அடுத்தடுத்து சிக்ஸர்களை விளாசிய சினெல்லே ஹென்றி - காணொளி!

மகளிர் பிரீமியர் லீக் தொடரில் நேற்று நடைபெற்ற 6ஆவது லீக் போட்டியில் யுபி வாரியர்ஸ் மற்றும் டெல்லி கேப்பிட்டல்ஸ் அணிகள் பலப்பரீட்சை நடத்தின. வதோதராவில் நடைபெற்ற இப்போட்டியில் டாஸை இழந்து முதலில் பேட்டிங் செய்த யுபி வாரியர்ஸ் அணிக்கு கிரண் நவ்கிரே அதிரடியான ஆட்டத்தை வெளிப்படுத்தி அசத்தியதுடன் அரைசதம் கடந்து அசத்தினார். அதன்பின் 51 ரன்களில் நவ்கிரே தனது விக்கெட்டை இழந்தார். 

அவரைத்தொடர்ந்து களமிறங்கிய வீராங்கனைகளில் ஸ்வேதா செஹ்ராவத் 37 ரன்களையும், சினெல்லே ஹென்றி 33 ரன்களையும் சேர்த்ததன் மூலம், 20 ஓவர்கள் முடிவில் யுபி வாரியர்ஸ் அணி 7 விக்கெட் இழப்பிற்கு 168 ரன்களைச் சேர்த்தது. இதனையடுத்து இலக்கை நோக்கி விளையாடிய டெல்லி கேப்பிட்டல்ஸ் அணிக்கு ஷஃபாலி வர்மா மற்றும் கேப்டன் மெக் லெனிங் இணை அதிரடியான தொடக்கத்தைக் கொடுத்து அணிக்கு தேவையான அடித்தளத்தை அமைத்துக் கொடுத்தனர். 

இதில் ஷஃபாலி வர்மா 26 ரன்களில் விக்கெட்டை இழக்க, மறுபக்கம் மெக் லெனிங் அரைசதம் கடந்து அசத்திய நிலையில் 69 ரன்களில் ஆட்டமிழந்தார். அதன்பின் களமிறங்கிய அனபெல் சதர்லேண்ட் 4 பவுண்டரிகளுடன் 41 ரன்களையும், மரிஸான் கேப் 4 பவுண்டரிகளுடன் 29 ரன்களையும் சேர்த்து அணிக்கு வெற்றியைத் தேடிக்கொடுத்தனர். இதன்மூலம் டெல்லி கேப்பிட்டல்ஸ் அணி 19.5 ஓவர்களில் இலக்கை எட்டியதுடன் 7 விக்கெட் வித்தியாசத்தில் யுபி வாரியர்ஸ் அணியை வீழ்த்தியது. 

இந்நிலையில் இப்போட்டியில் யுபி வாரியர்ஸ் அணிக்காக அறிமுக வீராங்கனையாக களமிறங்கிய சினெல்லே ஹென்றி பேட்டிங்கில் அதிரடியாக விளையாடியது அந்த அணி ரசிகர்களை மகிழ்ச்சியில் ஆழ்த்தியது. அதிலும் குறிப்பாக ஷிகா பாண்டே வீசிய இன்னிங்ஸின் 17ஆவது ஓவரை எதிர்கொண்ட சினெல்லே ஹென்றி ஓவரின் மூன்றாவது மற்றும் நான்காவது பந்துகளில் அடுத்தடுத்து இரண்டு சிக்ஸர்களை பறக்கவிட்டு அசத்தினார். 

Also Read: Funding To Save Test Cricket

அச்சமத்தில் யுபி வாரியர்ஸ் அணி 5 விக்கெட் இழப்பிற்கு 128 ரன்களை மட்டுமே எடுத்து தடுமாறிய நிலையில், சினெல்லே ஹென்றியின் இந்த அதிரடியான ஆட்டம் அணியின் ஸ்கோரை உயர்த்த உதவியாக இருந்தது. மேலும் இப்போட்டியில் இறுதிவரை ஆட்டமிழக்காமல் இருந்த அவர் 15 பந்துகளில் 3 பவுண்டரி, 3 சிக்ஸர்கள் என 33 ரன்களைச் சேர்த்தார். இந்நிலையில் அறிமுக போட்டியில் அதிரடியாக விளையாடிய சினெல்லே ஹென்றியின் காணொளி இணையத்தில் வைரலாகி வருகிறது.