சர்வதேச கிரிக்கெட்டில் சாதனைகளை படைத்த ஸ்மிருதி மந்தனா!

சர்வதேச மகளிர் கிரிக்கெட்டில் 9ஆயிரம் ரன்களைக் கடந்த இரண்டாவது இந்தியர் மற்றும் உலகின் 5ஆவது வீராங்கனை எனும் சாதனையை ஸ்மிருதி மந்தனா படைத்துள்ளார்.

Smriti Mandhana Record: இங்கிலாந்து மகளிர் அணிக்கு எதிரான மூன்றாவது டி20 போட்டியில் அரைசதம் கடந்து அசத்தியதன் மூலம் இந்திய வீராங்கனை ஸ்மிருதி மந்தனா சர்வதேச கிரிக்கெட்டில் சிறப்பு சாதனையை படைத்துள்ளார். 

இங்கிலாந்து - இந்தியா மகளிர் அணிகளுக்கு இடையேயான மூன்றாவது டி20 போட்டி லண்டனில் நேற்று நடைபெற்றது. இப்போட்டியில் டாஸ் வென்று முதலில் பேட்டிங் செய்த இங்கிலாந்து மகளிர் அணி 20 ஓவர்கள் முடிவில் 9 விக்கெட் இழப்பிற்க்கு 171 ரன்கள் எடுத்தது. இதில் அதிகபட்சமாக சோபியா டங்க்லி 75 ரன்னும், டேனியல் வையட் ஹாட்ஜ் 66 ரன்களையும் சேர்த்தனர். இந்தியா சார்பில் அருந்ததி ரெட்டி, தீப்தி சர்மா தலா 3 விக்கெட்டுகளை கைப்பற்றினர்.

இதையடுத்து, 179 ரன்கள் எடுத்தால் வெற்றி என்ற இலக்குடன் களமிறங்கிய இந்திய அணியில் ஷஃபாலி வர்மா 47 ரன்களையும், அரைசதம் கடந்து அசத்திய ஸ்மிருதி மந்தனா 57 ரன்களையும் சேர்த்ததை தவிர்த்து மற்ற வீரர்கள் சோபிக்க தவறினர். இறுதியில், இந்திய அணி 20 ஓவரில் 5 விக்கெட்டுக்கு 166 ரன்கள் மட்டுமே எடுத்தது. இதன்மூலம் இங்கிலாந்து மகளிர் அணி 5 ரன்கள் வித்தியாசத்தில் இந்திய மகளிர் அணியை வீழ்த்தி திரில் வெற்றி பெற்றது. 

இப்போட்டியில் இந்திய அணி தோல்வியைத் தழுவினாலும், ஆரைசதம் கடந்து அசத்திய ஸ்மிருதி மந்தனா சிறப்பு சாதனை படைத்துள்ளார். அதன்படி இப்போட்டியில் அவர் அரைசதம் கடந்ததன் மூலம் சர்வதேச கிரிக்கெட்டில் 9000 ரன்களை எட்டியுள்ளார். மேலும் இந்த எண்ணிக்கையை எட்டிய இரண்டாவது இந்தியர் மற்றும் உலகின் ஐந்தாவது வீராங்கனை என்ற பெருமையையும் அவர் பெற்றுள்ளார். இதற்கு முன், மிதாலி ராஜ், சுசி பேட்ஸ், சார்லோட் எட்வர்ட்ஸ், ஸ்டெஃபனி டெய்லர் மட்டுமே இதைச் செய்துள்ளனர். 

மகளிர் கிரிக்கெட்டில் அதிக சர்வதேச ரன்கள்

• 10868 - மிதாலி ராஜ் (314 இன்னிங்ஸ்)
• 10612 - சுசி பேட்ஸ் (338 இன்னிங்ஸ்)
• 10273 - சார்லோட் எட்வர்ட்ஸ் (316 இன்னிங்ஸ்)
• 9299 - ஸ்டாஃபானி டெய்லர் (286 இன்னிங்ஸ்)
• 9000 - ஸ்மிருதி மந்தனா (259 இன்னிங்ஸ்)
• 8352 - மெக் லானிங் (235 இன்னிங்ஸ்)
• 7733 - ஹர்மன்ப்ரீத் கவுர் (294 இன்னிங்ஸ்)

இதுதவிர்த்து இங்கிலாந்துக்கு எதிரான சர்வதேச டி20 போட்டிகளில் அதிக 50+மேற்பட்ட ரன்கள் எடுத்ததன் அடிப்படையில் ஸ்மிருதி மந்தனா முதல் இடத்தைப் பிடித்துள்ளார். அவர் ஒன்பதாவது முறையாக இங்கிலாந்து அணிக்கு எதிராக ஐம்பது அல்லது அதற்கு மேற்பட்ட ரன்கள் எடுத்து இந்த சாதனையை படைத்துள்ளார். அவருக்கு அடுத்த இடத்தில் ஆஸ்திரேலியாவின் பென் மூனி 8 முறை 50+ ஸ்கோரை பதிவுசெய்து இரண்டாம் இடத்தில் உள்ளார் என்பது குறிப்பிடத்தக்கது.

இங்கிலாந்துக்கு எதிராக அதிக முறை 50+ ரன்கள் எடுத்தவர்கள் (டி20ஐ)

• 9* - ஸ்மிருதி மந்தனா (இந்தியா)
• 8 - பெத் மூனி (ஆஸ்திரேலியா)
• 6 - மெக் லானிங் (ஆஸ்திரேலியா)
• 5 - சோஃபி டிவைன் (நியூசிலாந்து)