மும்பையில் உள்ள ஷரத் பவார் கிரிக்கெட் அகாடமி மைதானத்தில் நடைபெற்று வரும் 2024-25 ரஞ்சி கோப்பை போட்டியில் மும்பை மற்றும் மேகாலயா அணிகள் பலப்பரீட்சை நடத்தி வருகின்றன. இப்போட்டியில் டாஸ் வென்ற மும்பை அணி முதலில் பந்துவீசுவதாக அறிவித்தது. அதன்படி களமிறங்கிய மேகாலயா அணி மும்பை அணியின் பந்துவீச்சுக்கு ஈடுகொடுக்க முடியாமல் அடுத்தடுத்து விக்கெட்டுகளை இழந்து தடுமாறி வருகிறது.
இந்நிலையில் இப்போட்டியில் அபாரமான பந்துவீச்சை வெளிப்படுத்திய மும்பை அணி வேகப்பந்து வீச்சாளர் ஷர்தூல் தாக்கூர் ஹாட்ரிக் விக்கெட்டுகளை கைப்பற்றி அசத்தினார். அவர் இந்த இன்னிங்ஸில் தனது இரண்டாவது ஓவரில் மேகாலயா அணி வீரர்கள் அனிருத், சுமித் குமார் மற்றும் ஜஸ்கிரத் சிங் ஆகியோரின் விக்கெட்டுகளை கைப்பற்றியதன் மூலம் இந்த ஹாட்ரிக் விக்கெட்டுகளை பதிவுசெய்து அசத்தியுள்ளார்.
இதன்மூலம் 2024–25 ரஞ்சி கோப்பை தொடரில் ஹாட்ரிக் விக்கெட்டுகளை கைப்பற்றிய இரண்டாவது வீரர் எனும் பெருமையையும் ஷர்துல் தாக்கூர் பெற்றுள்ளார். முன்னதாக இந்த சீசனில் புதுச்சேரிக்கு எதிராக இமாச்சலப் பிரதேச அணி வீரர் ரிஷி தவான் ஹாட்ரிக் விக்கெட்டுகளை கைப்பற்றினார். இதுதவிர்த்து ரஞ்சி கோப்பை தொடர் வரலாற்றில் மும்பை அணிக்காக ஹாட்ரிக் விக்கெட்டுகளை கைப்பற்றிய 5ஆவது பந்துவீச்சாளர் எனும் பெருமையும் ஷர்தூல் தாக்கூருக்கு கிடைத்துள்ளது.
ரஞ்சி கோப்பை தொடரில் ஹாட்ரிக் விக்கெட்டுகளை எடுத்த மும்பை வீரர்கள்
- ஜஹாங்கீர் பெஹ்ராம்ஜி கோட் vs பரோடா - 1943/44
- உமேஷ் நாராயண் குல்கர்னி vs குஜராத் - 1963/64
- அப்துல் முசாபாய் இஸ்மாயில் vs சவுராஷ்டிரா - 1973/74
- ராய்ஸ்டன் ஹரோல்ட் டயஸ் vs பீகார் - 2023/24
- ஷர்துல் தாக்கூர் vs மேகாலயா – 2024/25
Also Read: Funding To Save Test Cricket
நடப்பு ரஞ்சி கோப்பை சீசனில் ஷர்துல் தாக்கூரின் செயல்திறன் சிறப்பாக உள்ளது. பேட்டிங்கில், அவர் 7 இன்னிங்ஸ்களில் 42.42 சராசரியுடன் 297 ரன்கள் எடுத்துள்ளார், இதில் ஒரு சதம் மற்றும் இரண்டு அரைசதங்கள் அடங்கும். இது தவிர, அவர் பந்துவீச்சில் 20 விக்கெட்டுகளை வீழ்த்தியுள்ளார். முன்னதாக அவர் இந்திய அணியில் இருந்து நீக்கப்பட்டதுடன், ஐபிஎல் தொடருக்கான வீரர்கள் ஏலத்திலும் எந்த அணிக்காவும் அவர் தேர்வு செய்யப்படவில்லை என்பது குறிப்பிடத்தக்கது.