AUS vs ENG, 3rd T20I: பட்லர் அதிரடி அரைசதம்; மழையால் கைவிடப்பட்ட ஆட்டம்!

ஆஸ்திரேலியா - இங்கிலாந்து அணிகளுக்கு இடையேயான மூன்றாவது டி20 போட்டி மழையால் கைவிடப்பட்டது.

AUS vs ENG: Rain Abandons 3rd T20I Between Australia And England; England Win Series 2-0 (Image Source: Google)

டி20 உலக கோப்பைக்கு முன்பாக ஆஸ்திரேலியாவில் ஆஸ்திரேலியா - இங்கிலாந்து இடையேயான டி20 தொடர் நடந்துவருகிறது. 3 டி20 போட்டிகள் கொண்ட தொடரின் முதலிரண்டு போட்டிகளிலும் வெற்றி பெற்று இங்கிலாந்து அணி தொடரை வென்றுவிட்ட நிலையில், கடைசி டி20 போட்டி கான்பெராவில் நடந்துவருகிறது.

இந்த போட்டியில் டாஸ் வென்ற ஆஸ்திரேலிய அணி ஃபீல்டிங்கை தேர்வு செய்தது. இந்த போட்டியில் தொடக்க வீரர் டேவிட் வார்னருக்கு ஓய்வளிக்கப்பட்டது. இங்கிலாந்து அணியில் சாம் கரன், கிறிஸ் ஜோர்டானுக்கு ஓய்வளிக்கப்பட்டு முறையே கிறிஸ் வோக்ஸ் மற்றும் மார்க் உட் ஆகிய இருவரும் சேர்க்கப்பட்டனர்.

அதன்படி முதலில் பேட்டிங் செய்த இங்கிலாந்து அணியின் தொடக்க வீரர் அலெக்ஸ் ஹேல்ஸ் ரன்னே அடிக்காமல் ஆட்டமிழக்க, பட்லரும் டேவிட் மலானும் இணைந்து நன்றாக ஆடிக்கொண்டிருக்க, 7ஆவது ஓவரின்போது மழை குறுக்கிட்டது. அதனால் ஆட்டம் 17 ஓவர்களாக குறைக்கப்பட்டது. ஆனால் மீண்டும் 10வது ஓவரின்போது மழை குறுக்கிட்டதால் ஆட்டம் 12 ஓவர்களாக குறைக்கப்பட்டது.

இதையடுத்து ஹேசில்வுட் வீசிய 11ஆவது ஓவரில் 3 பவுண்டரிகள் மற்றும் ஒரு சிக்ஸர் உட்பட அந்த ஓவரில் 22 ரன்களை குவித்தார். அதிரடியாக விளையாடி அரைசதம் அடித்த ஜோஸ் பட்லர், 41 பந்தில் 65 ரன்களை குவிக்க, இங்கிலாந்து அணி 12 ஓவரில் 112 ரன்களை குவித்தது.

ஆட்டத்தின் இடையே மழை குறுக்கிட்டு இங்கிலாந்து பேட்டிங் செய்துகொண்டிருந்த போதே ஓவர்கள் குறைக்கப்பட்டதால், டக்வொர்த் லூயிஸ் முறைப்படி கணக்கிடப்பட்டு, ஆஸ்திரேலிய அணிக்கு 130 ரன்கள் இலக்காக நிர்ணயிக்கப்பட்டது.

இதையடுத்து இலக்கை நோக்கி களமிறங்கிய ஆஸ்திரேலிய அணியில் கேப்டன் ஆரோன் ஃபிஞ்ச், மிட்செல் மார்ஷ் ஆகியோர் கிறிஸ் வோக்ஸ் வீசிய முதல் ஓவரின் முதலிரண்டு பந்துகளில் டக் அவுட்டாகி பெவிலியனுக்கு திரும்பினர். 

அதன்பின் ஜோடி சேர்ந்த மேக்ஸ்வெல் - ஸ்மித் இணை அதிரடியாக விளையாட முயற்சித்தது. ஆனால் மேக்ஸ்வெல்லும் 8 ரன்கள் எடுத்த நிலையில் வோக்ஸிடம் விக்கெட்டை இழக்க, மீண்டும் மழைக்குறுக்கிட்டது.

தொடர்ந்து மழை நீடித்த காரணத்தால் ஆட்டம் கைவிடப்படுவதாக அறிவிக்கப்பட்டது. இதன்மூலம் இங்கிலாந்து அணி 2-0 என்ற கணக்கில் டி20 தொடரைக் கைப்பற்றி அசத்தியது. மேலும் இப்போட்டியில் இரண்டு ஓவர்களை வீசியிருந்த கிறிஸ் வோக்ஸ் 3 விக்கெட்டுகளைக் கைப்பற்றியது குறிப்பிடத்தக்கது.