AUS vs WI: டெஸ்ட் தொடருக்கான வெஸ்ட் இண்டிஸ் அணி அறிவிப்பு; அறிமுக வீரர்களுக்கு வாய்ப்பு!
வெஸ்ட் இண்டீஸ் அணி வருகின்ற அடுத்தாண்டு ஜனவரி ஆஸ்திரேலியா சுற்றுப்பயணம் மேற்கொள்ளவுள்ளது. வெஸ்ட் இண்டீஸ் அணியின் இந்தச் சுற்றுப் பயணத்தில் இரண்டு போட்டிகள் கொண்ட டெஸ்ட், தலா மூன்று போட்டிகள் கொண்ட ஒரு நாள் கிரிக்கெட் மற்றும் டி20 தொடர்களில் விளையாடுகிறது.
முதலில் இரண்டு போட்டிகள் கொண்ட டெஸ்ட் தொடர் நடைபெறுகிறது. இந்நிலையில் இத்தொடருக்கான வெஸ்ட் இண்டீஸ் அணி அறிவிக்கப்பட்டுள்ளது. இந்த டெஸ்ட் தொடருக்கான வெஸ்ட் இண்டீஸ் அணியில் இருந்து ஜேசன் ஹோல்டர் மற்றும் கைய்ல் மேயர்ஸ் போன்ற முன்னணி வீரர்கள் விலகிக் கொண்டிருக்கிறார்கள்.
இதன் காரணமாக ஆஸ்திரேலிய செல்வதற்கு தேவையான முன்னணி வீரர்கள் வெஸ்ட் இண்டீஸ் அணி நிர்வாகத்துக்கு கிடைக்கவில்லை. அதே சமயத்தில் சுற்றுப்பயணத்தை விட்டுத் தரமுடியாது. எனவே கிரேக் பிராத்வைட் தலைமையில் ஏழு இளம் அறிமுக வீரர்களை உள்ளடக்கிய அணியை வெஸ்ட் இண்டீஸ் தேர்வுக் குழு அறிவித்திருக்கிறது.
இதில் ஸச்சரி மெக்காஸ்கி, விக்கெட் கீப்பர் டெவின் இம்லாச், ஆல்ரவுண்டர்கள் ஜஸ்டின் கிரீவ்ஸ், கவேம் ஹாட்ஜ் மற்றும் கெவின் சின்க்ளேர், அத்துடன் வேகப்பந்து வீச்சாளர்கள் அகீம் ஜோர்டான் மற்றும் ஷமர் ஜோசப் என புதிய ஏழு வீரர்கள் இடம் பெற்றிருக்கிறார்கள்.
இதுகுறித்து தேர்வுக்குழு தலைவர் டெஸ்ட்மண்ட் ஹெய்ன்ஸ் கூறுகையில் “சில முன்னணி வீரர்கள் கிடைக்காததால் தற்பொழுது சிக்கலான நிலைமை இருக்கிறது. கடந்த ஆண்டிலிருந்து நாங்கள் டெஸ்ட் கிரிக்கெட்டுக்கு சிறப்பான திட்டங்களை தீட்டி செயல்படுத்தி வருகிறோம். மேலும் வெஸ்ட் இண்டீஸ் முழுக்க நிறைய திறமைகள் வெளிப்பட்டுக் கொண்டிருக்கிறது.
நாங்கள் தேர்ந்தெடுத்துள்ள வீரர்கள் ஒவ்வொரு கட்டத்திலும் தங்களுடைய திறமைகளை வெளிப்படுத்தி இருக்கிறார்கள். இப்போது அவர்களுக்கு டெஸ்ட் அரங்கில் தங்கள் திறமையை வெளிப்படுத்த ஒரு வாய்ப்பு கொடுக்கப்பட வேண்டும். ஆஸ்திரேலியா எப்பொழுதும் சவாலாகத்தான் இருக்கும். ஆனால் நாங்கள் எங்கள் அணி மீது நம்பிக்கை வைத்திருக்கிறோம்” என்று கூறியுள்ளார்.
வெஸ்ட் இண்டீஸ் டெஸ்ட் அணி: கிரேக் பிராத்வைட் (கே), அல்ஸாரி ஜோசப், டாகெனரைன் சந்தர்பால், கிர்க் மெக்கென்சி, அலிக் அதானாஸ், கவேம் ஹாட்ஜ், ஜஸ்டின் க்ரீவ்ஸ், ஜோசுவா டாசில்வா, அகீம் ஜோர்டான், குடாகேஷ் மோட்டி, கெமர் ரோச், கெவின் சின்க்ளேர், டெவின் இம்லாச், ஷமர் ஜோசப், ஸச்சரி மெக்காஸ்கி.