பாண்டிங்கின் அட்வைஸை கேட்ட இங்கிலாந்து; மார்க் வுட் சேர்ப்பு!

ஆஸ்திரேலியாவுக்கு எதிரான மூன்றாவது டெஸ்ட் போட்டிக்கான இங்கிலாந்து அணியில் மார்க் வுட் சேர்க்கப்படவுள்ளதாக தகவல் வெளியாகியுள்ளது

England set to make three changes for Australia encounter at Headingley! (Image Source: Google)

இங்கிலாந்து - ஆஸ்திரேலியா அணிகளுக்கு இடையேயான ஆஷஸ் டெஸ்ட் கிரிக்கெட் தொடர் நடைபெற்று வருகிறது. இதில் முதல் இரு போட்டிகளிலும் ஆஸ்திரேலியா அணி வென்று 2-0 என்ற கணக்கில் முன்னிலையில் உள்ளது.

இதனால் ஆஷஸ் தொடரை வெல்வதற்கு மீதமுள்ள 3 போட்டிகளிலும் வெற்றிபெற வேண்டிய கட்டாயத்தில் இங்கிலாந்து அணி உள்ளது. அதுமட்டுமல்லாமல் பேஸ் பால் திட்டம் அனைத்து அணிகளுக்கு எதிராகவும் சரிபட்டு வராது என்ற விமர்சனத்திற்கும் இங்கிலாந்து அணி பதிலடி கொடுக்க வேண்டிய தேவை எழுந்துள்ளது.

இதனால் லீட்ஸ் மைதானத்தில் நடக்கவுள்ள 3ஆவது டெஸ்ட் போட்டி மீதான எதிர்பார்ப்பு எகிறியுள்ளது. இதனிடையே ஆஸ்திரேலிய அணியின் நாதன் லயன் காயம் காரணமாக விலகியுள்ளதால், இங்கிலாந்து அணிக்கு சாதகமான சூழல் ஏற்பட்டுள்ளது. இதனால் புதிதாக வரும் டாட் மர்ஃபியை இங்கிலாந்து அணி அட்டாக் மேல் அட்டாக் செய்ய வாய்ப்புகள் உள்ளது.

அதுமட்டுமல்லாமல் இங்கிலாந்து அணி தரப்பில் ஒல்லி போப் காயம் காரணமாக விலகி இருப்பதால், ஹாரி ப்ரூக் 3ஆவது இடத்தில் களமிறங்க உள்ளார். அதேபோல் ஆண்டர்சன் மற்றும் டங்க் ஆகியோர் நீக்கப்பட்டு அவர்களுக்கு பதிலாக மார்க் வுட், கிறிஸ் வோக்ஸ் மற்றும் மொயின் அலி ஆகியோர் களமிறக்கப்படவுள்ளனர். இதனால் இங்கிலாந்து அணியின் ஆல் ரவுண்டர்கள் எண்ணிக்கை அதிகரிக்கும்.

அதுமட்டுமல்லாமல் பிராட், ராபின்சன், ஆண்டர்சன் மூவரும் ஒரே வேகத்தில் பந்துவீசுவதால் ஆஸ்திரேலிய அணிக்கு எந்த அச்சுறுத்தலும் கொடுக்க முடியவில்லை. இதனால் அதிவேகமாக பந்துவீசும் மார்க் வுட் அணிக்குள் கொண்டு வரப்பட உள்ளதால், ஆஸ்திரேலிய அணி வீரர்கள் கூடுதல் எச்சரிக்கையுடன் செயல்பட வேண்டிய தேவை ஏற்பட்டுள்ளது. இதனால் 3ஆவது டெஸ்ட் போட்டியில் இங்கிலாந்து பதிலடி கொடுக்கும் என்று அந்நாட்டு ரசிகர்கள் கருத்து தெரிவித்து வருகின்றனர்.