AUSW vs INDW, 2nd T20I: நியூசிலாந்தை வீழ்த்தி தொடரை வென்றது ஆஸ்திரேலியா!

நியூசிலாந்து மகளிர் அணிக்கு எதிரான இரண்டாவது டி20 போட்டியில் ஆஸ்திரேலிய மகளிர் அணி 29 ரன்கள் வித்தியாசத்தில் வெற்றிபெற்று அசத்தியது.

AUSW vs INDW, 2nd T20I: நியூசிலாந்தை வீழ்த்தி தொடரை வென்றது ஆஸ்திரேலியா! (Image Source: Google)

ஆஸ்திரேலியாவில் சுற்றுப்பயணம் மேற்கொண்டுள்ள நியூசிலாந்து மகளிர் அணி 3 போட்டிகள் கொண்ட டி20 தொடரில் விளையாடி வருகிறது. இத்தொடரில் நடந்து முடிந்த முதல் டி20 போட்டியில் ஆஸ்திரேலிய அணி வெற்றிபெற்ற நிலையில், இரண்டாவது டி20 போட்டி இன்று நடைபெற்றது.

இப்போட்டியில் டாஸ் வென்று முதலில் பேட்டிங்கைத் தேர்வு செய்த ஆஸ்திரேலிய அணிக்கு கேப்டன் அலிசா ஹீலி - பெத் மூனி இணை தொடக்கம் கொடுத்தனர். இதில் பெத் மூனி 10 ரன்களை மட்டுமே எடுத்த நிலையில் ஆட்டமிழந்தார். பின்னர் இணைந்த அலிசா ஹீலி - எல்லிஸ் பெர்ரி இணை அதிரடியாக விளையாடி அணியின் ஸ்கோரை மளமளவென் உயர்த்தினர். இதில் அரைசதம் அடிப்பார்கள் என எதிர்பார்க்கப்பட்ட அலிசா ஹீலி 38 ரன்களிலும், எல்லிஸ் பெர்ரி 34 ரன்களிலும் என அடுத்தடுத்து விக்கெட்டுகளை இழந்து பெவிலியனுக்கு திரும்பினர். 

அதன்பின் களமிறங்கிய ஆஷ்லே கார்ட்னர் 18 ரன்களுக்கும், லிட்ச்ஃபீல்ட் 8 ரன்களுக்கும், தஹ்லியா மெக்ராத் 7 ரன்களிலும் ஜார்ஜியா வர்ஹம் 9 ரன்களிலும் என அடுத்தடுத்து விக்கெட்டுகளை இழக்க, இறுதியில் களமிறங்கிய வீராங்கனைகளும் அடுத்தடுத்து சொற்ப ரன்களில் நடையைக் கட்டினர். இதனால் ஆஸ்திரேலிய மகளிர் அணி 19.3 ஓவர்களில் அனைத்து விக்கெட்டுகளையும் இழந்து 142 ரன்களுக்கு ஆல் அவுட்டானது. நியூசிலாந்து அணி தரப்பில் அபாரமான பந்துவீச்சை வெளிப்படுத்திய அமெலியா கெர் 4 விக்கெட்டுகளை கைப்பற்றி அசத்தினார். 

இதனையடுத்து இலக்கை நோக்கி விளையாடிய நியூசிலாந்து அணியில் தொடக்க வீராங்கனை சூஸி பேட்ஸ் அதிரடியான தொடக்கத்தைக் கொடுத்தார். அதேசமயம் மறுபக்கம் களமிறங்கிய ஜார்ஜியா பிலிம்மர் 9 ரன்களுக்கும், அமெலியா கெர் 6 ரன்களுக்கும், கேப்டன் சோபி டிவைன் 4 ரன்களுக்கும், பிரூக் ஹாலிடே 11 ரன்களுக்கும் விக்கெட்டை இழந்து ஏமாற்றமளித்தனர். இதற்கிடையில் அபாரமான ஆட்டத்தை வெளிப்படுத்தி வந்த சூஸி பேட்ஸ் 34 ரன்களைச் சேர்த்திருந்த நிலையில் விக்கெட்டை இழந்து தனது அரைசதத்தை பதிவுசெய்யும் வாய்ப்பையும் தவறவிட்டார். 

இதனைத்தொடர்ந்து களமிறங்கிய வீரர்களில் மேடி கிரீன் 22 ரன்களையும், இறுதிவரை ஆட்டமிழக்காமல் இருந்த இஸபெல்லா கஸா 18 ரன்களையும் சேர்த்த நிலையிலும் நியூசிலாந்து அணியால் இலக்கை எட்டமுடியவில்லை. அந்த அணி 20 ஓவர்கள் முடிவில் 7 விக்கெட்டுகளை இழந்து 113 ரன்களை மட்டுமே சேர்த்தது. ஆஸ்திரேலிய அணி தரப்பில் ஆஷ்லே கார்ட்னர் 3 விக்கெட்டுகளை கைப்பற்றினார். இதன்மூலம் ஆஸ்திரேலிய மகளிர் அணி 29 ரன்கள் வித்தியாசத்தில் நியூசிலாந்து மகளிர் அணியை வீழ்த்தியதுடன், 2-0 என்ற கணக்கில் டி20 தொடரையும் கைப்பற்றி அசத்தியது.

Win Big, Make Your Cricket Tales Now