ENG vs NZ, 2nd Test: மளமளவென சரியும் விக்கெட்டுகள்; வெற்றி யாருக்கு?

இங்கிலாந்துக்கு எதிரான இரண்டாவது டெஸ்ட் போட்டியின் நான்காம் நாள் ஆட்டநேர முடிவில் நியூசிலாந்து அணி இரண்டாவது இன்னிங்ஸில் 238 ரன்கள் முன்னிலைப் பெற்றுள்ளது.

இங்கிலாந்தில் சுற்றுப்பயணம் செய்துவரும் நியூசிலாந்து அணி 3 போட்டிகள் கொண்ட டெஸ்ட் தொடரில் விளையாடி வருகிறது. இதில் லார்ட்ஸில் நடைபெற்ற முதல் டெஸ்டில் இங்கிலாந்து அணி வெற்றி பெற்று 1-0 என முன்னிலை வகிக்கிறது. 

இந்நிலையில் இரு அணிகளுக்கும் இடையேயான 2ஆவது டெஸ்ட் நாட்டிங்கமில் நடைபெற்று வருகிறது. டாஸ் வென்ற இங்கிலாந்து அணி ஃபீல்டிங்கைத் தேர்வு செய்தது. நியூசிலாந்து கேப்டன் கேன் வில்லியம்சனுக்கு கரோனா பாதிப்பு ஏற்பட்டதால் இந்த டெஸ்டில் அவர் பங்கேற்கவில்லை.

அதன்படி களமிறங்கிய நியூசிலாந்து அணி முதல் இன்னிங்ஸில் 145.3 ஓவர்களில் 553 ரன்கள் எடுத்தது. டேரில் மிட்செல் 190, டாம் பிளண்டல் 106 ரன்கள் எடுத்தார்கள். ஆண்டர்சன் 3 விக்கெட்டுகளை வீழ்த்தினார்.

இதையடுத்து பேட்டிங் செய்த இங்கிலாந்து அணி 3ஆம் நாள் முடிவில், 114 ஓவர்களில் 5 விக்கெட் இழப்புக்கு 473 ரன்கள் எடுத்தது. ரூட் 163, ஃபோக்ஸ் 24 ரன்களுடன் களத்தில் இருந்தார்கள். 

இதையடுத்து இன்று நான்காம் நாள் ஆட்டத்தை தொடர்ந்த இங்கிலாந்து அணியில், இரட்டைச் சதம் எடுப்பார் என எதிர்பார்க்கப்பட்ட ஜோ ரூட், இன்று போல்ட் பந்தில் 176 ரன்களுக்கு ஆட்டமிழந்தார். 

அதன்பின் சிறப்பான ஆட்டத்தை வெளிப்படுத்தி வந்த பென் ஃபோக்ஸ் அரைசதம் அடித்த கையோடு 56 ரன்களில் ரன் அவுட்டாகி பெவிலியன் திரும்பினார். அவரைத் தொடர்ந்து களமிறங்கிய வீரர்களும் வந்த வேகத்திலேயே பெவிலியனுக்கு நடையைக் கட்டினர்.

இதனால் இங்கிலாந்து அணி முதல் இன்னிங்ஸில் 128.2 ஓவர்களில் 539 ரன்கள் எடுத்து அனைத்து விக்கெட்டுகளையும் இழந்தது. நியூசிலாந்து அணி தரப்பில் ட்ரெண்ட் போல்ட் 5 விக்கெட்டுகளை வீழ்த்தினார். 

இதையடுத்து 14 ரன்கள் முன்னிலையுடன் இரண்டாவது இன்னிங்ஸைத் தொடங்கிய நியூசிலாந்து அணிக்கு ஆரம்பமே அதிர்ச்சியளிக்கும் வகையில் கேப்டன் டாம் லேதம் முதல் ஓவரிலேயே விக்கெட்டை இழந்து நடையைக் கட்டினார். இந்த விக்கெட்டின் மூலம் இங்கிலாந்து வேகப்பந்து வீச்சாளர் ஜேம்ஸ் ஆண்டர்சன் சர்வதேச டெஸ்ட் கிரிக்கெட்டில் தனது 650ஆவது விக்கெட்டையும் வீழ்த்தினார்.

அதன்பின் ஜோடி சேர்ந்த வில் யங் - டேவன் கான்வே இணை பொறுப்பான ஆட்டத்தை வெளிப்படுத்தி விக்கெட் இழப்பை தடுத்ததுடன், அணியின் ஸ்கோரையும் உயர்த்தினர். தொடர்ந்து சிறப்பாக விளையாடிய இருவரும் அரைசதமும் கடந்தனர்.

பின்னர் 52 ரன்களில் டேவன் கான்வே விக்கெட்டை இழக்க, மறுமுனையிலிருந்த வில் யங்கும் 56 ரன்களுக்கு ஆட்டமிழந்தார். பின்னர் களமிறங்கிய ஹென்றி நிக்கோலஸ் 3, டாம் பிளெண்டல் 24, மிட்செல் பிரேஸ்வெல் 25, டிம் சௌதி 0 என அடுத்தடுத்து விக்கெட்டுகளை இழந்தனர்.

ஆனாலும் மறுமுனையில் நங்கூரம் போல் நின்ற டேரில் மிட்செல் விக்கெட்டை இழக்காமல் நின்று ஆடி வருகிறார். இதனால் நான்காம் நாள் ஆட்டநேர முடிவில் நியூசிலாந்து அணி 7 விக்கெட் இழப்பிற்கு 224 ரன்களைச் சேர்த்துள்ளது.

நியூசிலாந்து தரப்பில் டெரில் மிட்செல் 32 ரன்களுடனும், மேட் ஹென்றி 8 ரன்களுடனும் களத்தில் உள்ளனர்.