உலக டெஸ்ட் சாம்பியன்ஷிப் 2025: இரண்டாம் இடத்திற்கு முன்னேறியது ஆஸ்திரேலியா!

பாட் கம்மின்ஸ் தலைமையிலான ஆஸ்திரேலிய அணி நியூசிலாந்தில் சுற்றுப்பயணம் மேற்கொண்டு 2 போட்டிகள் கொண்ட டெஸ்ட் தொடரில் விளையாடியது. இத்தொடரின் முதல் போட்டியில் ஆஸ்திரேலிய அணி அபார வெற்றியைப் பதிவுசெய்து அசத்தியது.இதையடுத்து இரு அணிகளுக்கும் இடையேயான இரண்டாவது டெஸ்ட் போட்டி கிறிஸ்ட்சர்ச்சில் இன்று முடிவடைந்தது.

இப்போட்டியிலும் அபாரமாக செயல்பட்ட ஆஸ்திரேலிய அணியானது 3 விக்கெட் வித்தியாசத்தில் நியூசிலாந்து அணியை வீழ்த்தி வெற்றிபெற்றதுடன், டெஸ்ட் தொடரை 2-0 என்ற கணக்கில் முழுமையாக கைப்பற்றி அசத்தியுள்ளது. இந்த வெற்றியின் மூலம் தற்போது ஆஸ்திரேலிய அணி உலக டெஸ்ட் சாம்பியன்ஷிப் புள்ளிப்பட்டியலில் நியூசிலாந்தை பின்னுக்கு தள்ளி இரண்டாம் இடத்திற்கு முன்னேறி அசத்தியுள்ளது. 

முன்னதாக புள்ளிப்பட்டியலின் முதலிடத்தில் நியூசிலாந்து அணி கடந்த வாரம் இருந்தது. ஆனால் இங்கிலாந்து அணிக்கு எதிரான 5 போட்டிகள் கொண்ட டெஸ்ட் தொடரில் இந்திய அணி 4-1 என்ற கணக்கில் வெற்றிபெற்றதன் மூலம், உலக டெஸ்ட் சாம்பியன்ஷிப் புள்ளிப்பட்டியலில் முதலிடத்தைப் பிடித்து அசத்தியது. இந்நிலையில் தான் நியூசிலாந்து அணி ஆஸ்திரேலிய அணிக்கு எதிரான டெஸ்ட் தொடரிலும் தோல்வியைத் தழுவியுள்ளது. 

இதன்மூலம் உலக டெஸ்ட் சாம்பியன்ஷிப் புள்ளிப்பட்டியலில் இந்திய அணி 68.52 சதவீதத்துடன் முதல் இடத்தையும், ஆஸ்திரேலிய அணி 62.50 சதவீதத்துடன் இரண்டாம் இடத்தையும் பிடித்துள்ளது. கடந்த வாரம் இப்பட்டியலில் முதலிடத்தில் இருந்த நியூசிலாந்து அணியானது அடுத்தடுத்த தோல்விகளைச் சந்தித்ததன் மூலம் 50 சதவீத புள்ளிகளுடன் மூன்றாம் இடத்திற்கு தள்ளப்பட்டுள்ளது. 

மேலும் இப்பட்டியலில் வங்கதேச அணி 50 சதவீத புள்ளிகளுடன் நான்காம் இடத்திலும், பாகிஸ்தான் அணி 36.66 சதவீதத்துடன் 5ஆவது இடத்திலும், வெஸ்ட் இண்டீஸ் அணி 33.33 சதவீதத்துடன் 6ஆவது இடத்தையும் பிடித்துள்ளனர். இதைத்தொடர்ந்து தென் ஆப்பிரிக்கா, இங்கிலாந்து மற்றும் இலங்கை அணிகள் அடுத்தடுத்த இடங்களில் நீடித்து வருகின்றன. இதன்மூலம் இந்தியா மற்றும் ஆஸ்திரேலிய அணிகள் புள்ளிப்பட்டியலின் முதல் இரண்டு இடங்களில் வலிமையாக தொடர்ந்து வருகின்றன.