ஆசிய கோப்பை கிரிக்கெட் தொடரின் நடப்பாண்டு சீசன் பாகிஸ்தான், இலங்கையில் விறுவிறுப்பாக நடைபெற்றுவருகிறது. இத்தொடரின் இறுதிப்போட்டிக்கு ரோஹித் சர்மா தலைமையிலான இந்திய அணி முன்னேறிய நிலையில், மீதமுள்ள இடத்தை பிடிக்கு அணி எது? என்ற கேள்வி அதிகரித்துள்ளது.
அதன்பின் இன்று நடைபெற்ற முக்கியமான் போட்டியில் பாகிஸ்தான் மற்றும் இலங்கை அணிகள் பலப்பரீட்சை நடத்தி வருகின்றன. இப்போட்டி தொடங்குவதற்கு முன்னதாக மழை பெய்த காரணத்தால் ஆட்டம் 42 ஓவர்களாக குறைக்கப்பட்டது. அதன்படி இப்போட்டியில் டாஸ் வென்ற பாகிஸ்தான் அணி முதலில் பேட்டிங் செய்வதாக அறிவித்து களமிறங்கியது.
அதன்படி களமிறங்கிய பாகிஸ்தான் அணிக்கு ஃபகர் ஸமான் - அப்துல்ல ஷஃபிக் இணை தொடக்கம் கொடுத்தனர். இதில் ஃபகர் ஸ்மான் 4 ரன்களில் ஆட்டமிழந்தார். அதன்பின் களமிறங்கிய கேப்டன் பாபர் ஆசாம் நிதான ஆட்டத்தை வெளிப்படுத்தி 29 ரன்கள் எடுத்த நிலையில் துனித் வெல்லாலகேவின் பந்துவீச்சில் ஸ்டம்பிங் முறையில் ஆட்டமிழந்து பெவிலியன் திரும்பினார்.
அதன்பின் அரைசதம் கடந்த அப்துலா ஷஃபிக் 52 ரன்களுக்கும், முகமது ஹாரிஸ் 3 ரன்களுக்கும், முகம்மது நவாஸ் 12 ரன்களுக்கும் என ஆட்டமிழந்து பெவிலியன் திரும்பினர். அதன்பின் இணைந்த முகமது ரிஸ்வான் - இஃப்திகார் அஹ்மத் இணை சிறப்பான ஆட்டத்தை வெளிப்படுத்தி விக்கெட் இழப்பை தடுத்ததுடன் அணியின் ஸ்கோரையும் மளமளவென உயர்த்தினர்.
இதில் அதிரடியான ஆட்டத்தை வெளிப்படுத்திய முகமது ரிஸ்வான் சர்வதேச ஒருநாள் கிரிக்கெட்டில் தனது 12ஆவது அரைசதத்தைப் பதிவுசெய்து அசத்தினார். அதேசமயம் மறுப்பககம் அரைசதம் அடிப்பார் என எதிர்பார்க்கப்பட்ட இஃப்திகார் அஹ்மத் 4 பவுண்டரி, 2 சிக்சர்கள் என 47 ரன்களில் விக்கெட்டை இழந்தார். அவரைத்தொடர்ந்து களமிறங்கிய ஷதாப் கானும் 3 ரன்களில் ஆட்டமிழந்தார்.
இருப்பினும் இறுதிவரை ஆட்டமிழக்காமல் களத்தில் இருந்த முகமது ரிஸ்வான் 6 பவுண்டரி, 2 சிக்சர்கள் என 86 ரன்களை குவித்தார். இதன்மூலம் பாகிஸ்தான் அணி 42 ஓவர்கள் முடிவில் 7 விக்கெட்டுகளை இழந்து 252 ரன்களைச் சேர்த்தது. இலங்கை அணி தரப்பில் மதீஷா பதிரானா 3 விக்கெட்டுகளையும், பிரமோத் மதுஷன் 2 விக்கெட்டுகளையும் கைப்பற்றினர்.