PAK vs AUS, 1st Test (Day 1): இமாம் உல் ஹக் அபாரம்; வலுவான நிலையில் பாகிஸ்தான்!

பாகிஸ்தான் சென்றுள்ள ஆஸ்திரேலிய கிரிக்கெட் அணி 3 டெஸ்ட், 3 ஒருநாள் மற்றும் ஒரே ஒரு 20 ஓவர் போட்டியில் விளையாடுகிறது. 1998ஆம் ஆண்டுக்கு பிறகு ஆஸ்திரேலிய அணி முதல்முறையாக பாகிஸ்தானில் பயணம் செய்து ஆடுவதால் இந்த தொடர் அதிக எதிர்பார்ப்பை ஏற்படுத்தியுள்ளது.

இதில் ஆஸ்திரேலியா-பாகிஸ்தான் அணிகள் இடையிலான முதலாவது டெஸ்ட் போட்டி ராவல்பிண்டியில் இன்று தொடங்குகியது. இப்போட்டியில் டாஸ் வென்ற பாகிஸ்தான் அணி பேட்டிங் செய்வதாக அறிவித்தது.

இதனையடுத்து பாகிஸ்தான் அணியின் தொடக்க ஆட்டக்காரர்களாக அப்துல்லா ஷபீக், இமாம்-உல்-ஹக் களமிறங்கினர். இருவரும் நிதானமாக விளையாடி ரன்களை சேர்த்தனர். இருவரையும் விக்கெட் எடுக்க முடியாமல் ஆஸ்திரேலிய அணி பந்து வீச்சாளர்கள் திணறினர். இறுதியாக உணவு இடைவேளைக்கு 2 ஓவர் இருந்த நிலையில் அப்துல்லா ஷபீக் நாதன் லயன் பந்து வீச்சில் 44 ரன்னில் ஆட்டமிழந்தார். இந்த ஜோடி முதல் விக்கெட்டுக்கு 105 ரன்கள் எடுத்திருந்தது.

இருப்பினும் மறுமுனையில் சிறப்பாக விளையாடிய இமாம் சதமடித்து அசத்தினார். பின்னர் அவருடன் விளையாடி வந்த அசார் அலியும் அரைசதம் கடந்து அசத்தினார்.

இதன்மூலம் முதல் நாள் ஆட்டநேர முடிவில் பாகிஸ்தான் அணி ஒரு விக்கெட்டை மட்டுமே இழந்து 245 ரன்களைச் சேர்த்தது. பாகிஸ்தான் அணி தரப்பில் இமாம் உல் ஹக் 132 ரன்களுடனும், அசார் அலி 64 ரன்களுடனும் களத்தில் உள்ளனர்.