அபுதாபி டி10 லீக்:டேவிட் வஸ் அதிரடியில் இரண்டாவது முறையாக கோப்பையைத் தட்டிச்சென்றது டெக்கான் கிளாடியேட்டர்ஸ்!

நியூயார் ஸ்டிரைக்கர்ஸ் அணிக்கெதிரான அபுதாபி டி10 லீக் இறுதிப்போட்டியில் டெக்கான் கிளாடியேட்டர்ஸ் அணி 37 ரன்கள் வித்தியாசத்தில் வெற்றிபெற்று இரண்டாவது முறையாக சாம்பியன் பட்டத்தை வென்றது.

Abu Dhabi T10: Deccan Gladiators won the final of T10 League 2022 by 37 runs! (Image Source: Google)

டி10 லீக் கிரிக்கெட் தொடரின் 6ஆவது சீசன் இன்றுடன் நிறைவடைகிறெது. இதில் இன்று நடைபெற்ற இறுதிப்போட்டியில் டெக்கான் கிளாடியேட்டர்ஸ் - நியூயார்க் ஸ்டிரைக்கர்ஸ் அணிகள் பலப்பரீட்சை நடத்தின. இப்போட்டியில் டாஸ் வென்ற நியூயார்க் ஸ்டிரைக்கர்ஸ் அணி முதலில் பந்துவீச தீர்மானித்தது.

அதன்படி களமிறங்கிய டெக்கான் கிளாடியேட்டர்ஸ் அணியில் தொடக்க வீரர்கள் சுரேஷ் ரெய்னா 7 ரன்களிலும், கோஹ்லர் 11 ரன்களிலும், ஆண்ட்ரே ரஸ்ஸல் 9 ரன்களில் அடுத்தடுத்து விக்கெட்டுகளை இழந்தனர். 

அதன்பின் ஜோடி சேர்ந்த நிக்கோலஸ் பூரன் - டேவிட் வைஸ் இணை அதிரடியான ஆட்டத்தை வெளிப்படுத்தி அணியின் ஸ்கோரை மளமளவென உயர்த்தினர். இதன்மூலம் 10 ஓவர்கள் முடிவில் டெக்கான் கிளாடியேட்டர்ஸ் அணி 4 விக்கெட்டுகள் இழப்பிற்கு 128 ரன்களைச் சேர்த்தது.

இதில் இறுதிவரை ஆட்டமிழக்காமல் இருந்த டேவிட் வைஸ் 18 பந்துகளில் 43 ரன்களையும், நிக்கோலஸ் பூரன் 40 ரன்களையும் எடுத்தனர். நியூயார்க் அணி தரப்பில் அகீல் ஹொசைன் 2 விக்கெட்டுகளைக் கைப்பற்றினர்.

இதையடுத்து இலக்கை நோக்கி களமிறங்கிய நியூயார்க் அணியில் முகமது வாசீம் முதல் பந்திலேயே ரன் ஏதுமின்றி ஆட்டமிழந்தார். அவரைத் தொடர்ந்து 6 ரன்களில் பால் ஸ்டிர்லிங்கும், ஈயன் மோர்கன் ரன் ஏதுமின்றியும், ஆசாம் கான் 16 ரன்களிலும் ஆட்டமிழந்து பெவிலியனுக்கு நடையைக் கட்டினர்.

அதன்பின் ஜோடி சேர்ந்த ஜோர்டன் தாம்சன் - கீரென் பொல்லார்ட் ஆகியோர் ஓரளவு தாக்குபிடித்து விளையாடினர். ஆனால் 23 ரன்களில் பொல்லார்ட் ஆட்டமிழந்து வெளியேற அடுத்து வந்த ரஷித் கானும் 8 ரன்களோடு வெளியேறினார். 

இதனால் 10 ஓவர்கள் முடிவில் நியூயார்க் ஸ்டிரைக்கர்ஸ் 5 விக்கெட்டுகளை இழந்து 91 ரன்களை மட்டுமே எடுத்தது. டெக்கான் கிளாடியேட்டர்ஸ் அணி தரப்பில் ஜோஷுவா லிட்டில், முகமது ஹொஸ்னைன் தலா 2 விக்கெட்டுகளைக் கைப்பற்றினர். 

இதன்மூலம் டெக்கான் கிளாடியேட்டர்ஸ் அணி 37 ரன்கள் வித்தியாசத்தில் நியூயார்க் ஸ்டிரைக்கர்ஸை வீழ்த்தி தொடர்ச்சியாக இரண்டாவது முறையாக கோப்பையை வென்று அசத்தியது.