WI vs IND, 4th T20I: ரோஹித், பந்த் அதிரடி; விண்டீஸுக்கு 192 டார்கெட்!

வெஸ்ட் இண்டீஸ் - இந்தியா அணிகளுக்கு இடையேயான 5 போட்டிகள் கொண்ட டி20 தொடர் நடைபெற்று வருகிறது. முதல் 3 போட்டிகள் முடிவடைந்த நிலையில் 2-1 என்ற கணக்கில் இந்திய அணி முன்னிலை வகுக்கிறது.

இதில் இரு அணிகளுக்கும் இடையேயான 4ஆவது டி20 போட்டி அமெரிக்காவிலுள்ள ப்ளோரிடாவில் இன்று தொடங்கியது. இப்போட்டியில் டாஸ் வென்ற வெஸ்ட் இண்டீஸ் அணி முதலில் பந்துவீச தீர்மானித்தது. 

அதன்படி களமிறங்கிய இந்திய அணிக்கு கேப்டன் ரோஹித் சர்மா - சூர்யகுமார் யாதவ் இணை அதிரடியான தொடக்கத்தைக் கொடுத்தனர். இதில் அரைசதம் அடிப்பார் என எதிர்பார்க்கப்பட்ட ரோஹித் சர்மா 33 ரன்களிலும், சூர்யகுமார் யாதவ் 24 ரன்களில் ஆட்டமிழந்தனர்.

பின்னர் களமிறங்கிய தீபக் ஹூடாவும் 21 ரன்களுக்கு நடையைக் கட்டினார். அதன்பின் ஜோடி சேர்ந்த ரிஷப் பந்த் - சஞ்சு சாம்சன் இணை அதிரடியாக விளையாடி அணியின் ஸ்கோரை மளமளவென உயர்த்தினர். 

இதில் 31 பந்துகளில் 44 ரன்களைச் சேர்த்திருந்த ரிஷப் பந்த் ஆட்டமிழந்து அரைசதம் அடிக்கும் வாய்ப்பை தவறவிட்டார். பின்னர் பெரிதும் எதிர்பார்க்கப்பட்ட தினேஷ் கார்த்திக்கும் 6 ரன்களோடு நடையைக் கட்டினார். 

இறுதியில் அக்ஸர் படேல் தனது பங்கிற்கு இரண்டு சிக்சர் ஒரு பவுண்டரி என பறக்கவிட, 20 ஓவர்கள் முடிவில் இந்திய அணியும் 5 விக்கெட் இழப்பிற்கு 191 ரன்களைச் சேர்த்தது. இதில் இறுதிவரை ஆட்டமிழக்காமல் இருந்த சஞ்சு சாம்சன் 29 ரன்களையும், அக்ஸர் படேல் 20 ரன்களையும் சேர்த்தனர்.