காயம் காரணமாக ஐபிஎல் தொடரிலிருந்து விலகினார் யார்க்கர் நடராஜன்!

இந்திய கிரிக்கெட் அணியின் நட்சத்திர வேகப்பந்துவீச்சாளர் தமிழ்நாட்டை சேர்ந்த நடராஜன் தங்கராசு. இவர் நடப்பாண்டு ஐபிஎல் தொடரில் சன்ரைசர்ஸ் ஹைதராபாத் அணிக்காக விளையாடிவருகிறார். 
 
இந்நிலையில் காலில் ஏற்பட்ட காயம் காரணமாக நடராஜன் கடந்த இரண்டு போட்டிகளாக ஹைதராபாத் அணியில் இடம்பெறாமல் இருந்து வந்தார். இந்நிலையில் அவரது காயம் தீவிரமடைந்ததன் காரணமாக, நடப்பாண்டு ஐபிஎல் தொடரிலிருந்து நடராஜன் விலகியுள்ளதாக தகவல் வெளியாகியுள்ளது. 
 
இத்தகவலை தனியார் விளையாட்டு தொலைக்காட்சி வர்ணனையாளர்கள் உறுதி செய்துள்ளனர். இதனால் சன்ரைசர்ஸ் ஹைதராபாத் அணி மேலும் இக்கட்டான சூழலிற்கு தள்ளப்பட்டுள்ளது.
 
முன்னதாக கடந்தாண்டு ஐபிஎல் தொடரில் அதிக யார்க்கர்களை வீசி அனைவரது கவனத்தையும் ஈர்த்த நடராஜன், ஆஸ்திரேலிய அணிக்கெதிரான டெஸ்ட், டி20 , ஒருநாள் ஆகிய தொடர்களிலும் அறிமுகமாகி அசத்தினார் என்பது குறிப்பிடத்தக்கது.