இங்கிலாந்து - ஆஸ்திரேலிய அணிகளுக்கு இடையேயான இரண்டாவது ஆஷஸ் டெஸ்ட் போட்டி லண்டனிலுள்ள லார்ட்ஸ் கிரிக்கெட் மைதானத்தில் நேற்று தொடங்கியது. இதில் டாஸ் வென்ற இங்கிலாந்து அணி முதலில் பந்துவீசுவதாக தீர்மானித்து ஆஸ்திரேலிய அணியை பேட்டிங் செய்ய அழைத்தது.
அதன்படி களமிறங்கிய ஆஸ்திரேலிய அணி முதல்நாள் ஆட்டநேர முடிவில் 5 விக்கெட் இழப்பிற்கு 339 ரன்களைச் சேர்த்திருந்தது. இதையடுத்து இன்று நடைபெற்ற இரண்டாம் நாள் ஆட்டத்தை ஸ்டீவ் ஸ்மித் 85 ரன்களுடனும், அலெக்ஸ் கேரி 11 ரன்களுடனும் தொடர்ந்தனர். இதில் அலெக்ஸ் கேரி 11 ரன்களில் ஆட்டமிழக்க, அடுத்து வந்த மிட்செல் ஸ்டாருக்கும் 6 ரன்களில் விக்கெட்டை இழந்தார்.
அதேசமயம் மறுமுனையில் அபார ஆட்டத்தை வெளிப்படுத்தி வந்த ஸ்டீவ் ஸ்மித் தனது 32ஆவது சர்வதேச டெஸ்ட் சதத்தைப் பதிவுசெய்து அசத்தினார். அதன்பின் அவரும் 112 ரன்களுக்கு விக்கெட்டை இழக்க, ஆஸ்திரேலிய அணி 416 ரன்களுக்கு ஆல் அவுட்டானது. இங்கிலாந்து தரப்பில் சிறப்பாக பந்துவீச்சிய ஒல்லி ராபின்சன், ஜோஷ் டங் தலா 3 விக்கெட்டுகளை கைப்பற்றினர்.
