ரிக்கி பாண்டிங்கின் கேப்டன்ஷி சாதனையை சமன்செய்த ஸ்டீவ் ஸ்மித்!

இலங்கை - ஆஸ்திரேலிய அணிகளுக்கு இடையேயான இரண்டாவது டெஸ்ட் போட்டி கலே கிரிக்கெட் மைதானத்தில் நடைபெற்று வருகிறது. இப்போட்டியில் டாஸை இழந்து முதலில் பேட்டிங் செய்த இலங்கை அணி முதல் இன்னிங்ஸில் 257 ரன்களைச் சேர்த்தது. அந்த அணியில் அதிகபட்சமாக குசால் மெண்டிஸ் 85 ரன்களையும், தினேஷ் சண்டிமால் 74 ரன்களையும் சேர்த்தனர். ஆஸ்திரேலிய தரப்பில் ஸ்டார்க், லையன், குஹ்னெமன் ஆகியோர் 3 விக்கெட்டுகளை கைப்பற்றினர். 

இதையடுத்து முதல் இன்னிங்ஸைத் தொடங்கிய ஆஸ்திரேலிய அணியில் கேப்டன் ஸ்டீவ் ஸ்மித் மற்றும் அலெக்ஸ் கேரி இருவரும் சதமடித்து அசத்தினர், இதில் ஸ்மித் 131 ரன்களையும், அலெக்ஸ் கேரி 156 ரன்களையும் சேர்த்தனர். இதன்மூலம் ஆஸ்திரேலிய அணி முதல் இன்னிங்ஸில் 414 ரன்களைக் குவித்தது. இலங்கை அணி தரப்பில் பிரபாத் ஜெயசூர்யா 5 விக்கெட்டுகளை கைப்பற்றினார். இதன்மூலம் ஆஸ்திரேலிய அணி முதல் இன்னிங்ஸில் 157 ரன்கள் முன்னிலைப் பெற்றது.

பின்னர் இரண்டாவது இன்னிங்ஸைத் தொடங்கிய இலங்கை அணியில் ஏஞ்சலோ மேத்யூஸ் மற்றும் குசால் மெண்டிஸ் அரைசதம் கடந்ததை தவிர்த்து மற்ற வீரர்கள் சோபிக்க தவறிய காரணத்தால் அந்த அணி இரண்டாவது இன்னிங்ஸில் 231 ரன்களை மட்டுமே எடுத்து ஆல் அவுட்டானது. இதில் அதிகபட்சமாக ஏஞ்சலோ மேத்யூஸ் 76 ரன்களையும், குசால் மெண்டிஸ் 50 ரன்களையும் சேர்த்தனர். ஆஸ்திரேலிய தரப்பில் லையன், குஹ்னெமன் தலா 4 விக்கெட்டுகளை வீழ்த்தினர். 

இதனால் ஆஸ்திரேலிய அணிக்கு 75 ரன்கள் என்ற எளிய இலக்கை இலங்கை அணி நிர்ணயித்திருந்தது. பின்னர் இலக்கை நோக்கி விளையாடிய ஆஸ்திரேலிய அணி 17.4 ஓவர்களிலேயே இலக்கை எட்டியதுடன் 9 விக்கெட் வித்தியாசத்தில் இலங்கையை வீழ்த்தி டெஸ்ட் தொடரை 2-0 என்ற கணக்கில் கைப்பற்றியது. மேலும் இப்போட்டியில் ஆட்டநாயகன் விருதை அலெக்ஸ் கேரியும், தொடர் நாயகன் விருதை ஸ்டீவ் ஸ்மித்தும் கைப்பற்றினர். 

இந்நிலையில் இத்தொடரில் ஆஸ்திரேலிய அணியின் கேப்டனாக செயல்பட்ட ஸ்டீவ் ஸ்மித் அந்த அணியின் முன்னாள் ஜாம்பவான் ரிக்கி பாண்டிங்கின் சாதனையை சமன்செய்துள்ளார். முன்னதாக ஆசியாவில் ஆஸ்திரேலிய அணியின் கேப்டனாக செயல்பட்டு அதிக தொடர்களை வென்ற வீரர்கள் பட்டியலில் ரிக்கி பாண்டிங் 5 தொடர்களை வென்று முதலிடத்தில் இருந்தார். 

Also Read: Funding To Save Test Cricket

அந்தவகையில் தற்சமயம் ஸ்டீவ் ஸ்மித் தலைமையிலான ஆஸ்திரேலிய அணி இலங்கை டெஸ்ட் தொடரை கைப்பற்றியதன் மூலம், ஆசியாவில் ஸ்டீவ் ஸ்மித் கேப்டனாக தனது 5ஆவது தொடரை கைப்பற்றியதுடன் ரிக்கி பாண்டிங்கின் சாதனையை சமன்செய்து அசத்தியுள்ளார். முன்னதாக அவர் இப்போட்டியில் சதமடித்ததன் மூலம் சர்வதேச டெஸ்ட் கிரிக்கெட்டில் தனது 36ஆவது சதத்தைப் பதிவுசெய்திருந்தார் என்பதும் குறிப்பிடத்தக்கது.