WIW vs BANW, 3rd ODI: வங்கதேசத்தை வீழ்த்தி தொடரை வென்றது வெஸ்ட் இண்டீஸ்!
வங்கதேச மகளிர் அணி வெஸ்ட் இண்டீஸில் சுற்றுப்பயணம் செய்து மூன்று போட்டிகள் கொண்ட ஒருநாள் மற்றும் டி20 தொடர்களில் விளையாடி வருகிறது. இதில் இரு அணிகளுக்கு இடையேயான மூன்று போட்டிகள் கொண்ட ஒருநாள் தொடரில் நடந்து முடிந்த முதலிரண்டு போட்டிகளின் முடிவில் இரு அணிகளும் தலா ஒருவெற்றியைப் பதிவுசெய்து 1-1 என்ற கணக்கில் தொடரை சமன்செய்திருந்தன.
இந்நிலையில் ஒருநாள் தொடரின் வெற்றியாளரைத் தீர்மானிக்கும் மூன்றாவது மற்றும் கடைசி ஒருநாள் போட்டி இன்று செயின்ட் கிட்ஸில் நடைபெற்றது. இப்போட்டியில் டாஸ் வென்ற வங்கதேச அணி பேட்டிங் செய்தாவது அறிவித்து களமிறங்கியது. இதையடுத்து களமிறங்கிய அந்த அணியில் முர்ஷிதா கதும் ஒரு ரன்னில் ஆட்டமிழந்தார். அதன்பின் இணைந்த ஃபர்ஹானா - ஷர்மின் அக்தர் இணை பொறுப்புடன் விளையாடி அணியின் ஸ்கோரை உயர்த்தும் முயற்சியில் இறங்கினர். இதில் ஃபர்ஹானா 22 ரன்னிலும், ஷர்மின் அக்தர் 37 ரன்னிலும் என விக்கெட்டை இழந்தனர்.
அதன்பின் களமிறங்கிய வீராங்கனைகளில் கேப்டன் நிகர் சுல்தானா 11 ரன்னிலும், சோபனா மோஸ்ட்ரி 25 ரன்னிலும் என விக்கெட்டை இழக்க, அடுத்து களமிறங்கிய வீராங்கனைகளாலும் எதிரணி பந்துவீச்சுக்கு ஈடுகொடுக்க முடியாமல் விக்கெட்டுகளை இழந்தனர். இதனால் வங்கதேச மகளிர் அணி 43.5 ஓவர்களில் அனைத்து விக்கெட்டுகளையும் இழந்து 118 ரன்களுக்கு ஆல் அவுட்டானது. வெஸ்ட் இண்டீஸ் மகளிர் அணி தரப்பில் அபாரமான பந்துவீச்சை வெளிப்படுத்திய கரிஷ்மா ராம்ஹாராக் 4 விக்கெட்டுகளை கைப்பற்றினார்.
இதனையடுத்து இலக்கை நோக்கி களமிறங்கிய வெஸ்ட் இண்டீஸ் மகளிர் அணிக்கு கேப்டன் ஹீலி மேத்யூஸ் - கியானா ஜோசப் இணை சிறப்பான தொடக்கத்தைக் கொடுத்தனர். இருவரும் இணைந்து முதல் விக்கெட்டிற்கு 45 ரன்கள் பார்ட்னர்ஷிப் அமைத்திருந்த நிலையில், கேப்டன் ஹீலி மேத்யூஸ் 22 ரன்களில் ஆட்டமிழந்தார். அவரைத்தொடர்ந்து மற்றொரு தொடக்க வீராங்கனை கியானா ஜோசபும் 39 ரன்களுக்கு விக்கெட்டை இழந்தார். அதன்பின் ஜோடி சேர்ந்த ஷமைன் காம்பெல் மற்றும் டியாண்டிரா டோட்டின் இணை சிறப்பான ஆட்டத்தை வெளிப்படுத்தி அணியை இலக்கை நோக்கி அழைத்துச் சென்றனர்.
Also Read: Funding To Save Test Cricket
இப்போட்டியில் இறுதிவரை ஆட்டமிழக்காமல் இருந்த ஷமைன் காம்பெல் 25 ரன்களையும், டியாண்டிரா டோட்டின் 4 பவுண்டரி, 2 சிக்ஸர்கள் என 33 ரன்களைச் சேர்த்து அணிக்கு வெற்றியைத் தேடிக்கொடுத்தனர். இதன்மூலம் வெஸ்ட் இண்டீஸ் மகளிர் அணி 27.3 ஓவர்களிலேயே இலக்கை எட்டியதுடன் 8 விக்கெட் வித்தியாசத்தில் வங்கதேச மகளிர் அணியை வீழ்த்தி வெற்றிபெற்றது. இந்த வெற்றியின் மூலம் மூன்று போட்டிகள் கொண்ட ஒருநாள் தொடரை வெஸ்ட் இண்டீஸ் மகளிர் அணி 2-1 என்ற கணக்கிலும் கைப்பற்றி அசத்தியுள்ளது குறிப்பிடத்தக்கது.