தென் ஆப்பிரிக்க கிரிக்கெட் வாரியம் இன்று தங்கள் அணியின் வீரர் வீராங்கனைகளுக்கான 2024-25 ஆம் ஆண்டிற்கான ஒப்பந்த பட்டியலை வெளியிட்டுள்ளது. இந்த பட்டியலில் நடந்துமுடிந்த ஒருநாள் உலகக்கோப்பை தொடருடன் ஒருநாள் கிரிக்கெட்டில் இருந்து ஓய்வை அறிவித்த நட்சத்திர வீரர் குயின்டன் டி காக் பெயர் இடம்பெறவில்லை. முன்னதாக டெஸ்ட் கிரிக்கெட்டிலிருந்தும் ஓய்வை அறிவித்த அவர் தற்போது டி20 கிரிக்கெட்டில் மட்டுமே விளையாடி வருகிறார்.
மேலும் காயம் காரணமாக கடந்த ஓராண்டாக விளையாடமல் இருந்துவரும் வேகப்பந்து வீச்சாள் ஆண்ட்ரிச் நோர்ட்ஜேவுக்கு இந்த ஒப்பந்தத்தில் இடம் கிடைக்கவில்லை. அத்போல் டெஸ்ட் கிரிக்கெட்டிலிருந்து ஓய்வை அறிவித்துள்ள டீன் எல்கரும் இப்பட்டியலில் இருந்து விலக்கப்பட்டுள்ளார். மேலும் கடந்த ஓராண்டாக தென் ஆப்பிரிக்க கிரிக்கெட் அணிக்காக விளையாடிய சிசாண்டா மகாலா, வெய்ன் பார்னெல், கீகன் பீட்டர்சென் ஆகியோருக்கும் ஒப்பந்தத்தில் இடம் கிடைக்கவில்லை.
அதேபோல் ஒருநாள் உலகக்கோப்பை தொடரில் அபார பந்துவீச்சை வெளிப்படுத்திய ஜெரால்ட் கோட்ஸி முதல் முறையாக தென் ஆப்பிரிக்க கிரிக்கெட் வாரிய ஒப்பந்தத்தைப் பெற்றுள்ளார். அவருடன், இந்திய அணிக்கு எதிரான தொடரில் சிறப்பாக செயல்பட்ட மற்றொரு வேகப்பந்து வீச்சாளரான நந்த்ரே பர்கரும் இந்த ஒப்பந்த பட்டியலில் இணைந்துள்ளார். மேலும் அத்தொடரில் சிறப்பான செயல்பாட்டை வெளிப்படுத்திய டோனி டி ஸோர்ஸியும் இப்பட்டியலில் இடம்பிடித்துள்ளார்.
