தோனியைப் பார்பதற்கு நான் ஆட்டமிழக்க வேண்டும் என ரசிகர்கள் காத்திருக்கின்றனர் - ரவீந்திர ஜடேஜா!

16ஆவது ஐபிஎல் தொடரின் 55ஆவது லீக் போட்டியில் தோனி தலைமையிலான சென்னை சூப்பர் கிங்ஸ் அணியும், டேவிட் வார்னர் தலைமையிலான டெல்லி கேப்பிடல்ஸ் அணியும் மோதின. சென்னை சேப்பாக்கம் மைதானத்தில் நடைபெற்ற இந்த போட்டியில் டாஸ் வென்ற சென்னை சூப்பர் கிங்ஸ் அணி முதலில் பந்துவீச்சை தேர்வு செய்தது.

இதனையடுத்து முதலில் பேட்டிங் செய்த சென்னை சூப்பர் கிங்ஸ் அணிக்கு சிவம் துபே 25 ரன்களும், கெய்க்வாட் 24 ரன்களும், கடைசி நேரத்தில் அதிரடியாக விளையாடிய தோனி 9 பந்துகளில் 20 ரன்களும் எடுத்து கொடுத்ததன் மூலம், 20 ஓவர்கள் முடிவில் 8 விக்கெட்டுகளை இழந்த சென்னை அணி 167 ரன்கள் எடுத்தது.

இதன்பின் 168 ரன்கள் எடுத்தால் வெற்றி என்ற எட்டக்கூடிய இலக்கை துரத்தி களமிறங்கிய டெல்லி அணிக்கு டேவிட் வார்னர் டக் அவுட்டாகி பெரும் ஏமாற்றம் கொடுத்தார். மற்றொரு துவக்க வீரரான பிலிப் சால்ட் 17 ரன்களில் விக்கெட்டை இழந்தார். இருவரையும் தீபக் சாஹர் வெளியேற்றி அசத்தினார். அடுத்தடுத்து களமிறங்கிய மணிஷ் பாண்டே (27), ரிலே ரூசோ (35) மற்றும் அக்‌ஷர் பட்டேல் (21) ஆகியோர் ஓரளவிற்கு ரன் எடுத்தாலும், ஒருவர் கூட சென்னை அணியின் பந்துவீச்சை சமாளித்து அதிரடியாக விளையாடாததால் 20 ஓவர்கள் முடிவில் 8 விக்கெட் இழப்பிற்கு 140 ரன்கள் மட்டுமே எடுத்த டெல்லி கேப்பிடல்ஸ் அணி 27  ரன்கள் வித்தியாசத்தில் படுதோல்வியடைந்தது.

சென்னை சூப்பர் கிங்ஸ் அணி சார்பில் அதிகபட்சமாக மதீஷா பதிரானா 3 விக்கெட்டுகளையும், தீபக் சாஹர் 2 விக்கெட்டுகளையும் கைப்பற்றினர். பேட்டிங், பந்துவீச்சு என இரண்டிலும் சென்னை அணிக்கான தனது பங்களிப்பை சரியாக செய்து கொடுத்த ரவீந்திர ஜடேஜா, போட்டியின் ஆட்டநாயகனாக தேர்வு செய்யப்பட்டார்.

ஆட்டநாயகன் விருது வென்பிறகு பேசிய ஜடேஜா,“ஆடுகளம் சுழற்பந்து வீச்சிற்கு சாதகமாக இருந்தது, இதனால் ஒரு சுழற்பந்து வீச்சாளராக மகிழ்ச்சியுடன் பந்துவீசினேன். நாங்கள் இந்த ஆடுகளத்தில் தான் அதிகமான பயிற்சிகள் மேற்கொண்டிருப்பதால் எங்களுக்கு சரியான லைன் மற்றும் லென்த் என்ன என்பது நன்றாக தெரியும், மற்ற அணிகள் இதை புரிந்து கொள்வதற்கே சிறிது நேரம் தேவைப்படும். இதை நாங்கள் சாதகமாக பயன்படுத்தி கொள்கிறோம். 

ஒவ்வொருவரும் தங்களது பங்களிப்பை சரியாக செய்து வருகின்றனர். நான் பேட்டிங்கின் போது, தோனிக்கு முன்பாக களமிறங்கினால் தோனி, தோனி என்ற ரசிகர்களின் கோசம் மட்டுமே  எனது காதுகளுக்கு கேட்டு கொண்டே இருக்கும். தோனியை பார்ப்பதற்காகவே நான் விரைவாக விக்கெட்டை இழக்க வேண்டும் என ரசிகர்கள் காத்திருக்கின்றனர்” என்று தெரிவித்தார்.