ஆஸ்திரேலியா அணி தற்சமயம் இலங்கையில் சுற்றுப்பயணம் மேற்கொண்டு 2 போட்டிகளைக் கொண்ட டெஸ்ட் மற்றும் ஒருநாள் தொடரில் விளையாடி வருகிறது. இதில் இரு அணிகளுக்கும் இடையே நடைபெற்று முடிந்த இரண்டு போட்டிகள் கொண்ட டெஸ்ட் தொடரில் ஆஸ்திரேலிய அணி இரண்டு போட்டிகளிலும் வெற்றிபெற்று 2-0 என்ற கணக்கில் டெஸ்ட் தொடரை கைப்பற்றி அசத்தியுள்ளது.
இதனையடுத்து இலங்கை - ஆஸ்திரேலிய அணிகளுக்கு இடையேயான ஒருநாள் தொடரின் முதல் போட்டி நாளை (பிப்ரவரி 12) கொழும்புவில் உள்ள ஆர் பிரேமதாசா கிரிக்கெட் மைதானத்தில் நடைபெறவுள்ளது. இதில் ஆஸ்திரேலிய அணி ஏற்கெனவே டெஸ்ட் தொடர வென்ற கையோடு இத்தொடரை எதிர்கொள்ளவுள்ளது. அதேசமயம் இலங்கை அணியும் ஒருநாள் போட்டிகளில் சிறப்பான ஆட்டத்தை வெளிப்படுத்தி வருகிறது.
மேற்கொண்டு சாம்பியன்ஸ் கோப்பை தொடருக்கு முன் ஆஸ்திரேலிய அணி பங்கேற்கும் கடைசி ஒருநாள் தொடர் இது என்பதால் இப்போட்டியின் மீதான எதிர்பார்ப்புகள் அதிகரித்துள்ளன. இந்நிலையில் இத்தொடருக்கு முன்னதாக ஆஸ்திரேலிய அணியின் நட்சத்திர வீரர்கள் பாட் கம்மின்ஸ், ஜோஷ் ஜேசில்வுட், மிட்செல் மார்ஷ் மற்றும் மார்கஸ் ஸ்டொய்னிஸ் உள்ளிட்டோர் தொடரில் இருந்து விலகிய நிலையில், ஸ்டீவ் ஸ்மித் அணியின் கேப்டனாக செயல்படவுள்ளார்.
மேற்கொண்டு அவர்களுக்கு மாற்றாக ஜேக் பிரேசர் மெக்குர்க், ஸ்பென்ஸர் ஜான்சன், கூப்பர் கன்னொலி மற்றும் பென் துவார்ஷூயிஸ் உள்ளிட்டோர் இடம்பிடித்துள்ளனர். இதனால் ஆஸ்திரேலிய அணியின் பிளேயிங் லெவனில் எந்தெந்த வீரர்களுக்கு வாய்ப்பு வழங்கப்படும் என்ற எதிர்பார்ப்புகள் அதிகரித்துள்ளனர். இந்நிலையில் ஆஸ்திரேலிய அணியின் பிளேயிங் லெவன் குறித்து அணியின் கேப்டன் ஸ்டீவ் ஸ்மித் தனது கருத்தை தெரிவித்துள்ளார்.
இதுகுறித்து பேசிய அவர், “எங்கள் அணியின் பிளேயிங் லெவன் என்ன என்பது இன்னும் முழுமையாகத் தெரியவில்லை. அதனால் நாளை எங்கள் அணியின் பிளேயிங் லெவன் என்னவாக இருக்கும் என்பது குறித்து ஆலோசனை மேற்கொள்வோம். ஏனெனில் டெஸ்ட் தொடரிலிருந்து இன்னும் சிலர் ஓய்வெடுத்துக் கொண்டிருக்கிறார்கள். இங்கே இருக்கும் சில வீரர்கள் பிக் பேஷ் தொடரில் விளையாடி உள்ளதால், அவர்களால் வெள்ளை பந்து கிரிக்கெட்டில் சிறப்பாக விளையாட முடியும் என்று நம்புகிறேன்.
அதேசமயம் டெஸ்ட் கிரிக்கெட் விளையாடி வரும் வீரர்கள் 50 ஓவர் போட்டிகளுக்கு ஏற்றவாறு தங்களை மாற்றிக் கொள்ள வேண்டும். இப்போதெல்லாம் பெரும்பாலான வீரர்கள் மீண்டும் ஆட்டத்தின் வேகத்தை மற்றிக்கொள்வதுடன், அதற்கு ஏற்றவாறான முயற்சியில் இறங்கியுள்ளனர். அதனால் அடுத்த இரண்டு போட்டிகளில் நாங்கள் எங்களின் முழுமையான ஆட்டத்தை வெளிப்படுத்துவோம்” என்று தெரிவித்துள்ளார்.
Also Read: Funding To Save Test Cricket
ஆஸ்திரேலிய ஒருநாள் அணி: சீன் அபோட், அலெக்ஸ் கேரி, கூப்பர் கன்னொலி, பென் துவார்ஷுயிஸ், நாதன் எல்லிஸ், ஜேக் ஃபிரேசர்-மெக்குர்க், ஆரோன் ஹார்டி, டிராவிஸ் ஹெட், ஜோஷ் இங்கிலிஸ், ஸ்பென்சர் ஜான்சன், மார்னஸ் லபுஷாக்னே, கிளென் மேக்ஸ்வெல், தன்வீர் சங்கா, மேத்யூ ஷார்ட், ஸ்டீவ் ஸ்மித், மிட்செல் ஸ்டார்க், ஆடம் ஸாம்பா.