டி20 உலக கோப்பைக்கு முன்பாக ஆஸ்திரேலியா மற்றும் இங்கிலாந்து அணிகளுக்கு இடையே ஆஸ்திரேலியாவில் நடந்துவருகிறது. டி20 உலக கோப்பைக்கு இந்த தொடர் அந்த 2 அணிகளுக்கும் மிகச்சிறந்த முன் தயாரிப்பாக இருக்கும். பாகிஸ்தானை அதன் சொந்த மண்ணில் வீழ்த்தி, அதே உற்சாகத்துடனும் உத்வேகத்துடனும் ஆஸ்திரேலியாவிற்கு வந்துள்ளது இங்கிலாந்து அணி.
ஆஸ்திரேலியா - இங்கிலாந்து இடையேயான முதல் டி20 போட்டி இன்று பெர்த்தில் நடந்தது. இந்த போட்டியில் டாஸ் வென்ற ஆஸ்திரேலிய கேப்டன் ஆரோன் ஃபின்ச் ஃபீல்டிங்கை தேர்வு செய்தார்.
அதன்படி முதலில் பேட்டிங் செய்த இங்கிலாந்து அணியின் தொடக்க வீரர்கள் ஜோஸ் பட்லர் மற்றும் அலெக்ஸ் ஹேல்ஸ் ஆகிய இருவரும் இணைந்து அதிரடியாக அடித்து விளையாடி வேகமாக ஸ்கோர் செய்தனர். பட்லர் - அலெக்ஸ் ஹேல்ஸ் இருவருமே அரைசதம் அடித்து, அபாரமான தொடக்கத்தை அமைத்து கொடுத்தனர்.
முதல் விக்கெட்டுக்கு 11.2 ஓவரில் 132 ரன்களை குவித்தனர். அதிரடியாக ஆடி அரைசதம் அடித்த பட்லர் 32 பந்தில் 8 பவுண்டரிகள் மற்றும் 4 சிக்ஸர்களுடன் 68 ரன்களை குவித்து ஆட்டமிழந்தார். அதன்பின்னர், ஒருமுனையில் பென் ஸ்டோக்ஸ் 9, ஹாரி ப்ரூக் 12 , மொயின் அலி 10, சாம் கரன் 2 என மிடில் ஆர்டர் வீரர்கள் மளமளவென ஆட்டமிழக்க, மறுமுனையில் அடித்து ஆடிய அலெக்ஸ் ஹேல்ஸ் 51 பந்தில் 84 ரன்கள் அடித்து சதத்தை தவறவிட்டு ஆட்டமிழந்தார்.
இதனால் 20 ஓவர்கள் முடிவில் இங்கிலாந்து அணி 6 விக்கெட் இழப்பிற்கு 208 ரன்களைச் சேர்த்தது. ஆஸ்திரேலிய அணி தரப்பில் சிறப்பாக பந்துவீசிய நாதன் எல்லின் 3 விக்கெட்டுகளைக் கைப்பற்றி அசத்தினார்.
இதையடுத்து 209 ரன்கள் என்ற கடின இலக்கை விரட்டிய ஆஸ்திரேலிய அணியின் தொடக்க வீரர் கேமரூன் க்ரீன் ஒரு ரன்னில் ஆட்டமிழக்க, 3ஆம் வரிசையில் இறங்கிய மிட்செல் மார்ஷ் அடித்து விளையாடி 26 பந்தில் 36 ரன்கள் அடித்தார். அவரைத் தொடர்ந்து களமிறங்கிய கேப்டன் ஆரோன் ஃபின்ச் 12 ரன்களுக்கு ஆட்டமிழந்தார்.
ஒருமுனையில் விக்கெட்டுகள் விழுந்தாலும், கடந்த போட்டியை போலவே இந்த போட்டியில் நிலைத்து நின்று அடித்து ஆடிய தொடக்க வீரர் டேவிட் வார்னர் அரைசதம் அடித்தார். 4ஆவது விக்கெட்டுக்கு அவருடன் ஜோடி சேர்ந்த மார்கஸ் ஸ்டோய்னிஸ் 15 பந்தில் 2 பவுண்டரிகள் மற்றும் 3 சிக்ஸர்களுடன் 35 ரன்களை விளாசினார். ஆனால் அவரது அதிரடி பேட்டிங்கை இன்னும் சற்று நேரம் தொடராமல் ஆட்டமிழந்தார்.
அதிரடியாக விளையாடி அரைசதம் அடித்து ஆஸ்திரேலிய அணியை வெற்றியை நோக்கி அழைத்துச்சென்ற நிலையில், 44 பந்தில் 73 ரன்களை குவித்த வார்னரும் 17ஆவது ஓவரில் ஆட்டமிழந்தார். அதன்பின்னர் மேத்யூ வேட் 15 பந்தில் 21 ரன்கள் அடித்து கடைசி ஓவரின் 3ஆவது பந்தில் ஆட்டமிழக்க, 20 ஓவரில் 200 ரன்கல் அடித்த ஆஸ்திரேலிய அணி, 8 ரன் வித்தியாசத்தில் தோல்வியை தழுவியது.
டி20 உலக கோப்பை நடக்கும் ஆஸ்திரேலிய மண்ணில், ஆஸ்திரேலியாவிற்கு எதிரான இந்த டி20 வெற்றி இங்கிலாந்துக்கு மிகுந்த உத்வேகத்தையும் உற்சாகத்தையும் நம்பிக்கையையும் அளிக்கும்.