விக்கெட் கீப்பரின் தவறு; வெற்றியைக் கொண்டாடிய வங்கதேசத்திற்கு காத்திருந்த அதிர்ச்சி!
குரூப் பி பிரிவில் இன்று நடைபெற்ற போட்டியில் ஜிம்பாப்வே மற்றும் வங்கதேச அணிகள் பலப்பரீட்சை நடத்தின. இந்த போட்டி பிரிஸ்பேனில் உள்ள காப்பா மைதானத்தில் நடைபெற்றது. விறுவிறுப்பாக நடைபெற்ற இந்த போட்டியில் ஜிம்பாப்வே அணியை 3 ரன்கள் வித்தியாசத்தில் வங்கதேசம் வீழ்த்தியது. அதுவும் கடைசி பந்தில் யாரும் எதிர்பார்க்காத வகையில் த்ரில் வெற்றி பெற்றிருந்தது.
முதலில் பேட்டிங் செய்த வங்கதேச அணி 20 ஓவர்களில் 7 விக்கெட்கள் இழப்புக்கு 150 ரன்களை குவித்தது. இதன்பின்னர் ஆடிய ஜிம்பாப்வே அணி 20 ஓவர்களில் 8 விக்கெட்களை இழந்து 147 ரன்களை மட்டுமே எடுத்து 3 ரன்கள் வித்தியாசத்தில் தோல்வியை தழுவியது. ஆனால் இந்த போட்டியில் ஜிம்பாப்வே வெற்றி பெறுவதற்கு 2 வாய்ப்புகள் அதிசயமாக கிடைத்தது. எனினும் அதனை தவறவிட்டுள்ளது.
ஜிம்பாப்வே அணி வெற்றி பெறுவதற்கு கடைசி ஓவரில் 16 ரன்கள் தேவைப்பட்டது. அப்போது முதல் 4 பந்துகளில் 11 ரன்களை அடித்துவிட்டனர். 5வது பந்தில் எதிர்பாராத விதமாக காராவா போல்ட் ஆனார். இதனால் கடைசி பந்தில் 5 ரன்களை அடித்தால் வெற்றி என்ற சூழல் உருவானது.
ரசிகர்கள் ஆவலுடன் எதிர்பார்த்த அந்த பந்தை பேட்ஸ்மேன் முசாராபானி சற்று இறங்கி ஆட நினைத்து ஸ்டம்ப் அவுட் செய்யப்பட்டார். இதனால் வங்கதேசம் வெற்றி பெற்றது என அறிவிக்கப்பட்டு, வங்கதேச வீரர்களும் ரசிகர்களும் கொண்டாட தொடங்கினர். பின்னர் வீரர்கள் களத்தில் இருந்து வெளியேற தொடங்கினர். ஆனால் அப்போது தான் ட்விஸ்ட் அம்பயர் ட்விஸ்ட் கொடுத்தார்.
அதாவது விக்கெட் கீப்பர் நூரல் ஹசன் ஸ்டம்பிற்கு முன்னால் கைகளை நீட்டி பந்தைப் பிடித்தது தெரியவந்தது. இதனையடுத்து அதனை நோ பாலாக அறிவித்து, அனைத்து வீரர்களும் மீண்டும் களத்திற்குள் அழைக்கப்பட்டனர். அப்போது ஒரே பந்தில் 4 ரன்கள் தேவைப்பட்டது. ஆனாலும் அவரால் பந்தை அடிக்க முடியாததால் வங்கதேசம் 3 ரன்கள் வித்தியாசத்தில் வெற்றி கண்டது.
இந்த வெற்றி மூலம் வங்கதேசம் மூன்றில் 2 வெற்றிகளுடன் 4 புள்ளிகள் பெற்று 2ஆம் இடம் பிடித்துள்ளது. ஆனால் நெட் ரன்ரேட் -1.533 என்று இருப்பதால் அரையிறுதி வாய்ப்பு இன்னமும் கூட கடினமே.