பிபிஎல் 2023: மீண்டும் சதமடித்து மிரட்டிய ஸ்மித்; சிட்னி சிக்சர்ஸ் இமாலய வெற்றி!

பிக் பேஷ் லீக் டி20 தொடரில் இன்று நடைபெற்ற ஆட்டத்தில் சிட்னி சிக்சர்ஸ் அணி 125 ரன்கள் வித்தியாசத்தில் சிட்னி தண்டர்ஸை வீழ்த்தி இமாலய வெற்றியைப் பதிவுசெய்தது.

BBL 12: Sydney Sixers completely outclassed Sydney Thunder , winning it by huge margin of 125 runs! (Image Source: Google)

ஆஸ்திரேலியாவின் உள்ளூர் கிரிக்கெட் தொடரான பிக் பேஷ் லீக் தொடரின் 12ஆவது சீசன் விறுவிறுப்பாக நடைபெற்று வருகிறது. இதில் இன்று நடைபெற்ற 50ஆவது லீக் ஆட்டத்தில் சிட்னி சிக்சர்ஸ் - சிட்னி தண்டர் அணிகள் பலப்பரீட்சை நடத்தின. இப்போட்டிக்கு முன்னதாக மழை பெய்த காரணத்தால் ஆட்டம் 19 ஓவர்களாக குறைக்கப்பட்டது.

இதில் டாஸ் வென்ற சிட்னி சிக்சர்ஸ் அணி முதலில் பேட்டிங் செய்ய தீர்மானித்து களமிறங்கியது. அதன்படி களமிறங்கிய அந்த அணியில் ஜோஷ் பிலீப், குர்டின் பேட்டர்சன் ஆகியோர் சொற்ப ரன்களுக்கு விக்கெட்டை இழந்தனர். இருப்பினும் மற்றொரு தொடக்க வீரராக களமிறங்கிய ஸ்டீவ் ஸ்மித் அதிரடியாக விளையாடியது மட்டுமின்றி பவுண்டரியும், சிக்சர்களையும் பறக்கவிட்டார்.

தொடர்ந்து அபார ஆட்டத்தை வெளிப்படுத்திய ஸ்மித் சதமடித்து அசத்தினார். இதில் இறுதிவரை ஆட்டமிழக்காமல் இருந்த ஸ்மித் 66 பந்துகளில் 5 பவுண்டரி, 9 சிக்சர்கள் என 125 ரன்களைச் சேர்த்து அசத்தினார். இதன்மூலம் சிட்னி சிக்சர்ஸ் அணி 19 ஓவர்களில் 2 விக்கெட்டுகளை மட்டும் இழந்து 182 ரன்களைச் சேர்த்தது.

இதையடுத்து கடின இலக்கை நோக்கி களமிறங்கிய சிட்னி தண்டர் அணிக்கு அதிர்ச்சி காத்திருந்தது. அந்த அணியின் மேத்யூ கில்க்ஸ் 1, டேவிட் வார்னர் 16, நிகிடரஸ் 8 என அடுத்தடுத்து விக்கெட்டை இழக்க, அவர்களைத் தொடர்ந்து களமிறங்கிய வீரர்கள் ஒற்றையிலக்க ரன்களோடு பெவிலியனுக்கு நடையைக் கட்டினர்.

இதனால் சிட்னி தண்டர் அணி 14.4 ஓவர்களில் அனைத்து விக்கெட்டுகளையும் இழந்து 62 ரன்களை மட்டுமே எடுத்தது. சிட்னி சிக்சர்ஸ் தரப்பில் ஸ்டீவ் ஓ கீஃப் 4 விக்கெட்டுகளையும், சீன் அபேட் 3 விக்கெட்டுகளையும் கைப்பற்றி அசத்தினர்.

இதன்மூலம் சிட்னி சிக்சர்ஸ் அணி 125 ரன்கள் வித்தியாசத்தில் சிட்னி தண்டர்ஸை வீழ்த்தி இமாலய வெற்றியைப் பதிவுசெய்தது. இப்போட்டியில் சதமடித்து அசத்திய ஸ்டீவ் ஸ்மித் ஆட்டநாயகனாகத் தேர்வுசெய்யப்பட்டார்.

Win Big, Make Your Cricket Tales Now