IND vs SA: காயம் காரணமாக தொடரிலிருந்து விலகுகிறார் தீபக் சஹார்?

ஆஸ்திரேலியாவில் நடைபெறும் டி20 உலகக்கோப்பை தொடருக்கான இந்திய அணியில் நட்சத்திர வேகப்பந்துவீச்சாளர் பும்ரா காயம் காரணமாக விலகிய நிலையில், அவருக்கு மாற்று வீரர் யார் என்பது குறித்து இந்திய அணி நிர்வாகம் ஆலோசித்து வருகிறது. சமீபகாலமாக தீபக் சஹார் பந்துவீச்சில் சிறப்பாக செயல்பட்டு வருகிறார். தென் ஆப்பிரிக்காவுக்கு எதிராக தீபக் சஹார் பேட்டிங் மற்றும் பந்துவீச்சு என இரண்டிலும் கலக்கினார்.

இதனால் தீபக் சஹாரை அணியில் கொண்டு வர வேண்டும் என பல்வேறு கிரிக்கெட் விமர்சகர்களும் வலியுறுத்தினர். இந்த நிலையில் தென் ஆப்பிரிக்காவுக்கு எதிரான ஒரு நாள் தொடரில் தீபச் சஹார், ஆவேஸ் கான், முகமது சிராஜ் என மூன்று வீரர்களும் இடம் பெற்றனர். இதில் யார் சிறப்பாக செயல்படுகிறார்களோ அவர்களுக்கு பும்ராவின் இடம் கிடைக்கும் என எதிர்பார்க்கப்பட்டது.

ஆனால் முதல் ஒருநாள் போட்டியில் தீபக் சஹார் இடம் பெறவில்லை. தொடர்ந்து டி20 போட்டி விளையாடி வருவதால் தீபக் சஹாருக்கு ஓய்வு வழங்கப்பட்டு இருக்கலாம் என நினைக்கப்பட்டது. ஆனால் பயிற்சியில் ஈடுபடும் போது தீபக் சஹார் காலில் காயம் ஏற்பட்டிருக்கிறது. 

இதனால் தீபக் சஹார் முதல் ஒருநாள் போட்டியில் பங்கேற்கவில்லை. தீபக் சஹார் இந்திய அணியை காப்பாற்றுவார் என எதிர்பார்த்த ரசிகர்களுக்கு இந்த செய்தி இடியாக வந்து இறங்கியுள்ளது. எனினும் இது குறித்து கருத்து தெரிவித்துள்ள இந்திய அணி நிர்வாகம், தீபக் சஹாருக்கு ஏற்பட்டிருக்கிற காயம் அபாயகரமானது அல்ல என்று தெரிவித்துள்ளது. தீபக் சஹார் உடைய காயம் குணமடைய சில நாட்கள் ஆகலாம்.

இதனால் தென் ஆப்பிரிக்காவுக்கு எதிரான எஞ்சிய ஒரு நாள் போட்டிகளில் அவர் பங்கேற்க மாட்டார் என்று தெரிவிக்கப்பட்டுள்ளது. இதனால் டி20 உலக கோப்பை போட்டியில் தீபாக் சஹார் பங்கேற்பதில் எந்த சிரமமும் இருக்காது என்று நம்பப்படுகிறது. அதேசமயம் முகேஷ் சௌத்ரி மற்றும் சேத்தன் சக்காரியா ஆகியோர் வலைப்பந்து பந்துவீச்சாளர்களாக இந்திய அணியில் இணையவுள்ளனர்.

இந்த நிலையில் முகமது ஷமி தான் மாற்று வீரராக அறிவிக்கப்பட்ட 99 சதவீதம் வாய்ப்பு இருப்பதாக பிசிசிஐ வட்டார தகவல் தெரிவிக்கின்றன. தீபக் சஹார் ஒரு மாற்று வீரராக தான் ஆஸ்திரேலியா செல்ல இருக்கிறார்.