பிராண்டன் கிங்ஸை க்ளீன் போல்டாக்கிய ‘பராசக்தி எக்ஸ்பிரஸ்’ இம்ரான் தாஹிர் - காணொளி!

எஸ்ஏ20 லீக் தொடரில் நேற்று நடைபெற்ற 8ஆவது லீக் ஆட்டத்தில் டர்பன் சூப்பர் ஜெயண்ட்ஸ் மற்றும் ஜோபர்க் சூப்பர் கிங்ஸ் அணிகள் பலப்பரீட்சை நடத்தின. டர்பனில் உள்ள கிங்ஸ்மீத் கிரிக்கெட் மைதானத்தில் நடைபெற்ற இப்போட்டியில் டாஸ் வென்ற ஜோபர்க் சூப்பர் கிங்ஸ் அணி முதலில் பேட்டிங் செய்வதாக அறிவித்தது.

அதன்படி களமிறங்கிய ஜோபர்க் அணியில் கேப்டன் ஃபாஃப் டூ பிளெசில் ஒரு ரன்னிலும், டெவான் கான்வே 22 ரன்னிலும் விக்கெட்டை இழந்தார். அதன்பின் களமிறங்கிய லியுஸ் டு ப்ளூய் பொறுப்பான ஆட்டத்தை வெளிப்படுத்தி 38 ரன்களைச் சேர்த்த நிலையில், அடுத்து களமிறங்கிய வீரர்களில் ஜானி பேர்ஸ்டோவ் 26 ரன்களையும், டொனோவன் ஃபெரீரா 26 ரன்களையும் சேர்த்து தங்கள் விக்கெட்டுகளை இழந்தனர்.

இறுதியில் ஜெரால்ட் கோட்ஸி அடுத்தடுத்து சிக்ஸர்களை பறக்கவிட்டு அணிக்கு ஃபினிஷிங்கைக் கொடுத்தார். இதன்மூலம் ஜோபர்க் சூப்பர் கிங்ஸ் அணி 20 ஓவர்கள் முடிவில் 7 விக்கெட்டுகள் இழப்பிற்கு 169 ரன்களைச் சேர்த்தது. அதன்பின் இலக்கை நோக்கி விளையாடிய குயின்டன் டி காக் அரைசதம் கடந்து அசத்தியதுடன் 55 ரன்களையும், ஹென்ரிச் கிளாசென் 29 ரன்களையும் சேர்த்து விக்கெட்டுகளை இழந்தனர். 

அதேசமயம் மற்ற வீரர்கள் அனைவரும் அடுத்தடுத்து சொற்ப ரன்களில் விக்கெட்டை இழக்க,  சூப்பர் ஜெயண்ட்ஸ் அணி 18 ஓவர்களில் அனைத்து விக்கெட்டுகளையும் இழந்து 141 ரன்களை மட்டுமே சேர்த்தது. இதன்மூலம் ஜோபர்க் சூப்பர் கிங்ஸ் அணி 28 ரன்கள் வித்தியாசத்தில் பிரிட்டோரியா கேப்பிட்டல்ஸ் அணியை வீழ்த்தி வெற்றிபெற்றது. இப்போட்டியில் அரைசதம் கடந்த குயின்டன் டி காக் ஆட்டநாயகன் விருதை வென்றார்.

இந்நிலையில் இப்போட்டியில் ஜோபர்க் சூப்பர் கிங்ஸ் அணிக்காக விளையாடிய மூத்த வீரர் இம்ரான் தாஹிர் தனது அசத்தலான பந்துவீச்சின் மூலம் சூப்பர் ஜெயண்ட்ஸ் வீரர் பிராண்டன் கிங்கை க்ளீன் போல்டாக்கி அசத்தினார். மேலும் அவர் விக்கெட் வீழ்த்திய மகிழ்ச்சியில் மைதானத்தை வேகமாக ஓடி வட்டமடித்தார். இதனை கண்ட ரசிகர்கள் ‘பராசக்தி எக்ஸ்பிரஸ்’ மீண்டும் களமிறங்கிவிட்டது என சமூக வலைதளங்களில் பாராட்டி வருகின்றனர். 

Also Read: Funding To Save Test Cricket

முன்னதாக தென் ஆப்பிரிக்க அணியின் முன்னாள் வீரர் இம்ரான் தாஹிர் ஐபிஎல் தொடரின் சென்னை சூப்பர் கிங்ஸ் அணிக்காக விளையாடினார். அப்போது அவர் விக்கெட்டுகளை வீழ்த்தி முடித்ததும் அதனை கொண்டாடும் விதமாக மைதானத்தை சுற்றி ஓடுவார். இதனை பார்த்த ரசிகர்கள் அவரை ‘பராசக்தி எக்ஸ்பிரஸ்’ என செல்லமாக அழைத்தனர். இந்நிலையில் தற்போதும் இம்ரான் தாஹிர் அதேபோல் கொண்டாடிய காணொளியானது இணையத்தில் வைரலாகி வருகிறது