ஆண் குழந்தைக்கு தந்தையானார் யுவராஜ் சிங்!

இந்தியாவின் முன்னாள் கிரிக்கெட் வீரர் யுவராஜ் சிங் மற்றும் நடிகை ஹேசல் கீச் ஆகியோருக்கு 2016ஆம் ஆண்டு நவம்பர் 30ஆம் தேதி திருமணம் நடைபெற்றது. இந்நிலையில் நேற்று அவர்களுக்கு ஆண் குழந்தை பிறந்தது.

இதுகுறித்து தனது இன்ஸ்டாகிராம் பக்கத்தில் யுவராஜ் சிங் பதிவிட்டுள்ளதாவது, “கடவுள் எங்களுக்கு ஒரு ஆண் குழந்தையை ஆசிர்வதித்திருக்கிறார். இந்த நற்செய்தியை எங்கள் ரசிகர்கள், குடும்பத்தினர் மற்றும் நண்பர்கள் அனைவருக்கும் பகிர்ந்து கொள்வதில் மகிழ்ச்சியடைகிறோம். 

கடவுளுக்கு நன்றி கூறுகிறோம். இந்த குழந்தையை வரவேற்கும் அதேவேளையில் எங்கள் தனியுரிமையையும் மதிக்க விரும்புகிறோம்” என்று தெரிவித்துள்ளார். 

இதையடுத்து யுவராஜ் சிங்கிற்கும் அவரது மனைவி ஹேசல் கீச்சிற்கும் கிரிக்கெட் பிரபலங்கள், ரசிகர்கள் என பல்வேறு தரவினரும் தங்களது வாழ்த்துக்களை தெரிவித்து வருகின்றனர்.

இந்திய அணிக்காக கடந்த 2000ஆம் ஆண்டு முதல் விளையாடிய யுவராஜ் சிங் கடந்த 2019ஆம் ஆண்டு அனைத்து விதமான கிரிக்கெட் போட்டிகளிலிருந்து ஓய்வு பெறுவதாக அறிவித்தார். மேலும் இந்திய அணிக்காக 12ஆயிரத்திற்கு அதிகமான சர்வதேச ரன்களையும் குவித்துள்ளார் என்பது குறிப்பிடத்தக்கது.