அதிகமுறை 5 விக்கெட்டுகள்; கும்ப்ளேவின் சாதனையை சமன் செய்த அஸ்வின்!

ராஜ்கோட்டி நடைபெற்று வரும் இந்தியா - இங்கிலாந்து அணிகளுக்கு இடையேயான நான்காவது டெஸ்ட் போட்டி வெற்றியை நோக்கி நகர்ந்துகொண்டிருக்கிறது. இப்போட்டியில் டாஸ் வென்று முதலில் பேட்டிங் செய்த இங்கிலாந்து அணி 353 ரன்களை குவித்து ஆல் அவுட்டானது நிலையில், அதன்பின் முதல் இன்னிங்ஸைத் தொடர்ந்த இந்திய அணி 307 ரன்களுக்கு ஆல் அவுட்டானது. 

இதன்மூலம் 46 ரன்கள் முன்னிலையும் இரண்டாவது இன்னிங்ஸைத் தொடர்ந்த இங்கிலாந்து அணியில் ஸாக் கிரௌலி 60 ரன்களையும், ஜானி பேர்ஸ்டோவ் 30 ரன்களையும் சேர்த்ததை தவிர மற்ற வீரர்கள் அனைவரும் அஸ்வின் மற்றும் குல்தீப் யாதவின் பந்துவீச்சை சமாளிக்க முடியாமல் அடுத்தடுத்து விக்கெட்டுகளை இழந்தனர். இதனால் அந்த அணி 145 ரன்களிலேயே அனைத்து விக்கெட்டுகளையும் இழந்து ஆல் அவுட்டானது. 

இந்திய அணி தரப்பி அபாரமாக பந்துவீசிய ரவிச்சந்திரன் அஸ்வின் 5 விக்கெட்டுகளையும், குல்தீப் யாதவ் 4 விக்கெட்டுகளையும் வீழ்த்தினர். இதனால் இந்திய அணிக்கு 192 ரன்கள் மட்டுமே இலக்காக நிர்ணயிக்கப்பட்டது. அதன்பின் இலக்கை துரத்தி வரும் இந்திய அணி மூன்றாம் நாள் ஆட்டநேர முடிவில் விக்கெட் இழப்பின்றி 40 ரன்களைச் சேர்த்துள்ளது. 

இந்நிலையில் இப்போட்டியில் 5 விக்கெட்டுகளை வீழ்த்தியதன் மூலம் ரவிச்சந்திரன் அஸ்வின் சாதனையை பட்டியளில் இணைந்துள்ளார். அதன்படி டெஸ்ட் கிரிக்கெட்டில் இந்தியாவுக்காக அதிக முறை 5 விக்கெட்டுகள் வீழ்த்திய வீரர் என்ற முன்னாள் ஜாம்பவான் அனில் கும்ப்ளேவின் (35 முறை) சாதனையை ரவிச்சந்திரன் அஸ்வின் சமன் செய்தார். அஸ்வின் 99 போட்டிகளில் விளையாடி இந்த சாதனையை படைத்துள்ளார்.

அதேவேளையில் கும்ப்ளே 132 போட்டிகளில் விளையாடி இந்த சாதனையை படைத்தார்.  மேலும் உலக அளவில் இந்த பட்டியலில் இலங்கை அணியின் முன்னாள் ஜாம்பவான் முத்தையா முரளிதரன் 67 முறை 5 விக்கெட்டுகளை வீழ்த்தி முதல் இடத்திலும், ஆஸ்திரேலியாவின் ஷேன் வார்னே 37 முறை வீழ்த்தி இரண்டாம் இடத்திலும், நியூசிலாந்தின் ரிச்சர்ட் ஹார்ட்லி 36 முறை வீழ்த்தி 3ஆம் இடத்திலும் உள்ளனர். அஸ்வின் மற்றும் அனில் கும்ப்ளே ஆகியோர் தலா 35 முறை 5 விக்கெட்டுகளை வீழ்த்தி நான்காம் இடத்தில் நீடிக்கின்றனர். 

முன்னதாக, இந்திய அணிக்காக இந்திய மண்ணில் அதிக டெஸ்ட் விக்கெட்டுகளை வீழ்த்தி வீரர் எனும் முன்னாள் ஜாம்பவான் அனில் கும்ப்ளேவின் சாதனையை ரவிச்சந்திரன் அஸ்வின் முறியடித்துள்ளார். இதில், அனில் கும்ப்ளே இந்தியாவில் 63 டெஸ்ட் போட்டிகளில் விளையாடி 350 விக்கெட்டுகளை வீழ்த்தியதே சாதனையாக இருந்த நிலையில்,  அதனைத் தற்போது அஸ்வின் 59 டெஸ்ட் போட்டிகளில் 354 விக்கெட்டுகளை கைப்பற்றி சாதனை படைத்தது குறிப்பிடத்தக்கது.