அதிக டெஸ்ட் விக்கெட்டுகள்: அஸ்வினை பின்னுக்கு தள்ளினார் லையன்!

ஆஸ்திரேலிய - இந்திய அணிகளுக்கு இடையேயான பார்டர் கவாஸ்கர் கோப்பை கிரிக்கெட் தொடரின் நான்காவது டெஸ்ட் போட்டில் சுவாரஸ்யத்திற்கு பஞ்சமில்லாமல் மெல்போர்னில் நடந்து முடிந்துள்ளது. இப்போட்டியில் டாஸ் வென்று முதலில் பேட்டிங் செய்த ஆஸ்திரேலிய அணி 474 ரன்களும், இந்திய அணி 369 ரன்களும் எடுத்தன. அதன்பின் 105 ரன் முன்னிலையுடன் இரண்டாவது இன்னிங்ஸை தொடங்கிய ஆஸ்திரேலிய அணி 234 ரன்களுக்கு ஆல்-அவுட் ஆனது.

இதன் மூலம் இந்தியாவுக்கு 340 ரன்கள் வெற்றி என்ற இலக்கு நிர்ணயிக்கப்பட்டது. இதனையடுத்து இலக்கை நோக்கி களமிறங்கிய இந்திய அணியானது 79.1 ஓவர்களில் அனைத்து விக்கெட்டுகளையும் இழந்து 155 ரன்களுக்கு ஆல் அவுட்டானது. இதன் மூலம் ஆஸ்திரேலிய அணி 184 ரன்கள் வித்தியாசத்தில் இந்திய அணியை வீழ்த்தி வெற்றி பெற்றது. இந்த வெற்றியின் மூலம் ஆஸ்திரேலிய அணி 5 போட்டிகள் கொண்ட டெஸ்ட் தொடரில் 2-1 என்ற கணக்கில் முன்னிலை பெற்றுள்ளது.

இதுதவிர்த்து ஆஸ்திரேலிய அணி மெல்போர்னில் 13 ஆண்டுக்கு பிறகு இந்தியாவிற்கு எதிராக முதல் முறையாக வெற்றியைப் பதிவுசெய்து அசத்தியுள்ளது. இதற்கு முன் இந்திய அணி மொல்போர்ன் கிரிக்கெட் மைதானத்தில் கடைசியாக விளையாடிய 3 டெஸ்ட் போட்டிகளில் இரண்டு வெற்றியும், ஒன்றில் டிராவும் செய்துள்ளது குறிப்பிடத்தக்கது. இந்நிலையில் இப்போட்டியின் மூலம் நாதன் லையன் சர்வதேச கிரிக்கெட்டில் புதிய மைல்கல்லை எட்டியுள்ளார்.

இந்திய அணிக்கு எதிரான நான்காவது டெஸ்ட் போட்டியில் நாதன் லையன் முதல் இன்னிங்ஸில் 3 விக்கெட்டுகளையும், இரண்டாவது இன்னிங்ஸில் 2 விக்கெட்டுகளையும் கைப்பற்றினார். இதன்மூலம் சர்வதேச டெஸ்ட் கிரிக்கெட்டில் அதிக விக்கெட்டுகளை வீழ்த்தி வீரர்கள் பட்டியலில் சமீபத்தில் சர்வதேச கிரிக்கெட்டில் இருந்து ஓய்வை அறிவித்து இந்திய வீரர் ரவிச்சந்திரன் அஸ்வினை பின்னுக்கு தள்ளி 7ஆம் இடத்திற்கு முன்னேறியுள்ளார். 

இதற்கு முன் இந்திய வீரர் ரவிச்சந்திரன் அஸ்வின் 106 போட்டிகளில் விளையாடி 537 விக்கெட்டுகளை கைப்பற்றி இந்த பட்டியளில் 7ஆம் இடத்தில் இருந்த நிலையில் தற்போது நாதன் லையன் 538 விக்கெட்டுகளை வீழ்த்தி 7ஆம் இடத்திற்கு முன்னேறியுள்ளார். இந்த பட்டிலில் இலங்கை அணியின் முத்தையா முரளிதரன் 800 விக்கெட்டுகளுடன் முதலிடத்திலும், ஆஸ்திரேலியாவின் ஷேன் வார்னே 708 விக்கெட்டுகளுடன் இரண்டாம் இடத்திலும் உள்ளது குறிப்பிடத்தக்கது.

Also Read: Funding To Save Test Cricket

டெஸ்ட் கிரிக்கெட்டில் அதிக விக்கெட்டுகளை வீழ்த்திய வீரர்கள்

• முத்தையா முரளிதரன் (இலங்கை) - 800 விக்கெட்டுகள்
• ஷேன் வார்னே (ஆஸ்திரேலியா) - 708 விக்கெட்டுகள்
• ஜேம்ஸ் ஆண்டர்சன் (இங்கிலாந்து) - 704 விக்கெட்டுகள்
• அனில் கும்ப்ளே (இந்தியா) - 619 விக்கெட்டுகள்
• ஸ்டூவர்ட் பிராட் (இங்கிலாந்து) - 604 விக்கெட்டுகள்
• கிளென் மெக்ராத் (ஆஸ்திரேலியா) - 563 விக்கெட்டுகள்
• நாதன் லையன் (ஆஸ்திரேலியா) - 538 விக்கெட்டுகள்
• ரவிச்சந்திரன் அஸ்வின் (இந்தியா) - 537 விக்கெட்டுகள்