வெஸ்ட் இண்டீஸின் டி20 லீக் தொடரான கரீபியன் பிரிமியர் லீக் தொடரின் 12ஆவது சீசன் இறுதிக்கட்டத்தை எட்டியுள்ளது. இதில் இன்று நடைபெற்ற எலிமினேட்டர் சுற்று ஆட்டத்தில் டிரின்பாகோ நைட் ரைடர்ஸ் மற்றும் பார்படாஸ் ராயல்ஸ் அணிகள் பலப்பரீட்சை நடத்தின.
இப்போட்டியில் டாஸ் வென்று முதலில் பேட்டிங் செய்த டிரின்பாகோ நைட் ரைடர்ஸ் அணியில் தொடக்க வீரர் சுனில் நரைன் 2 ரன்களை மட்டுமே எடுத்த நிலையில் விக்கெட்டை இழக்க, அவரைத் தொடர்ந்து மற்றொரு தொடக்க வீரரான ஜேசன் ராயும் 25 ரன்களில் ஆட்டமிழந்தார். ஆனாலும் இப்போட்டியில் மூன்றாவது விக்கெட்டிற்கு களமிறங்கிய நிக்கோலஸ் பூரன் அதிரடியான ஆட்டத்தை வெளிப்படுத்தியதுடன் தனது அரைசதத்தையும் பதிவுசெய்து அசத்தினார்.
மேற்கொண்டு இப்போட்டியில் இறுதிவரை ஆட்டமிழக்காமல் இருந்த பூரன் 6 பவுண்டரி, 5 சிக்ஸர்கள் என 91 ரன்களைச் சேர்த்து அசத்தினார். மேற்கொண்டு இப்போட்டியில் பூரன் சதமடிப்பார் என எதிர்பார்க்கப்பட்ட நிலையில் போதிய வெளிச்சமின்மை கரணமாக இப்போட்டி தடைபட்டது. இதனால் நைட் ரைடர்ஸ் அணி 19.1 ஓவர்களில் 3 விக்கெட்டுகளை இழந்து 168 ரன்களைச் சேர்த்த நிலையில் இன்னிங்ஸ் முடிந்ததாக அறிவிக்கப்பட்டது.
