பிபிஎல் 2024-25: இரண்டாக உடைந்த பேட்; காயத்தில் இருந்து தப்பிய வார்னர் - காணொளி!

14ஆவது சீசன் பிக் பேஷ் லீக் தொடர் விறுவிறுப்பாக நடைபெற்று வரும் நிலையில், இன்று நடைபெற்ற 29ஆவது லீக் ஆட்டத்தில் ஹோபர்ட் ஹரிகேன்ஸ் மற்றும் சிட்னி தண்டர் அணிகள் பலப்பரீட்சை நடத்தின. ஹோபர்ட்டில் நடைபெற்ற இப்போட்டியில் டாஸை இழந்து முதலில் பேட்டிங் செய்த சிட்னி தண்டர் அணியில் கேப்டன் டேவிட் வார்னரைத் தவிர்த்து மற்ற வீரர்கள் எதிரணி பந்துவீச்சுக்கு ஈடுகொடுக்க முடியாமல் விக்கெட்டுகளை இழந்தனர். 

இப்போட்டியில் அபார ஆட்டத்தை வெளிப்படுத்திய டேவிட் வார்னர் அரைசதம் கடந்து அசத்தியதுடன், இறுதிவரை ஆட்டமிழக்காமல் 88 ரன்களைச் சேர்த்தார். இதன்மூலம் சிட்னி தண்டர் அணி 20 ஓவர்கள் முடிவில் 6 விக்கெட்டுகளை இழந்து 164 ரன்களைச் சேர்த்தது. ஹோபர்ட் அணி தரப்பில் ரைலீ மெரிடித் 2 விக்கெட்டுகளை கைப்பற்றினார். அதன்பின் இலக்கை நோக்கி விளையாடிய ஹோபர்ட் அணிக்கு மிட்செல் ஓவன் - மேத்யூ வேட் இணை தொடக்கம் கொடுத்தனர்.

இதில் இருவரும் 13 ரன்களை எடுத்திருந்த நிலையில் விக்கெட்டுகளை இழக்க, அடுத்து களமிறங்கிய வீரர்களும் சோபிக்க தவறினர். பின்னர் ஜோடி சேர்ந்த் நிகில் சௌத்ரீ மற்றும் டிம் டேவிட் இணை பொறுப்பான ஆட்டத்தை வெளிப்படுத்தி அணியை சரிவிலிருந்து மீட்டெடுத்தனர். இதில் டிம் டேவிட் தனது அரைசதத்தைப் பதிவுசெய்து அசத்தயதுடன், இறுதிவரை ஆட்டமிழக்காமல் 4 பவுண்டரி, 6 சிக்ஸர்கள் என 68 ரன்களை குவித்து அணிக்கு வெற்றியைத் தேடிக்கொடுத்தார்.

இதன்மூலம் ஹோபர்ட் ஹரிகேன்ஸ் அணி 16.5 ஓவர்களில் இலக்கை எட்டியதுடன் 6 விக்கெட்டுகள் வித்தியாசத்தில் சிட்னி தண்டர் அணியை வீழ்த்தி அசத்தல் வெற்றியைப் பதிவுசெய்தது. இப்போட்டியின் வெற்றிக்கு காரணமாக இருந்த டிம் டேவிட் ஆட்டநாயகன் விருதை வென்றார். இந்நிலையில் இப்போட்டியின் போது சிட்னி தண்டர் அணி கேப்டன் டேவிட் வார்னரின் பேட் இரண்டாக உடைந்த சம்பவம் பரபரப்பை ஏற்படுத்தியது. 

டேவிட் வார்னருடனான இந்த முழு சம்பவமும் சிட்னி தண்டரின் இன்னிங்ஸின் நான்காவது ஓவரில் நடந்தது. அந்தவகையில் ரைலீ மெரிடித் வீசிய அந்த ஓவரின் முதல் பந்தை எதிர்கொண்ட் டேவிட் வார்னர் மிட்-ஆஃப் நோக்கி ஒரு பவுண்டரி அடிக்கும் முயற்சியில் விளையாடினார். அப்போது பந்து அவரது பேட்டில் பட்தும், பேட்டின் கைப்பிடி உடைந்து வார்னரின் தலையை நேரடியாக தாக்கியதால் அதனை கண்ட ரசிகர்கள் அதிச்சியடைந்தனர்.

Also Read: Funding To Save Test Cricket

இருப்பினும் அதனால் அவருக்கு பெரிய காயம் ஏதும் ஏற்படாமல் அதிர்ஷவசமாக காயத்தில் இருந்து தப்பினார். இருப்பினும் மருத்துவ குழுவினர் களத்திற்கு வந்த வார்னரை பரிசோதித்த பின்னர் மீண்டும் அவரை விளையாடுவதற்காக அனுமதித்தனர். அதன்பின் சிறப்பாக விளையாடிய வார்னர் அரைசதம் கடந்ததுடன் இறுதிவரை ஆட்டமிழக்காமல் 88 ரன்களைச் சேர்த்தார். இந்நிலையில் டேவிட் வார்னரின் பேட் உடைந்த காணொளி ரசிகர்கள் மத்தியில் வைரலாகி வருகிறது.