சிபிஎல் 2023: கப்தில் அதிரடி சதம்; நைட் ரைடர்ஸ் அபார வெற்றி!
பார்போடாஸ் ராயல்ஸுக்கு எதிரான சிபிஎல் லீக் ஆட்டத்தி டிரின்பாகோ நைட் ரைடர்ஸ் அணி 133 ரன்கள் வித்தியாசத்தில் வெற்றிபெற்று அசத்தியது.
வெஸ்ட் இண்டீஸில் நடைபெற்றுவரும் கரீபியன் பிரீமியர் லீக் தொடரின் 12ஆவது சீசன் விறுவிறுப்பான கட்டத்தை எட்டியுள்ளது. இதில் இன்று நடைபெற்ற 13ஆவது லீக் ஆட்டத்தில் டிரின்பாகோ நைட்ரைடர்ஸ் மற்றும் பார்போடாஸ் ராயல்ஸ் அணிகள் பலப்பரீட்சை நடத்தின. இப்போட்டியில் டாஸ் வென்ற பார்போடாஸ் அணி முதலில் பந்துவீசுவதாக தீர்மானித்தது.
அதன்படி களமிறங்கிய நைட்ரைடர்ஸ் அணிக்கு மார்ட்டின் கப்தில் - மார்க் தயால் இணை அதிரடியான தொடக்கத்தைக் கொடுத்தனர். இதில் தயால் 27 ரன்களுக்கு ஆட்டமிழக்க, அடுத்து களமிறங்கிய கேப்டன் பொல்லார்ட் அதிரடியாக விளையாடி ஒரு பவுண்டரி, 4 சிக்சர்கள் என 46 ரன்களில் ஆட்டமிழந்து அரைசதம் அடிக்கும் வாய்ப்பை தவறவிட்டார்.
Trending
ஒருபக்கம் விக்கெட்டுகள் வீழ்ந்தாலும் மறுபக்கம் இறுதிவரை ஆட்டமிழக்காமல் களத்தில் இருந்த மார்ட்டின் கப்தில் 58 பந்துகளில் ஒரு பவுண்டரி, 9 சிக்சர்கள் என தனது சதத்தைப் பதிவுசெய்து அசத்தினார். இதன்மூலம் 20 ஓவர்கள் முடிவில் டிரின்பாகோ நைட் ரைடர்ஸ் அணி 5 விக்கெட் இழப்பிற்கு 194 ரன்களைச் சேர்த்தது.
இதையடுத்து கடின இலக்கை நோக்கி களமிறங்கிய பார்போடாஸ் ராயல்ஸ் அணிக்கு ரக்கீம் கார்ன்வால் - கைல் மேயர்ஸ் இணை தொடக்கம் கொடுத்தனர். இதில் கார்ன்வால், கைல் மேயர்ஸ் ஆகியோர் அடுத்தடுத்து முதல் பந்திலேயே விக்கெட்டை இழந்து பெவிலியனுக்கு நடையைக் கட்டினர். அதன்பின் களமிறங்கிய லௌரி எவன்ஸ், அலிக் அதனாஸ் ஆகியோர் சொற்ப ரன்களுக்கு ஆட்டமிழக்க, 20 ரன்களிலேயே அந்த அணி 4 விக்கெட்டுகளை இழந்து தடுமாறியது.
இதனையத்தொடர்ந்து களமிறங்கிய ஜேசன் ஹோல்டர் 14, ரோவ்மன் பாவெல் 10, கெவின் விக்ஹாம் 9, நயீம் யங் 3, கைஸ் அஹ்மது 10 என அடுத்தடுத்து விக்கெட்டுகளை இழக்க, பார்போடாஸ் ராயல்ஸ் அணி 12.1 ஓவர்களில் அனைத்து விக்க்கெட்டுகளையும் இழந்து 61 ரன்களுக்கு ஆல் அவுட்டானது. நைட்ரைடர்ஸ் தரப்பில் வக்கார் சலாம்கெயில் 4 விக்கெடுகளையும், ஆண்ட்ரே ரஸல் 3 விக்கெட்டுகளையும் கைப்பற்றினர்.
இதன்மூலம் டிரின்பாகோ நைட் ரைடர்ஸ் அணி 133 ரன்கள் வித்தியாசத்தில் பார்போடாஸ் ராயல்ஸை வீழ்த்தி அபார வெற்றியைப் பதிவுசெய்து அசத்தியது. இப்போட்டியில் சதமடித்து வெற்றிக்கு காரணமாக இருந்த மார்ட்டின் கப்தில் இப்போட்டியில் ஆட்டநாயகனாகத் தேர்வு செய்யப்பட்டார்.
Win Big, Make Your Cricket Tales Now
