PSL 2023: கிளாடியேட்டர்ஸை பந்தாடியது கலந்தர்ஸ்!

பாகிஸ்தன் சூப்பர் லீக் டி20 கிரிக்கெட் தொடரின் 8ஆவது சீசன் தற்போது தொடங்கி ரசிகர்களின் வரவேற்பை பெற்றுள்ளது. இதில் இன்று நடைபெற்ற 10ஆவது லீக் ஆட்டத்தில் ஷாஹீன் அஃப்ரிடி தலைமையிலான லாகூர் கலந்தர்ஸ் அணி , சர்ஃப்ராஸ் அஹ்மத் தலைமையிலான குயிட்டா கிளாடியேட்டர்ஸ் அணியை எதிர்கொண்டது. 

அதன்படி கராச்சியிலுள்ள தேசிய கிரிக்கெட் மைதானத்தில் நடைபெறும் இப்போட்டியில் டாஸ் வென்ற குயிட்டா கிளாடியேட்டர்ஸ் அணி முதலில் பந்துவீச தீர்மானித்தது. அதன்படி களமிறங்கிய லாகூர் கலந்தர்ஸ் அணியில் மிர்ஸா தாஹிர் - ஃபகர் ஸமான் இணை அதிரடியான தொடக்கத்தை கொடுத்தனர். 

பின் 22 ரன்களில் ஃபகர் ஸமான் ஆடமிழக்க, அவரைத்தொடர்ந்து மிர்ஸா தஹிர் 31 ரன்களுக்கு விக்கெட்டை இழந்தார். இதனைத்தொடர்ந்து களமிறங்கிய காம்ரன் குலாம் 21 ரன்களில் ஆட்டமிழந்து பெவிலியன் திரும்பினார். பின்னர் களமிறங்கிய ஷாய் ஹோப் - ஹுசைன் தாலத் இணை அதிரடியான ஆட்டத்தை வெளிப்படுத்தி அணியின் ஸ்கோரை மளமளவென உயர்த்தினர். 

இதில் அரைசதம் அடிப்பார் என எதிர்பார்க்கப்பட்ட ஷாய் ஹோப் 47 ரன்களில் ஆட்டமிழக்க, ஹுசைன் தாலத் 26 ரன்களில் விக்கெட்டை இழந்தார். அவரைத்தொடர்ந்து டேவிஸ் வைஸும் சொற்ப ரன்களுக்கு நடையைக் கட்டினார். இறுதியில் சிக்கந்தர் ரஸா அதிரடியான ஆட்டத்தை வெளிப்படுத்தி 16 பந்துகளில் 32 ரன்களைச் சேர்த்தார். 

இதன்மூலம் 20 ஓவர்கள் முடிவில் லாகூர் கலந்தர்ஸ் அணி 6 விக்கெட் இழப்பிற்கு 198 ரன்களைக் குவித்தது. குயிட்டா கிளாடியேட்டர்ஸ் தரப்பில் ஓடியன் ஸ்மித்,கியுஸ் அகம்து தலா 2 விக்கெட்டுகளைக் கைப்பற்றினர். 

இதையடுத்து இலக்கை நோக்கி களமிறங்கிய குயிட்டா கிளாடியேட்டர்ஸ் அணியில் அப்துல் முதல் பந்திலேயே விக்கெட்டை இழந்தார். பின்னர் ஜோடி செர்ந்த கப்தில் - ராய இணை சிறப்பான ஆட்டத்தை வெளிப்படுத்தினர். ஆனால் அவர்களாலும் நீண்ட நேரம் தாக்குப்பிடிக்க முடியவில்லை. இதில் கப்தில் 15 ரன்களில் ஆட்டமிழக்க, மறுமனையில் அரைசதம் கடப்பார் என எதிர்பார்க்கப்பட்ட ஜேசன் ராய் 48 ரன்களில் விக்கெட்டை இழந்தனார். 

பின்னர் களமிறங்கிய முகமது ஹபீஸ் 25, இஃப்திகார் அகமத் 6, ஓடியன் ஸ்மித் 9, முகமது நவாஸ் 2, அகமது 9 ரன்கள் என அடுத்தடுத்து விக்கெட்டுகளை இழந்தனர். இதனால் 20 ஓவர்கள் முடிவில் அந்த அணி 8 விக்கெட் இழப்பிற்கு 135 ரன்களை மட்டுமே அடுத்தது. லாகூர் தரப்பில் ஷாஹீன் அஃப்ரிடி, டேவிட் வைஸ் தலா 3 விக்கெட்டுகளைக் கைப்பற்றினர். 

இதன்மூலம் லாகூர் கலந்தர்ஸ் அணி 63 ரன்கள் வித்தியாசத்தில் குயிட்டா கிளாடியேட்டர்ஸ் அணியை வீழ்த்தி அபார வெற்றியைப் பதிவுசெய்தது.