டிஎன்பிஎல் 2021: திருப்பூர் தமிழன்ஸை பந்தாடியது திண்டுக்கல் டிராகன்ஸ்!

டிஎன்பிஎல் தொடரில் இன்று நடைபெற்ற 25ஆவது லீக் ஆட்டத்தில் திருப்பூர் தமிழன்ஸ் - திண்டுக்கல் டிராகன்ஸ் அணிகள் பலப்பரீட்சை நடத்தின. இதில் டாஸ் வென்ற திண்டுக்கல் அணி முதலில் பந்துவீச முடிவு செய்தது.

அதன்படி களமிறங்கிய திருப்பூர் அணியில் தினேஷ், முகமது ஆஷிக் ஆகியோர் ஒரு ரன்னில் ஆட்டமிழந்து பெவிலியன் திரும்பினர். இதையடுத்து ஜோடி சேர்ந்த சித்தார்த் - மான் பாஃப்னா இணை அதிரடியாக விளையாட தொடங்கியது. 

இதில் சித்தார்த் 36 ரன்களில் ஆட்டமிழக்க, மறுமுனையிலிருந்த மான் பாஃப்னா அரைசதம் கடந்து அசத்தினார். பின் அவரும் 52 ரன்களில் ஆட்டமிழக்க, 20 ஓவர்கள் முடிவில் திருப்பூர் அணி 7 விக்கெட்டுகளை இழந்து 145 ரன்களை மட்டுமே சேர்த்தது. 

இதையடுத்து வெற்றி இலக்கை நோக்கி களமிறங்கிய திண்டுக்கல் அணிக்கு ஹரி நிஷாந்த் சிறப்பான தொடக்கத்தைக் கொடுத்தார். பின்னர் களமிறங்கிய விவேக் அதிரடியாக விளையாடி அரைசதம் கடந்தது மட்டுமின்றி அணியை வெற்றிக்கும் அழைத்து சென்றார்.

இதன் மூலம் திண்டுக்கல் டிராகன்ஸ் அணி 6 விக்கெட் வித்தியாசத்தில் திருப்பூர் தமிழன்ஸ் அணியை வீழ்த்தி அபார வெற்றியைப் பதிவுசெய்தது.