டிராவிஸ் ஹெட் விளையாடும் விதம் ஆடம் கில்கிறிஸ்ட் போலவே உள்ளது - ரிக்கி பாண்டிங்!

டிராவிஸ் ஹெட் விளையாடும் விதம் ஆடம் கில்கிறிஸ்ட் போலவே உள்ளது - ரிக்கி பாண்டிங்! (Image Source: Google)

ஆஸ்திரேலியா - இந்திய அணிகளுக்கு இடையேயான மூன்றாவது டெஸ்ட் போட்டியானது பிரிஸ்பேனில் உள்ள காபா கிரிக்கெட் மைதானத்தில் நாளை (டிசம்பர் 14) நடைபெறவுள்ளது. இதில் ஏற்கெனவே இரு அணிகளும் தலா ஒரு வெற்றியைப் பதிவுசெய்துள்ள நிலையில், இப்போட்டியில் எந்த அணி வெற்றிபெற்று தொடரில் முன்னிலைப் பெறும் என்ற எதிர்பார்ப்புகள் ரசிகர்கள் மத்தில் பெரும் எதிர்பார்ப்பை கிளப்பியுள்ளது.

இந்நிலையில் இப்போட்டியில் ஆஸ்திரேலிய அணியின் நட்சத்திர வீரர் டிராவிஸ் ஹெட்டின் ஆட்டத்தை பார்க்க ரசிகர்கள் ஆவலுடன் காத்திருக்கின்றனர். ஏனெனில் இந்திய அணிக்கு எதிரான இரண்டாவது டெஸ்ட் போட்டியில் அபார ஆட்டத்தை வெளிப்படுத்திய டிராவிஸ் ஹெட் சதமடித்து அசத்தியதுடன் அணியின் வெற்றியிலும் மிக முக்கிய பங்கினை வகித்தார். இதனால் இப்போட்டில் அவர் எவ்வளவு ரன்களைச் சேர்ப்பார் என்ற எதிர்பார்ப்புகள் அதிகரித்துள்ளன.

அதேசமயம் பிரிஸ்பேன் மைதானத்தில் டிராவிஸ் ஹெட் விளையாடிய கடைசி மூன்று இன்னிங்ஸ்களில் ரன்கள் ஏதுமின்றி விக்கெட்டை இழந்துள்ளார். இருப்பினும் இந்த மைதானத்தில் அவரது பேட்டிங் சராசரியானது 50.26ஆக உள்ளது என்பது குறிப்பிடத்தக்கது. இந்நிலையில், நவீன கால கிரிக்கெட்டின் பேட்டிங் ஜாம்பவான்களில் ஒருவராக டிராவிஸ் ஹெட் மாறுவதற்கான பாதையில் பயணித்து வருவதாக முன்னாள் வீரர் ரிக்கி பாண்டிங் தெரிவித்துள்ளார். 

இதுகுறித்து பேசிய அவர், “தற்போதை கிரிக்கெட்டின் ஜாம்பவான்களில் ஒருவராக இருப்பதற்கான பாதையில் டிராவிஸ் ஹெட் பயணித்து வருகிறார். நீங்கள் அவரை ஜாம்பவான் என்று அழைக்கும் நேரம் வந்துவிட்டதாக நினைக்கிறேன். ஏனெனில் அவர் களத்தில் என்ன செய்கிறார் என்பது குறிப்பிடத்தக்கது. மேலும் பல சமயங்களில், அவரது சிறப்பான ஆட்டம் அணியின் வெற்றிகளில் பங்கு வகித்ததுடன், அது அணிக்கு மிகவும் தேவையும்ப்பட்டது.

Travis Head #AUSvIND #Australia #TeamIndia #Gabba #TravisHead pic.twitter.com/GDUvP9j3vU

— CRICKETNMORE (@cricketnmore) December 12, 2024

ஏனெனில் இந்தியாவில் கடந்தாண்டு நடைபெற்று முடிந்த ஐசிசி ஒருநாள் உலகக்கோப்பை அரையிறுதி போட்டி, உலகக்கோப்பை இறுதிப்போட்டி, உலக டெஸ்ட் சாம்பியன்ஷிப் இறுதிப்போட்டி, ஓரிரு வருடங்களுக்கு முன்பு ஆஸ்திரேலியாவில் நடந்த ஆஷஸ் டெஸ்ட் தொடர் உள்ளிட்டவற்றில் டிராவிஸ் ஹெட்டின் பங்களிப்பை பற்றி யோசித்துப் பாருங்கள். இவை அனைத்தும் டிராவிஸ் ஹெட் எழுந்து நிற்க ஒரு வழியைக் கண்டுபிடித்த பெரிய தருணங்கள்,

தற்போது டிராவிஸ் ஹெட் விளையாடும் விதம் ஆடம் கில்கிறிஸ்ட் விளையாடிய விதத்தைப் போலவே உள்ளது. அனால் இவர்கள் இருவருக்கும் பேட்டிங் வரிசையில் ஓரிரு இடங்கள் மாறுபடும். கில்கிறிஸ்ட் 6 அல்லது 7ஆம் இடத்தில் கமிறங்கி செய்ததை, டிராவிஸ் ஹெட் 5ஆவது இடத்தில் செய்கிறார். அதனால் அவர் விளையாடுவதைப் பார்க்க விரும்புகிறேன். எங்கள் அணி வீரர்கள் இப்படி விளையாடுவதைப் பார்ப்பது மிகவும் புத்துணர்ச்சி அளிக்கிறது.” என்று தெரிவித்துள்ளார். 

ஆஸ்திரேலியா பிளேயிங் லெவன்: உஸ்மான் கவாஜா, நாதன் மெக்ஸ்வீனி, மார்னஸ் லாபுஷாக்னே, ஸ்டீவ் ஸ்மித், டிராவிஸ் ஹெட், மிட்செல் மார்ஷ், அலெக்ஸ் கேரி, பாட் கம்மின்ஸ் (கே), மிட்செல் ஸ்டார்க், நாதன் லையன், ஜோஷ் ஹேசில்வுட்.