அயர்லாந்து அணி தற்போது ஜிம்பாப்வேவில் சுற்றுப்பயணம் மேற்கொண்டு மூன்று வடிவிலான கிரிக்கெட் தொடரிலும் விளையாடி வருகிறது. இதில் தற்போது இரு அணிகளுக்கும் இடையே ஒருநாள் தொடரானது நடைபெற்று வருகிறது. இதில் நேற்று நடந்து முடிந்த முதல் ஒருநாள் போட்டியில் ஜிம்பாப்வே அணி 49 ரன்கள் வித்தியாசத்தில் அபார வெற்றியைப் பதிவுசெய்து தொடரில் முன்னிலைப் பெற்றது.
இதையடுத்து ஜிம்பாப்வே - அயர்லாந்து அணிகளுக்கு இடையேயான தொடரின் வெற்றியாளரைத் தீர்மானிக்கும் இரண்டாவது ஒருநாள் போட்டி இன்று (பிப்ரவரி 16) ஹராரேவில் உள்ள ஹராரே ஸ்போர்ட்ஸ் கிளப் மைதானத்தில் நடைபெற்றது. இப்போட்டியில் டாஸ் வென்ற அயர்லாந்து அணி முதலில் பந்துவீசுவதாக அறிவித்தது. அதன்படி களமிறங்கிய ஜிம்பாப்வே அணிக்கு பிரையன் பென்னட் மற்றும் பென் கரண் இணை தொடக்கம் கொடுத்தனர். இப்போட்டியில் சிறப்பான ஆட்டத்தை வெளிப்படுத்தி வந்த பிரையன் பென்னட் 30 ரன்னில் விக்கெட்டை இழந்தார்.
அவரைத்தொடர்ந்து மற்றொரு தொடக்க வீரர் பென் கரனும் 18 ரன்களில் நடையைக் கட்ட, அடுத்து களமிறங்கிய கேப்டன் கிரெய்க் எர்வினும் 4 ரன்களுடன் ஆட்டமிழந்தார். இதனால் ஜிம்பாப்வே அணி 77 ரன்களில் 3 விக்கெட்டுகளை இழந்து தடுமாறியது. பின்னர் ஜோடி சேர்ந்த வெஸ்லி மதேவரே - சிக்கந்தர் ரஸா இணை பொறுப்புடன் விளையாடி அணியின் ஸ்கோரை மளமளவென உயர்த்தினர். தொடர்ந்து சிறப்பாக விளையாடி வந்த இருவரும் தங்கள் அரைசதங்களை பதிவுசெய்து அசத்தியதுடன், 4ஆவது விக்கெட்டிற்கு 70 ரன்கள் பார்ட்னர்ஷிப் அமைத்தனர்.
பின் 61 ரன்கள் சேர்த்திருந்த நிலையில் மதேவரேவும், 58 ரன்கள் எடுத்திருந்த நிலையில் சிக்கந்தர் ரஸாவும் விக்கெட்டை இழக்க, பின்னர் களமிறங்கிய வீரர்களில் வெலிங்டன் மஸகட்ஸா 35 ரன்களைச் சேர்த்ததை தவிர்த்து மற்ற வீரர்கள் ரன்களைச் சேர்க்க தவறினர். இதனால் ஜிம்பாப்வே அணி 49 ஓவர்களில் அனைத்து விக்கெட்டுகளையும் இழந்து 245 ரன்களுக்கு ஆல் அவுட்டானது. அயர்லாந்து அணி தரப்பில் சிறப்பான பந்துவீச்சை வெளிப்படுத்திய மார்க் அதிர் 4 விக்கெட்டுகளையும், கர்டிஸ் காம்பேர் 3 விக்கெட்டுகளையும் கைப்பற்றி அசத்தினர்.
பின்னர் இலக்கை நோக்கி விளையாடிய அயர்லாந்து அணிக்கு கேப்டன் பால் ஸ்டிர்லிங் - ஆண்ட்ரூ பால்பிர்னி இணை தொடக்கம் கொடுத்தனர். இதில் ஆண்ட்ரூ பால்பிர்னி 11 ரன்களில் தனது விக்கெட்டை இழந்தார். பின்னர் ஜோடி சேர்ந்த ஸ்டிர்லிங் மற்றும் காம்பெர் இணை பொறுப்பான ஆட்டத்தை வெளிப்படுத்தி அணியின் ஸ்கோரை மளமளவென உயர்த்தினர். இப்போட்டியில் இருவரும் இணைந்து சிறப்பாக விளையாடியதுடன் தங்களது அரைசதங்களையும் பதிவுசெய்து, இரண்டாவது விக்கெட்டிற்கு 144 ரன்கள் பார்ட்னர்ஷிப் அமைத்தும் மிரட்டினர்.
அதன்பின் 3 பவுண்டரி, ஒரு சிக்ஸர் என 63 ரன்களைச் சேர்த்த நிலையில் கர்டிஸ் காம்பேர் தனது விக்கெட்டை இழக்க, அவரைத்தொடர்ந்து களமிறங்கிய ஹாரி டெக்டரும் 7 ரன்களுடன் நடையைக் கட்டினார். பின்னர் இப்போட்டியில் சிறப்பான ஆட்டத்தை வெளிப்படுத்தி வந்த அயர்லாந்து அணி கேப்டன் பால் ஸ்டிர்லிங் சதமடிப்பார் என எதிர்பார்க்கப்பட்ட நிலையில் 8 பவுண்டரி, 2 சிக்ஸர்களுடன் 89 ரன்களில் ஆட்டமிழந்தார். இதனையடுத்து ஜோடி சேர்ந்த லோர்கன் டக்கர் மற்றும் ஜார்ஜ் டக்ரேல் இணை பொறுப்புடன் விளையாடி அணியை வெற்றியை நோக்கி அழைத்துச் சென்றனர்.
Also Read: Funding To Save Test Cricket
இதில் இறுதிவரை ஆட்டமிழக்காமல் இருந்த லோர்கன் டக்கர் 5 பவுண்டரிகளுடன் 36 ரன்களையும், ஜார்ஜ் டக்ரேல் 2 பவுண்டரிகளுடன் 20 ரன்களையும் சேர்த்து அணிக்கு வெற்றியைத் தேடிக்கொடுத்தனர். இதன்மூலம் அயர்லாந்து அணி 48.4 ஓவர்களில் இலக்கை எட்டியதுடன் 6 விக்கெட் வித்தியாசத்தில் ஜிம்பாப்வே அணியை வீழ்த்தி வெற்றிபெற்றது. இந்த வெற்றியின் மூலம் அயர்லாந்து அணி 1-1 என்ற கணக்கில் தொடரையும் சமன்செய்துள்ளது. இப்போட்டியில் சிறப்பான ஆட்டத்தை வெளிப்படுத்திய கர்டிஸ் காம்பேர் ஆட்டநாயகன் விருதை வென்றார்.