உலகக்கோப்பை 2023: நியூசிலாந்து அணியில் கேன் வில்லியம்சன்; ரசிகர்கள் உற்சாகம்!

உலகக் கோப்பை தொடர் தொடங்க இன்னும் ஒரு சில வாரங்களே உள்ளன. உலகக் கோப்பையில் பங்கேற்கும் 15 பேர் அடங்கிய அணியை அனைத்து அணி நிர்வாகமும் வருகிற செப்டம்பர் 5 ஆம் தேதிக்குள் ஒப்படைக்க வேண்டும். அப்படி ஒப்படைக்கும் அணி வீரர்கள் விவரத்தை அணி நிர்வாகம் செப்டம்பர் 27 ஆம் தேதி வரை மாற்றம் செய்து கொள்ளலாம். 

நியூசிலாந்து அணியின் நட்சத்திர வீரர்களில் ஒருவர் கேன் வில்லியம்சன். இந்த ஆண்டு ஐபிஎல் போட்டியின் முதல் ஆட்டத்தில் குஜராத் அணியில் விளையாடிய கேன் வில்லியம்சனுக்கு காலில் காயம் ஏற்பட்டது. இதனால் அவர் ஐபிஎல் தொடரிலிருந்து விலகினார். அதன்பின் அறுவை சிகிச்சை மேற்கொண்டார். ஐபிஎல் தொடர் மட்டுமல்லாது நியூசிலாந்துக்காகவும் அவரால் விளையாட முடியாத சூழல் உருவானது. காயத்திலிருந்து குணமடைந்து வரும் கேன் வில்லியம்சன் உலகக் கோப்பை தொடரில் இடம் பெறுவாரா என்ற கேள்வி எழுந்தது.

மேலும், காயத்திலிருந்து குணமடைந்து வரும் கேன் வில்லியம்சனுக்கு உலகக் கோப்பை  தொடரில் கலந்து கொள்வதற்காக நியூசிலாந்து அணி நிர்வாகம் இரண்டு வாரம் அவகாசம் கொடுத்திருந்தது. இந்நிலையில் இந்தியாவில் நடைபெறும் ஒருநாள் உலகக்கோப்பை கிரிக்கெட் தொடருக்கான நியூசிலாந்து அணியில் கேப்டன் கேன் வில்லியம்சன் இடம்பெறுவார் என அந்த அணியின் தலைமை பயிற்சியாளர் கேரி ஸ்டெட் கூறியுள்ளார். 

இதுகுறித்து பேசிய கேரி ஸ்டெட், கேன் வில்லியம்சன் தனது காயத்திலிருந்து மீள தீவிரமாக செயல்பட்டுவருகிறார். அவருக்கு எங்களுடைய மருத்துவ வள்ளுநர் குழுவும் உதவிசெய்து வருகின்றனர். இதனால் அவர் மீண்டும் கிரிக்கெட் விளையாடுவதில் எந்த சிரமமும் இருக்காது. அவரை உலகக்கோப்பை தொடருக்கான நியூசிலாந்து அணியில் தேர்ந்தெடுப்பதில் மிகவும் மகிழ்ச்சியளிக்கிறது. 

அதற்காக அவர் தயாராக கால அவகாசம் வைத்துள்ளார். அதனால் அவரை விரைவாக திரும்பி வர கட்டாயப்படுத்த நாங்கள் விரும்பவில்லை. நாங்கள் ஏற்கனவே கூறியது போல், அவர் நீண்ட காலத்திற்கு நியூசிலாந்துக்காக கிரிக்கெட் விளையாட விரும்புவது மிகவும் நல்லது. ஏனெனில் உலகக் கோப்பை ஒரு குறுகிய போட்டி அல்ல, முதல் போட்டிக்கு முன்னதாக அடுத்த மாதம் அவரது முன்னேற்றத்தை தொடர்ந்து கண்காணிப்போம்” என்று தெரிவித்துள்ளார்.