SL vs BAN, 1st ODI: சதமடித்து அசத்திய அசலங்கா; வங்கதேசத்திற்கு 245 டார்கெட்!

SL vs BAN, 1st ODI: வங்கதேச அணிக்கு எதிரான முதல் ஒருநாள் போட்டியில் இலங்கை பேட்டர்கள் சோபிக்க தவறிய நிலையில் அணியின் கேப்டன் சரித் அசலங்கா சதமடித்து அணியை சரிவிலிருந்து மீட்டெடுத்தார். 

இலங்கையில் சுற்றுப்பயணம் செய்து வரும் வங்கதேச அணியானது தற்சமயம் மூன்று போட்டிகள் கொண்ட ஒருநாள் தொடரில் விளையாடி வருகிறது. இதில் இலங்கை - வங்கதேச அணிகளுக்கு இடையேயான முதல் ஒருநாள் போட்டி கொழும்புவில் இன்று நடைபெற்றது. இப்போட்டியில் டாஸ் வென்ற வங்கதேச அணி முதலில் பந்துவீசுவதாக அறிவிக்க, இலங்கை அணி தரப்பில் பதும் நிஷங்கா மற்றும் நிஷான் மதுஷ்கா இணை தொடக்கம் கொடுத்தனர். இதில் பெரிதும் எதிர்பார்க்கப்பட்ட நிஷங்கா ரன்கள் ஏதுமின்றியும், நிஷான் மதுஷ்கா 6 ரன்னிலும் என விக்கெட்டுகளை இழந்தனர். 

அவர்களைத் தொடர்ந்து களமிறங்கிய கமிந்து மெண்டிஸும் ரன்கள் ஏதுமின்றி ஆட்டமிழந்தார். பின்னர் ஜோடி சேர்ந்த குசால் மெண்டிஸ் மற்றும் கேப்டன் சரித் அசலங்கா இணை விக்கெட் இழப்பை தடுத்ததுடன் சிறப்பான ஆட்டத்தை வெளிப்படுத்தி அணியின் ஸ்கோரையும் உயர்த்தினர். இதில் இருவரும் இணைந்து 60 ரன்கள் பார்ட்னர்ஷிப் அமைத்த நிலையில், குசால் மெண்டிஸ் 6 பவுண்டரி, ஒரு சிக்ஸர் என 45 ரன்களில் ஆட்டமிழந்து அரைசதம் அடிக்கும் வாய்ப்பை தவறவிட்டார். அதன்பின் களமிறங்கிய ஜனித் லியானகே 29 ரன்னிலும், மிலன் ரத்னயகே மற்றும் வநிந்து ஹசரங்கா ஆகியோர் தலா 22 ரன்னிலும் என விக்கெட்டுகளை இழந்தனர். 

Also Read: LIVE Cricket Score

ஒருபக்கம் விக்கெட்டுகள் சரிந்தாலும் மறுமுனையில் அபார ஆட்டத்தை வெளிப்படுத்திய சரித் அசலங்கா சர்வதேச ஒருநாள் கிரிக்கெட்டில் தனது 5ஆவது சதத்தைப் பதிவுசெய்து அசத்தினார். அதன்பின் 6 பவுண்டரி, 4 சிக்ஸர்கள் என 106 ரன்களைச் சேர்த்த நிலையில் சரித் அசலங்கா விக்கெட்டை இழக்க அடுத்து களமிறங்கிய வீரர்களும் சோபிக்க தவறினர். இதனால் இலங்கை அணி 49.2 ஓவர்களில் அனைத்து விக்கெட்டுகளையும் இழந்து 244 ரன்களுக்கு ஆல் அவுட்டானது. வங்கதேச அணி தரப்பில் தஸ்கின் அஹ்மத் 4 விக்கெட்டுகளையும், தன்ஸிம் ஹசன் 3 விக்கெட்டுகளையும் கைப்பற்றினர்.