ஆஸ்திரேலியா - வெஸ்ட் இண்டீஸ் அணிகளுக்கு இடையேயான இரண்டு போட்டிகள் கொண்ட டெஸ்ட் தொடர் தற்போது நடைபெற்று வருகிறது. இதில் அடிலெய்டில் நடைபெற்ற முதல் டெஸ்ட் போட்டியில் ஆஸ்திரேலிய அணி 10 விக்கெட்டுகள் வித்தியாசத்தில் வெஸ்ட் இண்டீஸை வீழ்த்தி 1-0 என்ற கணக்கில் தொடரில் முன்னிலை வகிக்கிறது.
இந்தப் போட்டியின்போது இரண்டாவது இன்னிங்ஸில் களமிறங்கிய ஆஸ்திரேலிய அணியின் தொடக்க வீரர் உஸ்மான் கவாஜா, வெஸ்ட் இண்டீஸ் அறிமுக வீரர் ஷமார் ஜோசவ் பந்துவீச்சில் தலையில் அடிபட்டது. அப்போது அவருக்கு ரத்தகசிவு ஏற்படவே, உடனடியாக மைதானத்திலிருந்து கவாஜா வெளியேறி மருத்துவ பரிசோதனைக்கு உட்படுத்தப்பட்டார். இதையடுத்து அவர் வெஸ்ட் இண்டீஸுக்கு எதிரான இரண்டாவது டெஸ்டில் விளையாடுவாரா என்ற சந்தேகமும் ரசிகர்கள் மத்தியில் எழுந்தது.
அதன்பின் நேற்றைய தினம் பயிற்சிக்கு திரும்பிய கவாஜாவிற்கு மருத்துவ பரிசோதனைகள் நடத்தப்பட்டது. இதில் முடிவுகள் அவருக்கு சாதகமாக இருந்தன. இருப்பினும் அவருக்கு தாமதமாக ஏதெனும் அறிகுறிகள் தென்படுகின்றனவா என்பதை கண்டறிவதற்காக இன்றைய தினமும் பரிசோதனை மேற்கொள்ளப்பட்டது. அதன்படி பரிசோதனை முடிவில் உஸ்மான் கவாஜாவிற்கு சாதகமான முடிவுகள் கிடைத்தன.
