BBL 2024-25: மிட்செல் ஓவன் அபார சதம்; பெர்த் ஸ்கார்ச்சர்ஸ் வீழ்த்தியது ஹோபர்ட் ஹரிகேன்ஸ்!

பிக் பேஷ் லீக் 2024-25: பெர்த் ஸ்கார்ச்சர்ஸ் அணிக்கு எதிரான லீக் போட்டியில் ஹோபர்ட் ஹரிகேன்ஸ் அணி 8 விக்கெட் வித்தியாசத்தில் வெற்றிபெற்று அசத்தியது.

BBL 2024-25: மிட்செல் ஓவன் அபார சதம்; பெர்த் ஸ்கார்ச்சர்ஸ் வீழ்த்தியது ஹோபர்ட் ஹரிகேன்ஸ்! (Image Source: Google)

ஆஸ்திரேலியாவில் நடைபெற்று வரும் பிக் பேஷ் லீக் தொடரின் 14ஆவது சீசன் விறுவிறுப்பாக நடைபெற்று வருகிறது. இதில் இன்று நடைபெற்ற 7ஆவது லீக் போட்டியில் ஹோபர்ட் ஹரிகேன்ஸ் மற்றும் பெர்த் ஸ்கார்ச்சர்ஸ் அணிகள் பலப்பரீட்சை நடத்தின. ஹோபர்டில் நடைபெற்ற இப்போட்டியில் டாஸ் வென்ற ஹோபர்ட் ஹரிகேன்ஸ் அணி முதலில் பந்துவீசுவதாக அறிவித்தது. 

இதையடுத்து களமிறங்கிய பெர்த் ஸ்கார்ச்சர்ஸ் அணிக்கு ஃபின் ஆலான் மற்றும் ஜென்னிங்ஸ் இணை தொடக்கம் கொடுத்தனர். இதில் ஃபின் ஆலன் 4 ரன்களில் விக்கெட்டை இழக்க, அடுத்து களமிறங்கிய கூப்பர் கனொலியும் 14 ரன்களில் நடையைக் கட்டினார். அதன்பின் ஜென்னிங்ஸுடன் இணைந்த ஜோஷ் இங்கிலிஸ் அதிரடியாக விளையாடி அணியின் ஸ்கோரை உயர்த்தினார். இதில் இருவரும் இணைந்து 50 ரன்களுக்கு மேல் பார்ட்னர்ஷிப் அமைத்த நிலையில், ஜென்னிங்ஸ் 3 பவுண்டரி, ஒரு சிக்ஸர் என 35 ரன்களைச் சேர்த்த நிலையில் ஆட்டமிழந்தார். 

பின்னர் இங்லிஷுடன் இணைந்த ஆஷ்டன் டர்னரும் அதிரடியாக விளையாட அணியின் ஸ்கோரும் சீரான வேகத்தில் உயர்ந்தது. இதில் அரைசதத்தை நெருங்கிய ஜோஷ் இங்கிலிஸ் 3 பவுண்டரி, 2 சிக்ஸர்கள் என 49 ரன்களில் ஆட்டமிழக்க, 39 ரன்களில் ஆஷ்டன் டர்னரும் விக்கெட்டை இழந்தார். அதன்பின் களமிறங்கிய வீரர்களும் சோபிக்க தவற பெர்த் அணி 20 ஓவர்கள் முடிவில் 6 விக்கெட்டுகளை இழந்து 155 ரன்களை மட்டுமே எடுத்தது. ஹோபர்ட் அணி தரப்பில் சிறப்பான பந்துவீச்சை வெளிப்படுத்திய ரைலீ மெரிடித் 3 விக்கெட்டுகளை கைப்பற்றி அசத்தினார். 

பின்னர் இலக்கை நோக்கி களமிறங்கிய ஹோபர்ட் ஹரிகேன்ஸ் அணிக்கு மிட்செல் ஓவன் அதிரடியான தொடக்கத்தைக் கொடுத்தார். அதேசமயம் மற்றொரு தொடக்க வீரரான கலெப் ஜிவெல் 7 ரன்களை மட்டுமே எடுத்திருந்த நிலையில் விக்கெட்டை இழக்க, அடுத்து களமிறங்கிய ஷாய் ஹோப்பும் சிறப்பான ஆட்டத்தை வெளிப்படுத்தி அணியின் ஸ்கோரை உயர்த்தினார். இதில் மிட்செல் ஓவன் மற்றும் ஷாய் ஹோப் இருவரும் இணைந்து இரண்டாவது விக்கெட்டிற்கு 100 ரன்கள் பார்ட்னர்ஷிப் அமைத்த நிலியில் ஷாய் ஹோப் 38 ரன்களில் ஆட்டமிழந்து பெவிலியன் திரும்பினார். 

அதேசமயம் மறுமுனையில் தொடர்ந்து அதிரடியாக விளையாடி வந்த மிட்செல் ஓவன் தனது சதத்தைப் பதிவுசெய்து அசத்தியதுடன் இறுதிவரை ஆட்டமிழக்காமல் 9 பவுண்டரி, 5 சிக்ஸர்கள் என 101 ரன்களைச் சேர்த்து அணிக்கு வெற்றியைத் தேடிக்கொடுத்தார். இதன்மூலம் ஹோபர்ட் ஹரிகேன்ஸ் அணி 19.2 ஓவர்களில் இலக்கை எட்டியதுடன் 8 விக்கெட் வித்தியாசத்தில் பெர்த் ஸ்கார்ச்சர்ஸ் அணியை வீழ்த்தி சத்தால் வெற்றியைப் பதிவுசெய்து அசத்தியது. இப்போட்டியில் சதமடித்து அசத்திய மிட்செல் ஓவன் ஆட்டநாயகன் விருதை வென்றார். 

Win Big, Make Your Cricket Tales Now