WI vs ENG, 4th T20I: மொயீன் அலி அதிரடி; தொடரை சமன் செய்தது இங்கிலாந்து!

வெஸ்ட்இண்டீஸ்- இங்கிலாந்து அணிகள் மோதிய 4ஆவது டி20 போட்டி பார்போடாசில் இன்று நடந்தது. டாஸ் வென்ற வெஸ்ட் இண்டீஸ் முதலில் பந்து வீச்சை தேர்வு செய்தது.

அதன்படி, முதலில் பேட்டிங் செய்த இங்கிலாந்து அணி நிர்ணயிக்கப்பட்ட 20 ஓவர்களில் 6 விக்கெட் இழப்புக்கு 193 ரன் குவித்தது. கேப்டன் மொயீன் அலி அதிரடியாக விளையாடி 28 பந்தில் 63 ரன்னும், ஜேசன் ராய் 52 ரன்னும், ஜேம்ஸ் வின்ஸ் 34 ரன்னும் எடுத்தனர். 

வெஸ்ட் இண்டீஸ் சார்பில் ஜெசன் ஹோல்டர் 3 விக்கெட் வீழ்த்தினார். இதையடுத்து, 194 ரன்கள் எடுத்தால் வெற்றி என்ற இலக்குடன் வெஸ்ட் இண்டீஸ் அணி களமிறங்கியது. 

ஆனால் நிர்ணயிக்கப்பட்ட 20 ஓவரில் வெஸ்ட் இண்டீஸ் 5 விக்கெட் இழப்புக்கு 159 ரன்கள் மட்டுமே எடுத்தது. இதனால் இங்கிலாந்து அணி 34 ரன்னில் வெற்றி பெற்றது.

அந்த அணியில் அதிகபட்சமாக கைல் மேயர்ஸ் 40 ரன்னும், ஹோல்டர் 36 ரன்னும் எடுத்தனர். இங்கிலாந்து அணி தரப்பில் மொயீன் அலி 2 விக்கெட்டுகளைக் கப்பற்றினார். 

இந்த வெற்றியின் மூலம் 5 போட்டி கொண்ட டி20 தொடரில் இரு அணிகளும் 2-2 என சமனிலையில் உள்ளது. வெற்றியாளரை நிர்ணயிக்கும் கடைசி போட்டி இன்று நடைபெறுகிறது.