டிஎன்பிஎல் 2025: நெல்லை ராயல் கிங்ஸை வீழ்த்தி பிளே ஆஃப் வாய்ப்பை உறுதி செய்தது டிராகன்ஸ்
நெல்லை ராயல் கிங்ஸுக்கு எதிரான டிஎன்பிஎல் லீக் போட்டியில் திண்டுக்கல் டிராகன்ஸ் அணி 4 விக்கெட் வித்தியாசத்தில் வெற்றிபெற்று அசத்தியுள்ளது.
நெல்லை ராயல் கிங்ஸ் மற்றும் திண்டுக்கல் அணிகளுக்கு இடையேயான டிஎன்பிஎல் லீக் போட்டி இன்று திருநெல்வேலியில் நடைபெற்றது. இப்போட்டியில் டாஸ் வென்று முதலில் பேட்டிங் செய்த நெல்லை அணிக்கு சந்தோஷ் குமார் - கேப்டன் அருண் கார்த்திக் இணை தொடக்கம் கொடுத்தனர். இதில் அருண் கார்த்திக் 5 ரன்களில் நடையைக் கட்ட, அவரைத்தொடர்ந்து 26 ரன்களைச் சேர்த்த நிலையில் சந்தோஷ் குமாரும் விக்கெட்டை இழந்தார். அதன்பின் களமிறங்கிய அதிஷ் 19 ரன்னிலும், நிர்மல் குமார் 16 ரன்னிலும், ரித்திக் ஈஸ்வரன் ரன்கள் ஏதுமின்றியும், ஆதான் கான் 22 ரன்ன்லும் என விக்கெட்டுகளை இழந்தனர்.
அதன்பின் ஜோடி சேர்ந்த சோனு யாதவ் மற்றும் என்எஸ் ஹரிஷ் இணை சிறப்பான ஆட்டத்தை வெளிப்படுத்தி அணியின் ஸ்கோரை உயர்த்தினர். மேலும் இப்போட்டியில் இறுதிவரை ஆட்டமிழக்காமல் இருந்த ஹரிஷ் 4 பவுண்டரி, 3 சிக்ஸர்கள் என 43 ரன்களையும், சோனு யாதவ் 3 பவுண்டரி, 2 சிக்ஸர்களுடன் 39 ரன்களையும் சேர்த்து அணிக்கு ஃபினிஷிங்கைக் கொடுத்தனர். இதன்மூலம் நெல்லை ராயல் கிங்ஸ் அணி 20 ஓவர்கள் முடிவில் 6 விக்கெட் இழப்பிற்கு 179 ரன்களைச் சேர்த்தது. திண்டுக்கல் தரப்பில் கேப்டன் அஸ்வின், பெரியசாமி, வருண் சக்ரவர்த்தி தலா 2 விக்கெட்டுகளை வீழ்த்தின.
இதையடுத்து இலக்கை நோக்கி விளையாடிய திண்டுக்கல் அணிக்கு எதிர்பார்த்த தொடக்கம் கிடைக்கவில்லை. அந்த அணியின் டாப் ஆர்டர் வீரர்கள் கேப்டன் ரவிச்சந்திரன் அஸ்வின் 5 ரன்களிலும், ஷிவம் சிங் 2 ரன்னிலும், பாபா இந்திரஜித் 15 ரன்னிலும் என விக்கெட்டுகளை இழந்தனர். இதனால் அந்த அணி 33 ரன்களில் 3 விக்கெட்டுகளை இழந்து தடுமாறியது. பின்னர் இணைந்த மான் பாஃப்னா மற்றும் விமல் குமார் இணை பொறுப்புடன் விளையாடி அணியின் ஸ்கோரை உயர்த்தினர். இதில் 4 பவுண்டரி, ஒரு சிக்ஸர் என 38 ரன்களுக்கு மான் பாஃப்னாவும், 4 பவுண்டரி, ஒரு சிக்ஸர் என 45 ரன்களில் விமல் குமார் ஆட்டமிழந்தார்.
அவர்களைத் தொடர்ந்து களமிறங்கிய ஹனி சன்னி அதிரடியான ஆட்டத்தை வெளிப்படுத்தியதுடன் 14 பந்துகளில் 3 பவுண்டரி, 3 சிக்ஸர்கள் என 37 ரன்களைச் சேர்த்து விக்கெட்டை இழந்தார். இறுதியில் தினேஷ் 17 ரன்களையும், கார்த்திக் சரண் 11 ரன்களையும் சேர்த்து அணிக்கு வெற்றியைத் தேடிக்கொடுத்தனர். இதன்மூலம் திண்டுக்கல் டிராகன்ஸ் அணி 18.4 ஓவர்களில் இலக்கை எட்டியதுடன் 4 விக்கெட்டுகள் வித்தியாசத்தில் நெல்லை ராயல் கிங்ஸ் அணியை வீழ்த்தி வெற்றிபெற்றது. இந்த வெற்றியின் மூலம் திண்டுக்கல் டிராகன்ஸ் அணி நடப்பு தொடரில் 4ஆவது வெற்றியைப் பதிவுசெய்துள்ளது.
Also Read: LIVE Cricket Score
Win Big, Make Your Cricket Tales Now
