சிபிஎல் 2023: ஜமைக்கா தலாவாஸை வீழ்த்தி நைட் ரைடர்ஸ் த்ரில் வெற்றி!

ஜமைக்கா தலாவாஸுக்கு எதிரான சிபிஎல் லீக் ஆட்டத்தில் டிரின்பாகோ நைட் ரைடர்ஸ் அணி 2 ரன்கள் வித்தியாசத்தில் வீழ்த்தி த்ரில் வெற்றிபெற்றது.

சிபிஎல் 2023: ஜமைக்கா தலாவாஸை வீழ்த்தி நைட் ரைடர்ஸ் த்ரில் வெற்றி! (Image Source: Google)

வெஸ்ட் இண்டீஸில் நடைபெற்றுவரும் கரீபியன் பிரீமியர் லீக் டி20 தொடரின் 12ஆவது சீசன் விறுவிறுப்பான கட்டத்தை எட்டியுள்ளது. இதில் நேற்று நடைபெற்ற 17ஆவது லீக் ஆட்டத்தில் டிரின்பாகோ நைட் ரைடர்ஸ் அணியை எதிர்த்து ஜமைக்கா தலாவாஸ் அணி பலப்பரீட்சை நடத்தி வருகிறது. இப்போட்டியில் டாஸ் வென்ற ஜமைக்கா தலாவாஸ் அணி முதலில் பந்துவீசுவதாக அறிவித்தது. 

இதையடுத்து நைட் ரைடர்ஸ் அணியின் தொடக்க வீரர்களாக மார்ட்டின் கப்தில் - மார்க் தயால் இணை களமிறங்கினர். இருவரும் தொடக்கம் முதலே பொறுப்பான ஆட்டத்தை வெளிப்படுத்தி 50 ரன்கள் பார்ட்னர்ஷிப் அமைத்தனர். இதில் அதிரடியாக விளையாடி ஒரு பவுண்டரி, 3 சிக்சர்களை விளாசி 30 ரன்களைச் சேர்த்திருந்த மார்க் தயால் விக்கெட்டை இழக்க, மறுபக்கம் 15 ரன்களை மட்டுமே எடுத்திருந்த மார்ட்டின் கப்திலும் விக்கெட்டை இழந்தார். 

அதன்பின் பெரிதும் எதிர்பார்க்கப்பட்ட நட்சத்திர வீரர் நிக்கோலஸ் பூரன் ஒரு ரன்னை மட்டுமே எடுத்த நிலையில் விக்கெட்டை இழந்து அதிர்ச்சி கொடுத்தார். பின்னர் ஜோடி சேர்ந்த லோர்கன் டக்கர் - கேப்டன் கிரேன் பொல்லார்ட் இணை நிதான ஆட்டத்தை வெளிப்படுத்தி அணியின் ஸ்கோரை உயர்த்தினர். ஆனால் இந்த இணையும் நீண்ட நேரம் நீடிக்கவில்லை. இதில் 30 ரன்களை எடுத்திருந்த லோர்கன் டக்கர் தனது விக்கெட்டை இழந்தார். 

அவரைத்தொடர்ந்து மறுமுனையில் அதிரடியாக விளையாடி வந்த கீரென் பொல்லார்டும் ஒரு பவுண்டரி, 2 சிக்சர்கள் என 33 ரன்களில் ஆட்டமிழந்தார். அதன்பின் அதிரடி வீரர் ஆண்ட்ரே ரஸல் ஒரு ரன்னுக்கும், கதீம் ஆலன் 7 ரன்களுக்கும், சுனில் நரைன் ரன்கள் ஏதுமின்றியும் என அடுத்தடுத்து தங்களது விக்கெட்டுகளை இழந்து பெவிலியனுக்கு நடையைக் கட்டினர். 

இதனால் 20 ஓவர்கள் முடிவில் டிரின்பாகோ நைட் ரைடர்ஸ் அணி 8 விக்கெட்டுகள் இழப்பிற்கு 142 ரன்களை மட்டுமே எடுத்தது. ஜமைக்கா தலாவாஸ் அணி தரப்பில் அபாரமாக பந்துவீசிய முகமது அமிர் மற்றும் கெல்வின் பிட்மேன் ஆகியோர் தலா 3 விக்கெட்டுகளையும், இமாத் வசிம், சல்மான் இர்ஷத் தலா ஒரு விக்கெட்டையும் கைப்பற்றினர்.

இதையடுத்து இலக்கை நோக்கி களமிறங்கிய ஜமைக்கா அணிக்கு பிராண்டன் கிங் - அலெக்ஸ் ஹேல்ஸ் அதிரடியான ஆட்டத்தை வெளிப்படுத்தி தொடக்கம் கொடுத்தனர். இதில் பிராண்டன் கிங் 36 ரன்களுக்கு ஆட்டமிழக்க, அடுத்து களமிறங்கிய ஜெர்மைன் பிளாக்வுட் ஒரு ரன்னுக்கும், ஷமாரா ப்ரூக்ஸ் ரன்கள் ஏதுமின்றியும் என அடுத்தடுத்து விக்கெட்டை இழக்க , மற்றொரு தொடக்க வீரரான அலெக்ஸ் ஹேல்ஸ் 21 ரன்களுக்கு விக்கெட்டை இழந்தார்.

அதன்பின் களமிறங்கிய ரய்மான் ரெய்ஃபெர் 17 ரன்களுக்கும்,  ஃபாபியன் ஆலன் 8 ரன்களுக்கு விக்கெட்டை இழக்க, அடுத்து களமிறங்கிய கிறிஸ் கிரீன் அதிரடியாக விளையாடி 16 பந்துகளில் 3 சிக்சர்களை விளாசி 32 ரன்களுக்கு விக்கெட்டை இழந்தார். இதனால் 20 ஓவர்கள் முடிவில் ஜமைக்கா தலாவாஸ் அணி 7 விக்கெட் இழப்பிற்கு 140 ரன்களை மட்டுமே எடுத்தது. 

டிரின்பாகோ நைட் ரைடர்ஸ் அணி தரப்பில் ஆண்ட்ரே ரஸல் 3 விக்கெட்டுகளையும், சுனில் நரைன், வக்கார் சலாம்கெயில் தலா 2 விக்கெட்டுகளைக் கைப்பற்றினர். இதன்மூலம் டிரின்பாகோ நைட் ரைடர்ஸ் அணி 2 ரன்கள் வித்தியாசத்தில் ஜமைக்கா தலாவாஸ் அணியை வீழ்த்தி த்ரில் வெற்றிபெற்றது. 

Win Big, Make Your Cricket Tales Now