் வருகையால் சர்ஃப்ரைஸ் கொடுத்துள்ளார் எம்.எஸ்.தோனி. ஜார்க்காண்ட்-ல் உள்ள ராஞ்சி தான் தோனியின் சொந்த ஊராகும். அங்குள்ள மைதானங்களில் தான் விளையாடி வந்தவர். எனவே இந்த மைதானத்தில் எப்படி விளையாடினால் சிறப்பாக இருக்கும் என இளம் வீரர்களுக்கு ஆலோசனைகளை வழங்கியுள்ளார்.

இதுகுறித்து பிசிசிஐ வெளியிட்டுள்ள காணொளியில், ஹர்திக் பாண்டியா மற்றும் இஷான் கிஷான் ஆகியோர் நீண்ட நேரமாக எம்.எஸ்.தோனியுடன் ஏதோ ஒரு விஷயத்தை விவாதித்தனர். இதன் பின்னர் தமிழக வீரர் வாஷிங்டன் சுந்தருடன் நேராக வந்த தோனி, அவருக்கு தனிப்பட்ட முறையில் களம் எப்படி செயல்படும் என்பது குறித்து ஆலோசனைகளை வழங்கினார்.

முன்னதாக எம்.எஸ்.தோனியின் வீட்டிற்கு நேற்றிரவு ஹர்திக் பாண்டியா உள்ளிட்ட சிலர் சென்றுள்ளனர். அவரின் வீட்டில் உள்ள பிரத்யேக வாகனங்களை அவர்கள் பார்த்து ரசித்தனர். அப்போது சோலே திரைப்படத்தில் வரும் காட்சியை போலவே பாண்டியாவும் தோனியும் பைக்கில் எடுத்துக்கொண்ட புகைப்படம் இணையத்தை கலக்கியது குறிப்பிடத்தக்கது.