பிபிஎல் 13: மெக்டர்மோட் அரைசதம்; சிட்னி தண்டரை வீழ்த்தி ஹரிகேன்ஸ் வெற்றி!

சிட்னி தண்டர் அணிக்கெதிரான பிபிஎல் லீக் ஆட்டத்தில் ஹாபர்ட் ஹரிகேன்ஸ் அணி 7 விக்கெட் வித்தியாசத்தில் வெற்றிபெற்று அசத்தியது.

பிபிஎல் 13: மெக்டர்மோட் அரைசதம்; சிட்னி தண்டரை வீழ்த்தி ஹரிகேன்ஸ் வெற்றி! (Image Source: Google)

பிக் பேஷ் லீக் தொடரின் 13ஆவது சீசன் விறுவிறுப்பாக நடைபெற்று வருகிறது. இதில் இன்று நடைபெற்ற 21ஆவது லீக் ஆட்டத்தில் ஹாபர்ட் ஹரிகேன்ஸ் - சிட்னி தண்டர் அணிகள் பலப்பரீட்சை நடத்தின. ஹாபர்ட்டில் நடைபெற்ற இப்போட்டியில் ஹாபர்ட் ஹரிகேன்ஸ் அணி முதலில் பந்துவீசுவதாக அறிவித்தது. அதன்படி களமிறங்கிய சிட்னி அணிக்கு பான்கிராஃப்ட் - அலெக்ஸ் ஹேல்ஸ் இணை தொடக்கம் கொடுத்தனர். 

இதில் ஹேல்ஸ் 3 ரன்களுக்கு விக்கெட்டை இழக்க, அடுத்து வந்த கார்ட்மோரும் ரன்கள் ஏதுமின்றி விக்கெட்டை இழந்து பெவிலியனுக்கு திரும்பினார். அதன்பின் பெரிதும் எதிர்பார்க்கப்பட்ட பான்கிராஃப்ட் 21 ரன்களுக்கும், ஒலிவியர் டேவிஸ் 20 ரன்களுக்கும், அலெக்ஸ் ரோஸ் 14 ரன்களிலும், டேனியல் சாம்ஸ் 25 ரன்களுக்கு மெக்கண்ட்ரூ 7 ரன்களுக்கும் என விக்கெட்டை இழந்து ஏமாற்றமளித்தனர். 

இறுதியில் அதிரடியாக விளையாடிய கேப்டன் கிறிஸ் கிரீன் 3 பவுண்டரி, ஒரு சிக்சர் என 33 ரன்களைச் சேர்த்து அணிக்கு உதவினார். இதனால் 20 ஓவர்கள் முடிவில் சிட்னி தண்டர் அணி 8 விக்கெட்டுகள் இழப்பிற்கு 150 ரன்களை மட்டுமே எடுத்தது. ஹாபர்ட் ஹரிகேன்ஸ் அணி தரப்பில் பேட்ரிக் தூலே, கிறிஸ் ஜோர்டன், நிகில் சௌத்ரில் ஆகியோர் தலா 2 விக்கெட்டுகளை வீழ்த்தினர். 

இதையடுத்து இலக்கை நோக்கி களமிறங்கிய ஹாபர்ட் ஹரிகேன்ஸ் அணிக்கு மேத்யூ வேட் - கலெப் ஜொவெல் இணை அதிரடியான தொடக்கத்தைக் கொடுத்து அணிக்கு அடித்தளம் அமைத்துக்கொடுத்தனர். இதில் மேத்யூ வேட் 15 ரன்களில் ஆட்டமிழக்க, கலெப் ஜொவெலும் 31 ரன்களுக்கு விக்கெட்டை இழந்தார். இதையடுத்து களமிறங்கிய ரைட்டும் ஒரு பவுண்டரி, 3 சிக்சர்கள் என 34 ரன்களைச் சேர்த்து விக்கெட்டை இழந்தார். 

அதன்பின் இணைந்த பென் மெக்டர்மோட் - கோரி ஆண்டர்சன் இணை அதிரடியாக விளையாடி அணியின் ஸ்கோரை உயர்த்தினர். இதில் அபார ஆட்டத்தை வெளிப்படுத்திய பென் மெக்டர்மோட் 6 பவுண்டரி, 2 சிக்சர்கள் என 53 ரன்களைச் சேர்த்து அணிக்கு வெற்றியைத் தேடிக்கொடுத்தார். இதன்மூலம் ஹாபர்ட் ஹரிகேன்ஸ் அணி 18.1 ஓவர்களில் இலக்கை எட்டியதுடன் 7 விக்கெட் வித்தியாசத்தில் சிட்னி தண்டரை வீழ்த்தி அபார வெற்றியைப் பதிவுசெய்தது. 

இதைத்தொடர்ந்து இன்று நடைபெற இருந்த 22ஆவது லீக் ஆட்டத்தில் பிரிஸ்பேன் ஹீட் - சிட்னி சிக்சர்ஸ் அணிகள் பலப்பரீட்சை நடத்த இருந்தன. ஆனால் தொடர்ந்து மழை நீடித்த காரணத்தால் இப்போட்டி டாஸ் போடப்படாமல் கைவிடப்பட்டதாக அறிவித்தது. 

Win Big, Make Your Cricket Tales Now