எங்களுக்கான வாய்ப்புகளைப் பயன்படுத்தி மாற்றத்தை ஏற்படுத்துவோம் - சூர்யகுமார் யாதவ்!

டாஸ் வென்ற பிறகு நாங்கள் காட்டிய உற்சாகம்தான் பந்துவீச்சுக்கு முக்கிய காரணமாக அமைந்தது என இந்திய அணி கேப்டன் சூர்யகுமார் யாதவ் தெரிவித்துள்ளார்.

எங்களுக்கான வாய்ப்புகளைப் பயன்படுத்தி மாற்றத்தை ஏற்படுத்துவோம் - சூர்யகுமார் யாதவ்! (Image Source: Google)

இந்தியா மற்றும் இங்கிலாந்து அணிகளுக்கு இடையேயான முதல் டி20 போட்டி கொல்கத்தாவில் உள்ள ஈடன் கார்டன் மைதானத்தில் நேற்று நடைபெற்றது. இதில் டாஸ் வென்ற இந்திய அணி கேப்டன் சூர்யகுமார் யாதவ் பந்து வீச்சை தேர்வு செய்தார். அதன்படி களமிறங்கிய இங்கிலாந்து அணியில் தொடக்க வீரர்கள் பில் சால்ட் மற்றும் பென் டக்கெட் ஆகியோர் சொற்ப ரன்களுக்கு விக்கெட்டை இழந்து ஏமாற்றமளித்தனர். 

அதன்பின் களமிறங்கிய கேப்டன் ஜோஸ் பட்லர் அரைசதம் கடந்ததுடன் 8 பவுண்டரி, 2 சிக்ஸர்கள் என 68 ரன்களைச் சேர்த்ததை தவிர்த்து மற்ற வீரர்கள் சொற்ப ரன்களில் ஆட்டமிழந்தனர். இதனால் இங்கிலாந்து அணி 20 ஓவர்கள் முடிவில் அனைத்து விக்கெட்டுகளையும் இழந்து 132 ரன்களுக்கு ஆல் அவுட்டானது. இந்திய அணி சார்பில் அர்ஷ்தீப் சிங், ஹர்திக் பாண்ட்யா, அக்சார் படேல் தலா 2 விக்கெட்டும், வருண் சக்ரவர்த்தி 3 விக்கெட்டும் வீழ்த்தினர்.

இதனையடுத்து 133 ரன்கள் எடுத்தால் வெற்றி என்ற இலக்குடன் களமிறங்கிய இந்திய அணிக்கு சஞ்சு சாம்சன் அதிரடியான தொடக்கத்தை வழங்கி 26 ரன்களைச் சேர்த்து விக்கெட்டை இழக்க, அடுத்து களமிறங்கிய கேப்டன் சூர்யகுமார் யாதவ் ரன்கள் ஏதுமின்றி விக்கெட்டை இழந்தார். பின்னர் மற்றொரு தொடக்க வீரரான் அபிஷேக் சர்மா அடுத்தடுத்து சிக்ஸர்களை விளாசியதுடன் 20 பந்துகளில் அரைசதம் கடந்து அணியின் வெற்றியை உறுதிசெய்தார். 

அதன்பின் அபிஷேக் சர்மா 5 பவுண்டரிகள், 8 சிக்ஸர்கள் என 79 ரன்களைச் சேர்த்த நிலையில் விக்கெட்டை இழக்க, திலக் வர்மா 19 ரன்களை எடுத்து அணிக்கு வெற்றியைத் தேடிக்கொடுத்தார். இதன்மூலம் இந்திய அணி 12.5 ஓவர்களிலேயே வெற்றியை இலக்கை எட்டியதுடன் 7 விக்கெட் வித்தியாசத்தில் இங்கிலாந்து அணியை வீழ்த்தி அபார வெற்றியையும் பதிவுசெய்து அசத்தியது. இந்த வெற்றியின் மூலம் இந்திய அணி 1-0 என்ற கணக்கில் இந்த டி20 தொடரில் முன்னிலையும் பெற்றுபெற்றுள்ளது. 

இந்நிலையில் இப்போட்டியின் வெற்றி குறித்து பேசிய இந்திய அணி கேப்டன் சூர்யகுமார் யாதவ், “டாஸ் வென்ற பிறகு நாங்கள் காட்டிய உற்சாகம்தான் பந்துவீச்சுக்கு முக்கிய காரணமாக அமைந்தது. பந்துவீச்சாளர்கள் திட்டங்களை வகுத்து செயல்படுத்தினர், நாங்கள் பேட்டிங் செய்த விதம் சிறப்பாக இருந்தது. தென் ஆப்பிரிக்காவில் நாங்கள் அதையே செய்தோம், கூடுதல் சுழற்பந்து வீச்சாளரை சிறப்பாக விளையாட வைக்கும் வகையில் புதிய பந்தை வீசும் பொறுப்பு ஹார்டிக்கிற்கு இருந்தது.

மேலும் வருன் சக்ரவர்த்தி சிறப்பான ஃபார்மில் உள்ளார். அவருடன் இணைந்து அர்ஷ்தீப் சிங்கும் கூடுதல் பொறுப்பை ஏற்றுக்கொள்கிறார். எங்கள் அணி வீரர்களுக்கு முழு சுதந்திரம் வழங்கப்பட்டுள்ளது. அதனால் நாங்கள் கொஞ்சம் வித்தியாசமாக விளையாட விரும்புகிறோம். ஃபீல்டிங் என்பது நாங்கள் மிகவும் கடினமாக உழைத்து வரும் ஒரு பகுதி. அதனால் எங்களுக்கான வாய்ப்புகளைப் பயன்படுத்தி மாற்றத்தை ஏற்படுத்துவோம்” என்று தெரிவித்துள்ளார். 

Win Big, Make Your Cricket Tales Now