PAK vs AUS, 3rd Test: கேமரூன், கேரி அரைசதம்; வலிமையான நிலையில் ஆஸ்திரேலியா!

பாகிஸ்தான் - ஆஸ்திரேலியா இடையேயான 3 டெஸ்ட் போட்டிகள் கொண்ட தொடரின் முதலிரண்டு போட்டிகளும் டிராவில் முடிந்த நிலையில், கடைசி டெஸ்ட் போட்டி லாகூரில் இன்று தொடங்கியது.

இந்த போட்டியில் டாஸ் வென்ற ஆஸ்திரேலிய அணி முதலில் பேட்டிங் ஆடிவருகிறது. ஆஸ்திரேலிய அணியின் தொடக்க வீரர் டேவிட் வார்னரை 7 ரன்னில் வீழ்த்திய ஷாஹீன் அஃப்ரிடி, லபுஷேனை ரன்னே அடிக்கவிடாமல் டக் அவுட்டாக்கினார். 

8 ரன்களுக்கே ஆஸ்திரேலிய அணி 2 விக்கெட்டுகளை இழந்த நிலையில், அதன்பின்னர் உஸ்மான் கவாஜாவும் ஸ்டீவ் ஸ்மித்தும் இணைந்து பார்ட்னர்ஷிப் அமைத்து மிகச்சிறப்பாக விளையாடி 3வது விக்கெட்டுக்கு 138 ரன்களை சேர்த்தனர். சிறப்பாக பேட்டிங் ஆடிய உஸ்மான் கவாஜா அரைசதம் அடிக்க, அவரைத்தொடர்ந்து ஸ்மித்தும் அரைசதம் அடித்தார். ஸ்மித் 59 ரன்களில் ஆட்டமிழக்க, சதத்தை நெருங்கிய உஸ்மான் கவாஜா 91 ரன்னில் ஆட்டமிழந்து 9 ரன்னில் சதத்தை தவறவிட்டார்.

ஸ்டீவ் ஸ்மித்தை நசீம் ஷாவும், உஸ்மான் கவாஜாவை சஜித் கானும் வீழ்த்தினர். 5ஆம் வரிசையில் இறங்கிய டிராவிஸ் ஹெட்டை 26 ரன்னில் நசீம் ஷா வீழ்த்தினார். முதல் நாள் ஆட்ட முடிவில் ஆஸ்திரேலிய அணி 5 விக்கெட் இழப்பிற்கு 232 ரன்கள் அடித்துள்ளது. கேமரூன் க்ரீன் 20 ரன்களுடனும், அலெக்ஸ் கேரி 8 ரன்களுடனும் களத்தில் இருந்தனர். ஷாஹீன் அஃப்ரிடி மற்றும் நசீம் ஷா அபாரமாக பந்துவீசி தலா 2 விக்கெட்டுகளை வீழ்த்தினர்.

இதையடுத்து இன்று தொடங்கிய இரண்டாம் நாள் ஆட்டத்தில் பொறுப்புடன் விளையாடிய கேமரூன் க்ரீன் - அலெக்ஸ் கேரி இருவரும் அரைசதம் அடித்தி அணியின் ஸ்கோரை உயர்த்தினர். 

இதன்மூலம் இரண்டாம் நாள் உணவு இடைவேளையின் போது ஆஸ்திரேலிய அணி 5 விக்கெட் இழப்பிற்கு 320 ரன்களைச் சேர்த்தது. இதில் கேமரூன் க்ரீன் 56 ரன்களுடனும், அலெக்ஸ் கேரி 60 ரன்களுடனும் பேட்டிங் செய்து வருகின்றனர்.