இந்தியாவுக்காக விளையாடும்போது நீங்கள் எப்போதும் அழுத்தத்தில் இருப்பீர்கள் : ரோஹித் சர்மா

இந்திய கிரிக்கெட் அணி, தற்போது ‘கேப்டன்ஸி சர்ச்சையில்’ சிக்கித் தள்ளாடி வருகிறது. ஒருநாள் கேப்டன் பொறுப்பில் இருந்து விராட் கோலி, எந்த வித முன் அறிவிப்புமின்றி நீக்கப்பட்டது தான் சர்ச்சைகளை ஆரம்பித்து வைத்தன. அவருக்கு பதிலாக இனி டி20 மற்றும் ஒருநாள் ஃபார்மட்டுகளுக்கு ரோஹித் சர்மா, கேப்டனாக செயல்பட உள்ளார்.

புதிதாக கேப்டன் பொறுப்பை ஏற்றுள்ள ரோஹித் சர்மா பிசிசிஐ டிவி-க்காக கொடுத்த பேட்டியை பிசிசிஐ தனது ட்விட்டர் பக்கத்தில் வெளியிட்டுள்ளது. 

அதில் பேசிய ரோஹித், “இந்திய கிரிக்கெட் அணி விளையாடப் போகிறோம் என்றாலே அதற்கு உண்டான அழுத்தம் நிச்சயம் அதிகமாக இருக்கும். அதிகப்படியான நபர்கள் இது குறித்துப் பேசிக் கொண்டேதான் இருப்பார்கள். நேர்மறையாகவும் பேசுவார்கள் அல்லது எதிர்மறையாகவும் பேசுவார்கள். என்னைப் பொறுத்த வரையில் ஒரு கிரிக்கெட் வீரராக எனது வேளையில் மட்டும் கவனம் செலுத்த வேண்டும் என விரும்புகிறேன்.

என்னைச் சுற்றி இருப்பவர்கள் என்ன பேசுகிறார்கள் என்பதில் என்னால் கவனம் செலுத்த முடியாது. ஏனென்றால் அது கட்டுப்படுத்த முடியாது விஷயம். நான் லட்சம் முறை சொல்லிவிட்டேன். இனியும் இதைத் தொடர்ந்து சொல்வேன். மற்றவர்கள் பேசுவதை ஒண்ணும் செய்ய முடியாது. இது எனது அணிக்காகவும் சொல்லிக்கொள்கிறேன். ஒரு பெரிய அணிக்காக பெரிய, உயர் ரக ஆட்டத்தில் விளையாடும் போது சுற்றிலும் எல்லாரும் பேசத்தான் செய்வார்கள்.

நாம் தான் நமக்கு முக்கியமானதில் மட்டும் கவனம் செலுத்த வேண்டும். என் அணியினர் நிச்சயமாக நன்றாக விளையாட வேண்டும். போட்டிகளில் வெற்ற பெற வேண்டும் என்பதில் மட்டும் கவனம் செலுத்த வேண்டும். வெளிப்பேச்சுகள் எல்லாம் அர்த்தமற்றது. நம்மைப் பற்றி நாம் என்ன நினைக்கிறோம் என்பதே முக்கியம். இதுதான் நாம் சாதிக்க விரும்பும் லட்சியத்தை அடைய உதவும்” என்று தெரிவித்துள்ளார்.