தி ஹண்ட்ரெட்: பட்லர், ரஸ்ஸல் காட்டடி; மான்செஸ்டர் அசத்தல் வெற்றி!

இங்கிலாந்தில் நடைபெற்றுவரும் தி ஹண்ட்ரெட் கிரிக்கெட் தொடர் விறுவிறுப்பாக நடைபெற்று வருகிறது. இதில் நேற்று நடைபெற்ற லீக் ஆட்டத்தில் மான்செஸ்டர் ஒரிஜினல்ஸ் - சதர்ன் பிரேவ் அணிகள் பலப்பரீட்சை நடத்தின.

இப்போட்டியில் முதலில் பேட்டிங் செய்த மான்செஸ்டர் அணிக்கு கேப்டன் ஜோஸ் பட்லர் - பிலீப் சால்ட் இணை அதிரடியான தொடக்கத்தைக் கொடுத்தனர். இதில் 22 பந்துகளில் 38 ரன்களைச் சேர்த்த பிலீப் சால்ட் ஆட்டமிழந்து வெளியேற, அதன்பின் களமிறங்கிய மேட்சனும் 9 ரன்களில் விக்கெட்டை இழந்தார்.

அதன்பின் ஜோடி சேர்ந்த ஜோஸ் பட்லர் - ஆண்ட்ரே ரஸ்ஸல் இணை அதிரடியான ஆட்டத்தை வெளிப்படுத்தியதுடன், அரைசதமும் கடந்து அசத்தினர். இதில் பட்லர் 68 ரன்களில் ஆட்டமிழக்க, இறுதிவரை விக்கெட் இழக்காமல் 64 ரன்களைச் சேர்த்தார். இதன்மூலம் 100 பந்துகள் முடிவில் மான்செஸ்டர் ஒரிஜினல்ஸ் அணி 3 விக்கெட் இழப்பிற்கு 188 ரன்களைச் சேர்த்தது. 

இதையடுத்து கடின இலக்கை துரத்திய சதர்ன் பிரேவ் அணிக்கு டி காக் - ஜேம்ஸ் வின்ஸ் இணை சிறப்பான தொடக்கத்தைக் கொடுத்தனர். இதில் டி காக் 21 ரன்களிலும், ஜேம்ஸ் வின்ஸ் 20 ரன்களிலும் ஆட்டமிழந்தனர்.

இதையடுத்து களமிறங்கிய மார்கஸ் ஸ்டோய்னிஸ், அலெக்ஸ் டேவிஸ், டிம் டேவிட், ஜார்ஜ் கார்டன் என நட்சத்திர வீரர்கள் சொற்ப ரன்களுக்கு ஆட்டமிழந்து பெவிலியன் திரும்ப, பின்னர் களமிறங்கிய வீரர்களும் சொதப்பினர்.

இதனால் 84 பந்துகளிலேயே சதர்ன் பிரேவ் அணி அனைத்து விக்கெட்டுகளையும் இழந்து 120 ரன்களை மட்டுமே சேர்த்தது. இதன்மூலம் மான்செஸ்டர் ஒரிஜினல்ஸ் அணி 68 ரன்கள் வித்தியாசத்தில் சதர்ன் பிரேவ் அணியை வீழ்த்தி அபார வெற்றியைப் பதிவுசெய்தது.